1. Muitalusaid girji 4

₁Juda bártnit ledje Peres, Hesron, Karmi, Hur ja Šobal. ₂Šobala bárdni Reaja sahkanahtii Jahata, ja Jahat sahkanahtii Ahumai ja Lahada. Dát ledje soralaččaid sogat.

₃Dát leat Etama bártnit: Jisreel, Jišma ja Jidbaš – sin oappá namma lei Haslelponi – ₄ja Penuel, Gedora áhčči ja Eser, Huša áhčči. Dát ledje Hura, Efrata vuosttašriegádeaddji ja Betlehema áhči, bártnit.

₅Ašhuris, Tekoa áhčis, ledje guokte áhká, Hela ja Naara. ₆Naara riegádahtii sutnje Ahussama, Hefera, Temni ja Ahaštara. Dát ledje Naara bártnit. ₇Hela bártnit ledje Seret, Sohar, Etnan ja Kos. ₈Kos sahkanahtii Anuba ja Hassobeba ja lei daid sogaid máddu mat surggiidedje Aharhelis, Haruma bártnis.

₉Jabes adnojuvvui alit árvvus go su vieljat. Su eadni gohčui su Jabesin ja dajai: “Mun riegádahtten su bákčasiin.” ₁₀Jabes čuorvvui Israela Ipmila ja dajai: “Vare don buressivdnidivččet mu ja viiddidivččet mu eatnama, divttášit iežat gieđa doarjut mu ja vealtadivččet mu lihkuhisvuođas ja bákčasis.” Ja Ipmil ollašuhtii dan maid son ánuhii.

₁₁Kelub, Šuha viellja, sahkanahtii Mehira, Eštona áhči. ₁₂Ešton sahkanahtii Bet-Rafa, Paseaha ja Tehinna, Ir-Nahaša áhči. Dát ledje rekalaččat.

₁₃Kenasa bártnit ledje Otniel ja Seraja, ja Otniela bártnit ledje Hatat ja Meonotai. ₁₄Meonotai sahkanahtii Ofra, ja Seraja sahkanahtii Joaba, Ge-Harašima soga máttu; sii ledje duojárat. ₁₅Kaleba, Jefunne bártni, bártnit ledje Ir, Ela ja Naam, ja Ela bárdni lei Kenas.

₁₆Jehallelela bártnit ledje Sif, Sifa, Tirja ja Asarel.

₁₇Esra bártnit ledje Jeter, Mered, Efer ja Jalon. Jeter sahkanahtii Mirjama, Šammaja ja Jišbaha, Eštemoa áhči. ₁₈Su áhkká gii gulai Juda čerdii, riegádahtii Jereda, Gedora áhči, Hebera, Soko áhči, ja Jekutiela, Sanoaha áhči. Meredis ledje bártnit maiddái farao nieiddain Bitjain, gean son lei váldán áhkkán. ₁₉Hodia lei váldán áhkkán Nahama oappá, ja su bártnit ledje garemlaš Delia, Keila áhčči, ja maakalaš Eštemoa.

₂₀Šimona bártnit ledje Amnon, Rinna, Ben-Hanan ja Tilon. Jiši bárdni lei Sohet.

₂₁Juda bártni Šela nális ledje Er, Leka áhčči, Lada, Mareša áhčči, ja Bet-Ašbea liidnegođđiid sogat, ₂₂ja maiddái Jokim ja Koseba olbmát ja Joaš ja Saraf geat ledje ássan Moabis ja dasto máhccan Betlehemii. Dát leat dološ muitalusat. ₂₃Sii ledje láirálihttedahkkit. Sii ásse Netaimis ja Gederas ja barge gonagasa bálvaleaddjin.

₂₄Simeona bártnit ledje Nemuel, Jamin, Jarib, Serah ja Saul. ₂₅Saula bárdni lei Šallum, su bárdni Mibsam ja su Mišma. ₂₆Mišma bártnit ledje Hammuel, Sakkur ja Šimi. ₂₇Šimis ledje guhttanuppelohkái bártni ja guhtta nieidda, muhto su vieljain eai lean máŋga máná. Danin sin sohka ii šaddan nu stuorisin go Juda sohka. ₂₈Sii ásse Beer Šebas, Moladas ja Hasar Šualis, ₂₉Bilhas, Esemis ja Toladis, ₃₀Betuelis, Hormas ja Siklagis, ₃₁Bet-Markabotis, Hasar Susimis, Bet-Biris ja Šaarajimis. Dát ledje sin gávpogat gitta dassážii go David šattai gonagassan, ₃₂ja sin ledje maiddái daid birasbáikkit. Sii ásse maiddái Etamis, Ajinis, Rimmonis, Tokenis ja Ašanis, dán viđa gávpogis, ₃₃ja buot dain báikkiin mat ledje daid gávpogiid birra, gitta Baala rádjái. Dát ledje sin ássanbáikkit, ja dát lei sin sohkalogahallan. ₃₄Mešobab, Jamlek ja Joša, Amasja bárdni, ₃₅Joel, Jehu – su áhčči lei Jošibja, su Seraja, su Asiel; ₃₆viidáseappot Eljoenai, Jaakoba, Ješohaja, Asaja, Adiel, Jesimiel, Benaja ₃₇ja Sisa – su áhčči lei Šifi, su áhčči Allon, su Jedaja, su Šimri, su Šemaja. ₃₈Dás namahuvvon olbmát ledje sogaideaset oaivámuččat, ja sin bearrašat sturro sakka. ₃₉Danin sii vulge Gedora guvlui, leagi nuorttabeallái, ohcat guohtuneatnamiid smávvaomiidasaset. ₄₀Doppe sii gávdne šattolaš ja buriid guohtuneatnamiid. Eanan lei viiddis, ja doppe lei jaskat ja muossái. Dat geat ásse doppe ovdal, ledje hamlaččat.

₄₁Dat geaid namat leat dása čállojuvvon, bohte dan áigge go Hiskia lei Juda gonagassan, ja sii billistedje hamlaččaid gođiid ja ássanbáikkiid mat doppe ledje. Sii duššadedje sin ja ásse sin eatnamii, danin go doppe lei guohtuneanan smávvaomiide. ₄₂Muhtumat sis, vihttačuođi Simeona čeardda olbmá, manne Seira várreeatnamii, ja sin njunnošis ledje Jiši bártnit Pelatja, Nearja, Refaja ja Ussiel. ₄₃Sii duššadedje maŋimus amaleklaččaid bázahasa ja ásset doppe veláge.