1. Muitalusaid girji 23

₁Go David lei boarásmuvvan ja beivviin gallánan, de son dagai bártnis Salomo Israela gonagassan. ₂Son čohkkii buot Israela oaivámuččaid, báhpaid ja levilaččaid. ₃Levilaččat geat ledje golbmalogijahkásaččat dahje boarráseappot, lohkkojuvvojedje, ja sii ledje golbmalogigávcciduhát olbmá. ₄Sis guokteloginjealljeduháha galge jođihit Hearrá tempela huksenbarggu, guhttaduháha leat hoavdan ja oaivámužžan, ₅njealljeduháha fáktet uvssaid ja njealljeduháha máidnut Hearrá čuojanasaiguin, maid David lei duddjohan dan várás.

₆David jugii sin golmma juhkosii Levi bártniid Geršona, Kehata ja Merari mielde. ₇Geršona sohkii gulle Ladan ja Šimi. ₈Ladanis ledje golbma bártni, Jehiel gii lei oaivámuš, ja Setam ja Joel. ₉Jehielis ledje golbma bártni, Šelomot, Hasiel ja Haran. Sii ledje Ladana bearrašiid oaivámuččat. ₁₀Šimis ledje njeallje bártni, Jahat, Sisa, Jeuš ja Beria. ₁₁Jahat lei oaivámuš, ja Sisa lei nubbi. Danin go Jeušis ja Berias eai lean máŋga bártni, de sii lohkkojuvvojedje oktan bearašin, oktan juogusin.

₁₂Kehatis ledje njeallje bártni, Amram, Jishar, Hebron ja Ussiel. ₁₃Amrama bártnit ledje Aron ja Moses. Aron ja su bártnit čuldojuvvojedje agálaš áigái vihahit allabasi, cahkkehit suovasoaffara Hearrá muođuid ovddas, bálvalit su ja buressivdnidit álbmoga su nammii. ₁₄Mosesa, Ipmila olbmá, bártnit ledje Geršom ja Elieser; ₁₅soai lohkkojuvvuiga Levi čerdii. ₁₆Geršoma bárdni lei Šubael, oaivámuš. ₁₇Eliesera bárdni lei Rehabja, oaivámuš. Elieseris eai lean eará bártnit, muhto Rehabjas ledje hui ollu bártnit. ₁₈Jishara bárdni lei Šelomot, oaivámuš. ₁₉Hebrona bártnit ledje Jeria, oaivámuš, nubbi Amarja, goalmmát Jahasiel ja njealját Jekamam. ₂₀Ussiela bártnit ledje Mika, oaivámuš, ja nubbi Jiššia.

₂₁Merari bártnit ledje Mahli ja Muši. Mahli bártnit ledje Elasar ja Kiš. ₂₂Go Elasar jámii, de son ii guođđán maŋŋásis bártniid. Sus ledje dušše nieiddat geaid Kiša bártnit, sin vilbealet, válde áhkkán. ₂₃Muši golbma bártni ledje Mahli, Eder ja Jeremot.

₂₄Dát lei logahallan Levi nális, sin bearrašiin ja sohkaoaivámuččain, go sii geahčaduvvojedje ja lohkkojuvvojedje ovttaid ovttaid. Sin bargun lei doaimmahit bálvalusa Hearrá viesus dan rájes go ledje deavdán guoktelogi jagi. ₂₅David dajai: “Hearrá, Israela Ipmil, lea addán álbmogasas mášu, ja son lea ássan Jerusalemii agálaš áigái. ₂₆Dan dihte levilaččat eai dárbbaš šat guoddit goađi ja buot dárbašiid mat adnojuvvojit bálvalusas.” ₂₇Davida maŋimuš daguide gulai lohkat levilaččaid, guoktelogijahkásaččaid ja das boarráseappuid. ₂₈Sin bargun lei veahkehit Arona bártniid Hearrá viesu bálvalusas, gozihit ovdašiljuid ja oalgelanjaid, buhtistit buot bassi biergasiid, veahkehit tempelbálvalusas ₂₉ja atnit fuola oaffarláibbiin, sevlejuvvon jáffuin mat adnojuvvojedje borramušoaffaris, suvrutkeahtes gáhkuin, duolbaláibbiin, duhppojuvvon dáiggis ja vel buot geassomihtuin ja guhkkodatmihtuin. ₃₀Iđidiid ja eahkediid sii galge leat giitimin ja máidnumin Hearrá, ₃₁ja sii galge leat veahkeheamen go Hearrái oaffaruššojuvvojedje boaldinoaffarat sabbahiid, mánočalbmebeaivvi feasttaid ja eará basiid. Sis galge dalle leat čuožžumin Hearrá muođuid ovddas nu máŋggas go lei mearriduvvon. ₃₂Ná sii galge doaimmahit bálvalusa almmustusgoađis ja tempelis ja veahkehit vieljaideaset, Arona bártniid, go sii doaimmahedje bálvalusa Hearrá tempelis.