Markus 1

₁Ilosaahâ Jeesusist Kristusist, Immeel Algeest, vuolgij joton näävt. ₂Proofeet Jesaja kirjeest iättoo:

₄Já näävt tábáhtui. Juhánâs Kästee kulluuttij ävđinkuávlust, et ulmuuh kolgii jorgettiđ Immeel piälán já väldiđ kaastâ, nuuvt et sudoh adeluuččii sijjân addâgâs. ₅Suu kuuvl pottii maaŋgah jerusalemliih já ulmuuh jyehi kuávlust Juudeast. Sij tubdâstii sudoidis, já Juhánâs kaastij sii Jordanist.

₆Juhánâsâst lâi pajalist kaameelkuolgâpiivtâs já alemis pirrâ nähkipoovij, já suu purrâmâššân lijjii syeiniaččineh já vildâ miäđušijnij mietâ. ₇Sun kulluuttij: »Muu maajeeld puátá sun, kote lii kievrâb ko mun. Mun jiem tuhhii njeeijiđ nuollâđ suu kamuvvuodduidgin. ₈Mun lam kástám tii čassijn, mut sun kástá tii Pase Jieggáin.»

₉Toi peeivij Jeesus poođij Galilea Nasaretist, já Juhánâs kaastij suu Jordanist. ₁₀Čääsist čyežžildijnis Jeesus ooinij, maht almeh lekkâsii já Jieggâ siäivui sunjin tuvváá náál. ₁₁Já oolmijn kullui jienâ: »Tun lah muu rähis Alge, tunjin mun lam mielâstum.» ₁₂Tállân tastmaŋa Jieggâ vuájálitij suu ävđinenâmân. ₁₃Neljilov peivid sun lâi ävđinenâmist, já Sáttán kivsedij suu. Sun eelij vildâ ellei kooskâst, já eŋgâleh onnii sust huolâ.

₁₄Ko Juhánâs lâi fäŋgejum, te Jeesus maacâi Galilean já kulluuttij Immeel ilosaavâ. ₁₅Sun eeđâi: »Lii puáttám äigi, et Immeel väldikodde lii jo alda. Jorgettiđ Immeel piälán já oskođ ilosaavâ!»

₁₆Ko Jeesus juuđij Galileajäävri rido, te sun ooinij Simmoon já taan viiljâ Andârâs. Suoi láin jäävri alne suáppumin viermijd; suoi uáináh láin kuálásteijeeh. ₁₇Jeesus eeđâi sunnui: »Vyelgee muu fáárun. Mun toovâm tunnust ulmui kuálásteijeid.» ₁₈Suoi kuođijn tállân viermijdis já vuolgijn čuávvuđ Jeesus. ₁₉Ko Jeesus lâi jottáám váháš máđháá, te sun ooinij Jáákkup, Sebedeus alge, já suu viiljâ Juhánâs. Suoi-uv láin kárbást, viermijdis kaalgâdmin. ₂₀Jeesus kočoi tállân sunnuu. Suoi kuođijn eejis Sebedeus já taan pálhálijd kárbás já vuolgijn čuávvuđ Jeesus.

₂₁Sij pottii Kapernaumân. Tállân sabattin Jeesus moonâi synagogan já máttááttij. ₂₂Ulmuuh lijjii hiämáskâm suu máttááttâsâst. Sun máttááttij sii tego tot, kiäs lii adelum väldi, ij tego laavâmáttáátteijeeh. ₂₃Kaavpug synagogast lâi eidu talle almai, kiän väividij nyeskis jieggâ. Sun čuárvuškuođij: ₂₄»Maid tun mist táátuh, Jeesus Nasaretlâš? Lah-uv puáttám tuššâdiđ mii? Mun tiäđám, kii tun lah, Immeel Pase! ₂₅Mut Jeesus kočoi jiegâ äŋgiris sanijguin: »Jávuttuu! Vyelgi sust!» ₂₆Talle nyeskis jieggâ čarvij almaa já vuolgij sust korrâ jienáin huihen. ₂₇Puohah hiämáskii já koijâdellii kyeimistis: »Mii taat lii? Taan almast lii väldi máttááttiđ uđđâ vuovvijn! Nyeskis jiegah-uv tottâleh, ko sun koččo.» ₂₈Saahâ sust levânij forgâ jyehi kuávlun, miätá ubâ Galilea.

₂₉Synagogast sij monnii njuolgist Simmoon já Andârâs pááikán. Jáákkup já Juhánâs láin fáárust. ₃₀Simmoon vyene viällái kumestâsâst, já sij muštâlii tom tállân Jeesusân. ₃₁Jeesus moonâi suu kuuvl, vaaldij suu kieđâst já išedij suu čuožâd. Kumestâs vuolgij nisonist, já sun palvâlškuođij kuosijdis.

₃₂Ehidist, piäiváályeštim maŋa Jeesus kuuvl puáhtojii puoh pyecceeh já toh, kiäid paas jiegah väividii. ₃₃Ubâ kaavpug lâi čokkânâm uuvsâ oovdân. ₃₄Sun pyeredij maaŋgâid sierâlágán taavdâin killájeijee ulmuid já vuájálitij maaŋgâid paas jiegâid. Sun ij tiptám jiegâid sárnuđ, tastko toh tubdii suu.

₃₅Tooláá iđedist, ko lâi vala sevŋâd, Jeesus pajanij já vuolgij olgos. Sun moonâi sajan, kost ij lam kihheen, já ruhâdâlâi tobbeen. ₃₆Simmoon já suu skipáreh tomâlii uuccâđ Jeesus ₃₇já kavnii suu. Sij ettii sunjin: »Puohah oceh tuu.» ₃₈Mut Jeesus eeđâi: »Mij vyelgip tääl tääbbin já moonnâp ránnjásijdáid. Mun koolgâm särnidiđ tain-uv, tađe váráshân mun lam puáttám.» ₃₉Nuuvt sun vuolgij já juuđij miätá Galilea, särnidij synagogain já vuájálitij paas jiegâid.

₄₀Jeesus kuuvl poođij spiitaallâš, kote luáštádâđâi idduidis oolâ, táátui sust iše já eeđâi: »Jis tun peri táátuh, te tun puávtáh putestiđ muu.» ₄₁Jeesus šallišij suu. Sun keigij kieđâs, kuoskâttij almaa ja eeđâi: »Mun táátum. Šoodâ putesin!» ₄₂Tavdâ vuolgij almast tállân, já sun šoodâi putesin. ₄₃Jeesus vuolgâttij suu meddâl já váruttij suu korrâsávt: ₄₄»Keejâ, et jieh sáárnu täst oohtângin maiden. Moonâ tuše čäittiđ jieijâd paapân já addel jieijâd putásmem oovdâst tom uhre, mon Mooses lii meridâm, tuođâštussân sijjân.» ₄₅Mut ko sun lâi vuálgám tobbeen, te almai kullutškuođij já leevâtškuođij jyehi kuávlust tiäđu tast, mii lâi tábáhtum, nuuvt et Jeesus ij innig puáhtám almolávt moonnâđ oovtâgin kaavpugân. Sun pisottâlâi kaavpugij ulguubeln asâhánnáá kuávluin, já jyehi kuávlust pottii ulmuuh suu kuuvl.