Markus 3

₁Jeesus moonâi oppeet synagogan. Tobbeen lâi almai, kiän kietâ lâi kuškâm. ₂Fariseuseh onnii čalmeest, pyeredičij-uv Jeesus almaa sabattin, tastko sij aiguu ášáškuttiđ suu. ₃Jeesus eeđâi almai, kiän kietâ lâi kuškâm: »Lavkkii uáinusân», ₄já koijâdij talle fariseusijn: »Kuábáš lii sabattin loválâš, porgâđ pyere vâi porgâđ paa, kááijuđ ulmuu jiegâ vâi koddeđ suu?» Sij iä västidâm maiden. ₅Jeesus kejâstij sijjân suttoost; sun lâi murâšlâš sii korrâ vááimu tiet. Sun eeđâi almai: »Keigii kieđâd.» Almai keigij kieđâs, já tot puáránij. ₆Mut fariseuseh monnii olgos já vuávááškuottii tállân Herodes kyeditteijeiguin, maht sij puávtáččii koddeđ suu.

₇Talle Jeesus sirdâšui oppeet máttááttâspárnáidiskuin jäävri riidon, já tohon čokkânii ennuv ulmuuh. Sij pottii Galileast, Juudeast ₈já Jerusalemist, Idumeast já Jordan tyehin sehe Tyros já Sidon kuávluin. Stuorrâ olmoošjuávhuh pottii suu kuuvl, ko sij kullii, maid puohâid sun poorgâi. ₉Jeesus kočoi máttááttâspárnáidis toollâđ olssis kárbá valmâšin, amas sun pääcciđ olmoošjuávhu juolgijd. ₁₀Sun uáináh lâi pyeredâm maŋgâs, já nuuvt puohah, kiäin lijjii vääivih, pokkiidâttii suu kuuvl ko keččâlii kuoskâttiđ sunjin. ₁₁Ko nyeskis jiegah oinii suu, te toh leggistâttii suu oovdân já čuorvuu: »Tun lah Immeel Alge!» ₁₂Mut sun váruttij äŋgirávt taid muštâlmist, kii sun lâi.

₁₃Talle Jeesus kuárŋui vääri oolâ. Sun kočoi jieijâs kuuvl taid, kiäid sun lâi valjim, já sij vuolgii suu fáárun. ₁₄Taid kyehtnubálovváás Jeesus kočoi leđe jieijâs kulen, vâi sun vuolgâttičij sii särnidiđ já ₁₅adeličij sijjân vääldi vuájálittiđ nyeskis jiegâid: ₁₆Simmoon, kiäs sun adelij noomâ Piättár, ₁₇Jáákkup Sebedeus alge já taan viljâ Juhánâs, kiäid sun adelij noomâ Boanerges – tot meerhâš: äijihjuullân algeh – ₁₈sehe Andârâs, Filippus já Bartolomeus, Matteus, Tyemes já Jáákkup Alfeus alge, Taddeus, Simmoon Kananeus ₁₉já Juudas Iskariot, siämmáš, kote kävildij suu.

₂₀Talle Jeesus maacâi pááikán, já ulmuuh čokkânii vuod nuuvt ennuv, et sun já máttááttâspárnááh iä peessâm purâdiđgin. ₂₁Ko Jeesus hyelhih kullii tast, te sij vuolgii toho viežžâđ suu fárusis, tastko sij jurdii, et sun lâi tájáskâm.

₂₂Mut laavâmáttáátteijeeh, kiäh lijjii puáttám Jerusalemist, ettii: »Sust lii Belsebul. Uáivipahakkâs vuoimijn sun vuájálit nyeskis jiegâid.» ₂₃Talle Jeesus kočoi sii jieijâs kuuvl já sáárnui sijjân viärdádâsâiguin: »Maht Sáttán puáhtá vuájálittiđ Sáttán? ₂₄Jis väldikodde juáhádât já taištâl jieijâs vuástá, te tot ij pyevti cevziđ, ₂₅ige peerâgin ceevzi, jis tom riijdoh pieđgejeh. ₂₆Já jis Sáttán paijaan jieijâs vuástá, te tot ij pyevti cevziđ, pic ton loppâ lii puáttám. ₂₇Ijhân kihheen pyevti pokkiidâttâđ vievsâs almaa táálun já rievediđ suu tävirijd, jis ij vistig čoonâ suu. Eskin talle sun puáhtá rievediđ táálu já tävirijd. ₂₈Tuođâi: Puoh kalgeh adeluđ ulmuid addâgâs, puoh sudoh já pilkkedmeh, maht sij talle pilkkedehkin. ₂₉Mut jis kiinii pilkked Pase Jiegâ, te sun ij uážu kuássin addâgâs pic lii sujâlâš avalii suudon.» ₃₀Sij uáináh lijjii ettâm, et Jeesusist lâi nyeskis jieggâ.

₃₁Jeesus enni já viiljah lijjii puáttám. Sij paccii olgos čuážžuđ já vuolgâttii kiännii viežžâđ suu. ₃₂Suu pirrâ čokkájii ennuv ulmuuh, já sunjin puohtui sääni: »Iännád já tuu viiljah láá tyebbin olgon já sij koijâdeh tuu.» ₃₃Mut Jeesus västidij sijjân: »Kii lii iännám? Kiäh láá muu viiljah?» ₃₄Sun keejâi ulmuid, kiäh čokkájii jyehi saajeest suu pirrâ, já eeđâi: »Taa láá muu enni já viiljah. ₃₅Tot, kote taha Immeel táátu mield, lii muu viljâ já uábbi já enni.»