Luukas 21

₁Jeesus keejâi uhrečuhe kulij já ooinij riggáid piejâmin toos adalduvâid. ₂Sun ooinij meid, ko mottoom kievhis leskâkálgu piejâi čuukán kyehti uccâ šlanttii. ₃Sun eeđâi: »Tuođâi: taat kievhis leskâ adelij eenâb ko ohtâgin eres. ₄Puoh tuoh iäráseh adelii adalduv lijgestis, mut sun adelij vänistis, puoh maid sun eellim várás tarbâšij.»

₅Ko motomeh lijkkuustellii temppâlân, ton mučij keđgijd já uáinusân pieijum adalduvváid, te Jeesus eeđâi: ₆»Puátá äigi, kuás puoh taat, maid tij tääl keččâvetteđ, kiškoo enâmân. Taas ij pääsi keđgi keeđgi oolâ.»

₇Motomeh koijâdii: »Máttáátteijee, kuás taat puoh tábáhtuvá? Mii lii merkkân tast, et tot äigi lii puátimin?» ₈Jeesus eeđâi: »Váruttiđ, amas tij lappuđ. Maaŋgah puátih muu noomâst já eteh: ’Mun tot lam’, já: ’Äigi lii puáttám.’ Mut elleđ vyelgi sii maŋŋaal. ₉Já ko tij kulâvetteđ soođijn já liävuttesvuođâin, te elleđ iätáduu. Näävt ferttee vistig keevvâđ, mut loppâ ij puáđi vala talle.»

₁₀Já sun joođhij:

»Aalmug vollit aalmug vuástá já väldikodde väldikode vuástá, ₁₁já jyehi kuávlust láá stuorrâ eennâmtuárgástusah, neelgieeti já rottotaavdah. Hirmástuttees ääših tábáhtuveh, já almeest uáinojeh uđđâ ennustâsmeerhah.

₁₂»Mut jo ovdil taam toh vaijeedškyeteh tii já volliitteh tii. Toh tuálvuh tii tuommimnáál synagogáid, tuálvuh tii faŋgâláid, tij karttâvetteđ kunâgâsâi já eennâmhiärái oovdân muu noomâ keežild. ₁₃Näävt tij uážžuvetteđ máhđulâšvuođâ tuođâštiđ must. ₁₄Teddiđ mielân, et tij eppeđ koolgâ muuneeld smiettâđ, maht tij jieijâd piäluštvetteđ. ₁₅Mun adelâm tijjân vijsesvuođâ sárnuđ nuuvt, et ohtâgin tii vuástálistein ij nahcii kieldiđ teikâ toohâđ tuššen tii saanijd.

₁₆»Joba tii vaanhimeh, viiljah, hyelhih já usteveh luovâtteh tii virgeomâháid, já motomeh tist koddojeh. ₁₇Puohah vajedeh tii muu noomâ tiet. ₁₈Mut ohtâgin vuoptâ ij lappuu tii uáivist. ₁₉Pissoođ nanosin, te tij vyeittivetteđ olssâd eellim.

₂₀»Ko tij uáinivetteđ, et suátijuávhuh láá pirâstittám Jerusalem, te talle tij tietivetteđ, et ton tuššâdem lii alda. ₂₁Talle ferttejeh puoh Juudeast ässeeh patâriđ vaarij oolâ. Toh, kiäh láá kaavpugist, kalgeh vyelgiđ tobbeen meddâl, iäge táálunkuávlu ulmuuh koolgâ puáttiđ kaavpugân. ₂₂Tastko toh peeivih láá mavsâttem peeivih: puoh, mii lii čallum, olášuvá. ₂₃Vuoi toh, kiäh láá tuoi peeivij párnáá vuástá teikâ njomâtteh! Taan enâmân šadda stuorrâ eeti, já taam aalmug kuáhtáá vaje. ₂₄Maaŋgah koddojeh miehi teerijn, nubeh tuálvojeh faŋgân puoh aalmugij kooskân, já vieres aalmugeh tyelmih Jerusalem, tassaažân ko adelum äigi tiävá.

₂₅»Piäiváást, máánust já taasnijn uáinojeh meerhah. Meerâ pááruh pávhájeh juulijdmáin, já eennâm alne aalmugeh láá atâštâs já epituáivu vääldist. ₂₆Puoh torgâttuveh paaloost tom vyerdidijn, mii šadda kuáhtáđ olmooškode, tastko alme vyeimih tuárgisteh. ₂₇Talle uáinoo Ulmuu Alge puátimin poolvâ alne stuorrâ vuoimijnis já kirkkâdvuođâinis. ₂₈Ko tuoh tábáhtuseh älgih, pajediđ ruokkâdávt uáivád, tastko tii rijjâvuotâ lii alda.»

₂₉Sun muštâlij sijjân viärdádâs:

»Keččâđ viigunmuorâ, teikâ mon peri muorâ. ₃₀Ko tij uáinivetteđ tom lostâluumin, te tij vissásávt tietivetteđ, et keesi lii jo alda. ₃₁Siämmáánáál ko tij uáinivetteđ taam tábáhtuumin, te tij tietivetteđ, et Immeel väldikodde lii alda. ₃₂Tuođâi: taat suhâpuolvâ ij lappuu ovdilgo puoh taat tábáhtuvá. ₃₃Alme já eennâm láppojeh, mut muu säänih iä lappuu.

₃₄»Anneeđ vaarâ, amas julástâllâm já uáivistvuotâ teikâ jyehipiäiválii eellim huolah čergijduttiđ tii, nuuvt et tot peeivi oolât tii ₃₅tegu koddekielâ. Tom peeivi ij veelti ohtâgin, kote eennâm alne iälá. ₃₆Nuuvtpa pissoođ ovttuu kocemin já ruhâdâllâđ olssâd vyeimi, vâi tij selvâniččijd puoh aašijn, moh kalgeh tábáhtuđ, já vâi tij killááččijd Ulmuu Alge oovdâst.»

₃₇Peeivijd Jeesus máttááttij temppâlist, mut ehidist sun ain vuolgij tobbeen já vietij ijâidis vääri alne, mon kočodeh Oljoväärrin. ₃₈Jo tooláá iđedist aalmug poođij temppâlân Jeesus kuuvl kuldâliđ suu.