Matteus 2

₁Ko Jeesus lâi šoddâm Juudea Betlehemist kunâgâs Herodes ääigi, Jerusalemân pottii nuorttân tietteeh. ₂Sij koijâdii: »Kost tot juudalij kunâgâs lii, kote lii tääl šoddâm? Mij ooinijm suu tääsni paijaanmin aalman já poođijm suu kunnijâttiđ.» ₃Ko kunâgâs Herodes täst kuulâi, sun palaskij já ubâ Jerusalem suin. ₄Sun čokkij aalmug ollâpaapâid já laavâmáttáátteijeid já koijâdâlâi sist, kost Messias koolgâi šoddâđ. ₅»Juudea Betlehemist», sij västidii, »tastko näävt lii almottum proofeet kirjeest:

₇Talle Herodes kočoi syele tietteid jieijâs kuuvl já koijâdâlâi sist tárkká, kuás täsni lâi almostum. ₈Talle sun vuolgâttij sii Betlehemân. »Moonnâđ tohon», sun eeđâi, »já čielgiđ tárkká ääši. Ko tij kavnâvetteđ päärni, te almottiđ munjin, vâi mun-uv puávtáččim puáttiđ suu komerdiđ.» ₉Ko tietteeh lijjii kuullâm kunâgâs saanijd, te sij vuolgii jotteeđ, já täsni, mon sij lijjii uáinám paijaanmin aalman, juuđij sii oovdâst. Ko täsni poođij ton pääihi paajaabel, kost pärni lâi, tot pisánij toos. ₁₀Almaah oinii tääsni, já sij ilosmii čuuvtij. ₁₁Sij monnii táálun já oinii päärni já suu eeni Máárjá. Talle sij enâmân leggistâtmáin komerdii päärni, lekkii čuhijdis já adelii sunjin tivrâs skeeŋkâid: kole, sovčettâs já mirham.

₁₂Naharist Immeel váruttij tietteid monâmist maassâd Herodes kuuvl, já nuuvt sij monnii eres kiäinu mield maassâd eennâmsis.

₁₃Ko tietteeh lijjii vuálgám, te Hiärá eŋgâl almostui naharist Joovsepân já eeđâi: »Paijaan, vääldi päärni já suu eeni miäldásâd já paattâr Egyptân. Oro tobbeen tassaaš ko mun kočom tuu maccâđ. Herodes áigu uuccâđ päärni já koddeđ suu.»

₁₄Joovsep moránij nahhaarstis, vaaldij tállân iho miäldásis päärni já suu eeni já vuolgij jotteeđ Egypt kulij. ₁₅Tobbeen sun oroi Herodes jäämmim räi. Näävt olášui, maid Hiärrá lâi proofeet njalmijn almottâm: »Egyptist mun kuččum algan.»

₁₆Ko Herodes huámášij, et tietteeh lijjii fillim suu, te sun vajaskij. Sun adelij miärádâs, et Betlehemist já ton pirrâsist puoh kyevtihásijd já tast nuorâbijd kandâpárnáid koolgâi koddeđ, ton ääigi mield, mon sun lâi tiettein uážžum. ₁₇Näävt olášui taat proofeet Jeremia celkkim ennustâs:

₁₉Ko Herodes lâi jáámmám, te Hiärá eŋgâl almostui Egyptist Joovsepân naharist ₂₀já eeđâi: »Paijaan, vääldi päärni já suu eeni miäldásâd já maacâ Israel enâmân. Toh, kiäh halijdii koddeđ päärni, láá jáámmám.»

₂₁Joovsep moránij, vaaldij miäldásis päärni já suu eeni já maacâi Israel enâmân. ₂₂Mut ko sun kuulâi, et Juudea kunâgâssân lâi Herodes maŋa puáttám taan alge Arkelaos, te sun ij tuostâm moonnâđ tohon. Ko sun lâi uážžum naharist ravvuu, te sun moonâi Galilean ₂₃já asâttâđâi tobbeen kaavpugân, mon nommâ lii Nasaret. Näävt tábáhtui, vâi olášuuččij profetij ennustâs: suu kalga koččođ Nasaretlâžžân.