1. Samuelgirji 21

₁David manai báhppa Ahimeleka lusa Nobii. Ahimelek bođii su ovddal leaboheapmin ja jearai: “Manin don leat okto? Manin dus ii leat oktage fárus?” ₂David vástidii: “Gonagas vuolggahii mu mohkkái, ja son gilddii mu muitaleames geasage makkár mohkkái son lea mu vuolggahan ja maid mun galggan dahkat. Mun lean muitalan olbmáidasan gos mii deaivvadit. ₃Jos dus deaivá leat biebmu sadjosis, de atte munnje vihtta láibbi dahje mii dáppe juo leažžá.” ₄Báhppa dajai Davidii: “Mus ii leat dábálaš láibi, dušše bassi láibi – go fal du olbmát eai leat guoskan nissoniidda.” ₅David vástidii: “Eai leat, nissonat leat leamaš earuhuvvon mis, nugo álo go mun lean vuolgán soahtái. Ja jos olbmáid gálvvut juo dábálaččat leat basuhuvvon, de dat leat velá eambbo basuhuvvon odne.” ₆Dalle báhppa attii sutnje bassi láibbi, danin go das ii lean eará láibi go oaffarláibbit mat ledje váldojuvvon Hearrá muođuid ovddas dalle go varas láibbit ledje biddjojuvvon daid sadjái. ₇Doppe lei dan beaivvi Hearrá muođuid ovddas okta Saula olbmáin, edomlaš Doeg, gii lei Saula guođoheddjiid oaivámuš. ₈David jearai Ahimelekis: “Almma dus lea sáiti dahje miehkki dáppe? Mun in fidnen fárrui miehki inge eará vearjjuid, danin go gonagasa áššis lei nu hoahppu.” ₉Báhppa vástidii: “Dáppe lea filistalaš Goljata miehkki, dan olbmá gean don goddet Elaleagis. Dat lea efoda duohken biktasii gissojuvvon. Váldde dan, jos dáhtut. Eará miehkki dáppe ii leat.” David dajai: “Ii leat nubbi dan veardásaš! Atte dan munnje.”

₁₀Seammá beaivvi David báhtarii ain Saulis ja manai Akiša, Gata gonagasa, lusa. ₁₁Akiša olbmát dadje gonagassaseaset: “Almma dát lea David, dan eatnama gonagas? Suhan nissonat dánsedettiin rámidedje: Saul časkkii duháhiid, David logiidduháhiid.” ₁₂David gulai maid sii dadje, ja son ballái sakka Akišis, Gata gonagasas. ₁₃Danin son dahkaluttai mielaheapmin ja bieđai go sii lahkanedje sutnje, cázodii gávpotpoartta uvssaide ja divttii solssiid golgat skávžžáidis sisa. ₁₄Akiš dajai olbmáidasas: “Diihan oaidnibehtet ahte olmmái lea mielaheapme. Manne dii buvttiidet su mu lusa? ₁₅Váilotgo mus mielaheamit, go juo suge buvttiidet deike seahkidit mu ovdii? Galggašin go mun dakkára luoitit vissosan?”