Luukas 10

₁Tastmaŋa Hiärrá valjij vala čiččâmlovkyehti máttááttâspärnid já vuolgâttij sii parâluvâi jieijâs oovdeld jyehi kaavpugân já siijdân, kuus sun ááigui jieš moonnâđ.

₂Sun eeđâi sijjân: »Valje lii ennuv, mut pargeeh uccáá. Áánnuđ tääl hiärá, kiäs šaddo kulá, et sun vuolgât pargeid vuorkkiđ valješado.

₃Moonnâđ, mun vuolgâttâm tii tego saavzâid kuumpij kooskân. ₄Elleđ vääldi fárusâd ruttâpuursâ, elleđge laavhâ, elleđge kammuid. Elleđ määđhi alne ooroost tiervâttiđ kiämmán. ₅Já ko tij puátivetteđ monnii táálun, te ettâđ vuosmužžân: ’Ráávhu taan pááikán.’ ₆Jis tobbeen lii kiinii, kote lii ráávhu árvusâš, sun uážžu tii tuáivuttem ráávhu. Jis ij lah, tii tuáivuttâs máccá tijjân. ₇Pääcciđ ton táálun já puurrâđ já juuhâđ mii tijjân fálloo, tastko pargee lii päälhis ánsášâm. Elleđ sirduu táálust nuubán.

₈Ko tij puátivetteđ kaavpugân já ulmuuh kuásutteh tii, te puurrâđ mii tijjân fálloo, ₉pyerediđ kaavpug pyecceid já muštâliđ puohháid: ’Immeel väldikodde lii puáttám tii alda.’ ₁₀Mut jis tij mottoom kaavpugân puáđidijn eppeđ kuásuttuu, moonnâđ toi kááđui oolâ já kulluuttiđ: ₁₁’Mij sikkop meddâl koovjâ-uv, mii lii tarvanâm juolgijd tii kaavpugist – uážžuvetteđ anneeđ kovjâidâd! Mut tiettiđ, et Immeel väldikodde lii puáttám alda!’ ₁₂Mun eeđâm tijjân: Sodoma-uv piäsá tuámupeeivi ucebáin ko taggaar kaavpug.»

₁₃»Vuoi tuu, Korasin! Vuoi tuu, Betsaida! Jis tunnuu kááđuin tohhum vyeimitavoh liččii tohhum Tyrosist tâi Sidonist, te toi äššeeh liččii jo áigáá kárvudâttâm seekân, čokkám kuunâst já kaattâm. ₁₄Tuámupeeivi Tyros já Sidon peessâv-uv kepibáin ko tuoi. ₁₅Nabai tun, Kapernaum, loptejuuh-uv tun maka aalman? Vuálus tun nurdâstuuh, vuálus jämmeiááimu räi!

₁₆»Kote kulá tii, kulá muu, já kote hilgo tii, hilgo muu. Mut kote hilgo muu, hilgo tom, kote lii muu vuolgâttâm.»

₁₇Toh čiččâmlovkyehti máttááttâspärnid maccii áávooin já ettii: »Hiärrá, paas vuoiŋah-uv tottâleh mii, ko mij koččop sii tuu noomâst.» ₁₈Jeesus eeđâi sijjân: »Mun oinim, maht Sáttán roovâi almeest tegu aldâkkâs. ₁₉Naa, mun lam adelâm tijjân vääldi: tij pyehtivetteđ tuolmâđ kuovdijd já skorpionijd já jyehimuđušii vajalii vyeimi, ige tot lammii tii. ₂₀Mut elleđ tast áávvud, et vuoiŋah tottâleh. Ávudiđ tast, et tii noomah láá merkkejum alme kiirján.

₂₁Talle Pase Jieggâ teevdij Jeesus áávooin já sun eeđâi:

»Mun alestâm tuu, Eeči, alme já eennâm Hiärrá, tast, et tun lah piäittám taam jiärmáás já vijses ulmuin, mut lah almottâm tom párnáámielâláid. Näävt tun, Eeči, lah pyerrin uáinám.

₂₂»Puoh lii iäččám adelâm muu haaldun. Ij kihheen eres ko Eeči tieđe, kii Alge lii. Ige tom, kii Eeči lii, tieđe kihheen eres ko Alge já tot, kiäs Alge haalijd suu almottiđ.»

₂₃Jeesus jorgettij máttááttâspárnáidis piälán já eeđâi sijjân sierâ: »Avdâgâsah toh čalmeh, moh uáinih tom, maid tij uáinivetteđ! ₂₄Mun eeđâm tijjân: maaŋgah profeteh já kunâgâsah láá halijdâm uáiniđ tom, maid tij uáinivetteđ, iäge sij lah uáinám, já sij láá halijdâm kuullâđ tom, maid tij kulâvetteđ, iäge sij lah kuullâm.»

₂₅Mottoom laavâmáttáátteijee halijdij keččâlâddâđ Jeesus. Sun koijâdij: »Máttáátteijee, maid mun kolgâččim porgâđ, vâi mun uážuččim nuvâhánnáá eellim?» ₂₆Jeesus eeđâi sunjin: »Maid laahâ toos iätá? Maid tun jieš tobbeen luuvah?» ₂₇Almai västidij: »Räähist Hiärá, Imelâd, ubâ váimustâd já siälustâd, ubâ vuoimijnâd já ubâ ibárdâsâinâd, já jieijâd aldemuu tegu jieijâd-uv.» ₂₈Jeesus västidij: »Riehtâ västidih. Poorgâ näävt, te uážuh eelliđ.»

₂₉Almai halijdij čäittiđ, et sun nuávdit laavâ, já joođhij: »Kii tastoo lii muu aldemus?»

₃₀Jeesus västidij sunjin näävt:

»Mottoom almai lâi jotemin Jerusalemist Jerikon, ko riävvárjuávkku volliittij suu. Riäváreh tolvuu káárvuid-uv suu pajalist já huškuu suu pelijiegân. Talle sij vuolgii kiäinusis já kuođđii almaa toos pelijämmen. ₃₁Siämmáá kiäinu teivâsij jotteeđ pappâ, mut ko sun ooinij almaa, sun čahhij já moonâi lappâd. ₃₂Siämmáánáál toovâi toos teivâsâm leevilâš-uv: Ko sun ooinij almaa, sun še čahhij já juuđij lappâd.

₃₃»Mut talle poođij siämmáá kiäinu mottoom samarialâš. Ko sun poođij toos já ooinij almaa, sun šalligâšâi taam. ₃₄Sun moonâi almaa kuuvl, kulgâttij suu haavijd oljo já viini já čoonâi taid. Tastoo sun luptij almaa fiävrus siälgán, tuálvui suu kyessiviäsun já oonij sust huolâ. ₃₅Čuávuváá iiđeed sun vaaldij pursâstis kyehti deenaar, adelij taid kyessiviäsu išedân já eeđâi: ’Tipšo suu. Jis tunjin šaddeh lasekoloh, te mun máávsám taid, ko mun maacâm.’ ₃₆Kotemuš taan kuulmâ ulmust lâi tuu mielâst rievedum almaa aldemus?»

₃₇Laavâmáttáátteijee västidij: »Tot, kote čaaitij sunjin läđisvuođâ.» Jeesus eeđâi: »Moonâ já poorgâ tun-uv siämmáánáál.»

₃₈Jeesus vajâldij ovdâskulij máttááttâspárnáidiskuin já poođij mottoom siijdân. Tobbeen mottoom nissoon, kiän nommâ lâi Martta, vaaldij suu kyessin. ₃₉Marttaast lâi uábbi, Máárjá. Taat čokánij Hiärá juolgij paaldân já kuldâlij suu sárnum. ₄₀Marttaast lâi ennuv pargo ko sun palvâlij kuosijd, já tondiet sun poođij ettâđ: »Hiärrá, jieh-uv tun ollágin peerust tast, et muu uábbi kuáđá puoh pargoid munjin? Eeđâ sunjin, et sun išedičij muu.» ₄₁Mut Hiärrá västidij: »Martta, Martta, tun anah huolâ já huredah nuuvt maaŋgâin aašijn. ₄₂Tuše ohtâ lii tarbâšlâš. Máárjá lii valjim šiev uási, ige tot valduu sust meddâl.»