1. Samuelgirji 13

₁Saul lei golbmalogijahkásaš go šattai gonagassan, ja son ráđđii Israela guokte jagi. ₂Saul válljii israellaččain golbmaduhát olbmá ja doalai dain guokteduháha iežas luhtte Mikmasis ja Betela várreeatnamis. Duhát olbmá ledje Jonatana luhtte Benjamina Gibeas. Earrásiid soahteveagas Saul vuolggahii ruoktot.

₃ Jonatan gottii Gebas filistalaččaid fálddi, ja filistalaččat gulle dan. Saul bosadahtii dorvve miehtá eatnama ja cealkkihii: “Gulloset hebrealaččat dán!” ₄Nu oppa Israel gulai ahte Saul lei goddán filistalaččaid fálddi, ja ahte filistalaččat ledje vašáskan Israelii. Álbmot gohčohalai Saula lusa Gilgalii, ₅ja filistalaččat čoagganedje soahtat Israeliin. Sis ledje golmmatduháhat soahtevovnnat ja guhttaduhát vovdnaolbmá, ja vázzi veahka dego áhpegátti sáttočalmmit. Sii bohte ja luoitaledje Mikmasa gurrii, Bet-Avena nuortalii. ₆Go israellaččat fuobmájedje ahte sii leat heađis, de sii čiehkádalle hoaluide, biejuide, bákteskoaruide, gealláriidda ja arvegáivvuide, ₇ja muhtumatgis manne Jordana rastá Gada ja Gileada eatnamii.

Saul lei ain Gilgalis, ja buohkat geat ledje suinna, doarggistedje balus. ₈Son vurddii čieža beaivvi, dan áiggi maid Samuel lei mearridan. Muhto Samuel ii boahtánge Gilgalii, ja álbmot guođđigođii Saula ja bieđganišgođii. ₉Dalle Saul gohčui buktit boaldinoaffara ja searvevuođaoaffariid, ja son oaffarušai boaldinoaffara. ₁₀Aiddo go son lei geargan oaffaruššamis, de Samuel bođii. Saul manai su ovddal dearvvahit su. ₁₁Samuel dajai: “Maid don leat dahkan?” Saul vástidii: “Mun oidnen ahte álbmot guođđigođii mu ja bieđganišgođii, itge don lean boahtán mearreáigái. Filistalaččat ledje juo čoagganan Mikmasii, ₁₂ja mun jurddašin: Dál filistalaččat njidjet fallehit mu Gilgalis, inge mun leat vel háhppehan soažžudit Hearrá. Dalle mun roahkadin oaffaruššat boaldinoaffara.” ₁₃Samuel dajai Saulii: “Don leat meannudan jierpmeheamit. Jos don livččet jeagadan Hearrá, du Ipmila, gohččuma, de Hearrá livččii nannen du gonagasvuođa Israelis agálaš áigái. ₁₄Muhto dál du gonagasvuohta ii biso. Hearrá lea ohcan olbmá gii lea su miela mielde ja mearridan su iežas álbmoga oaivámužžan, danin go don it jeagadan Hearrá gohččuma.”

₁₅De Samuel vulggii Gilgalis. Dat geat ledje báhcán álbmogis, vulge Sauliin ja manne Gilgalis Benjamina Gibeai. Saul geahčadii olbmáid geat ledje su luhtte, ja dat ledje sullii guhttačuođi. ₁₆Saul ja su bárdni Jonatan ja dat olbmát geat ledje sudno luhtte, ledje dál Benjamina Gebas, ja filistalaččat ledje luoitalan Mikmasii. ₁₇Filistalaččaid siiddas vulge golbma speadjárjoavkku: Okta manai Ofra guvlui Šuala eatnamii, ₁₈nubbi Bet-Horona guvlui ja goalmmátgis dan eatnamii mii badjána Seboimleagis meahci guvlui.

₁₉Daid áiggiid oppa Israela eatnamis ii lean oktage rávdi, danin go filistalaččat dáhtto hehttet hebrealaččaid dahkamis mihkiid ja sáittiid. ₂₀Dan dihte israellaččat fertejedje mannat filistalaččaid lusa dáguhit ploganiibbi dahje guohki, ákšu dahje biikasoappi. ₂₁Haddi lei guokte šekelgoalmmádasa ploganiibbis ja guohkis ja šekelgoalmmádas ákšus ja biikasoappis. ₂₂Go soahti de buollái, de ii lean ovttage Saula ja Jonatana olbmás miehkki iige sáiti. Dušše Saulis ja Jonatanis ledje vearjjut.

₂₃Filistalaččaid ovdajoavku lei boahtán Mikmasa várregaskka rádjái.