1. Samuelgirji 30

₁Ovdal go David ja su olbmát guovtte beaivvi geažes ollejedje Siklagii, de amaleklaččat ledje fallehan Negeva ja Siklaga, váldán Siklaga ja boaldán dan. ₂Nissoniid ja buot earáid geat doppe ledje, sii ledje váldán fáŋgan, sihke smávváid ja stuorráid. Sii eai lean goddán ovttage, muhto ledje váldán sin mielddiset ja de mannan. ₃Go David ja su olbmát bohte Siklagii, de gávpot lei boldojuvvon ja sin áhkát, bártnit ja nieiddat ledje dolvojuvvon. ₄Dalle David ja su olbmát čirrojedje ja čirro dassážii go eai šat nagodan čierrut. ₅Maiddái Davida guktot áhkát, jisreellaš Ahinoam ja Abigajil, karmellaš Nabala leaska, leigga váldojuvvon fáŋgan. ₆David lei stuorra heađis: Olbmát áigo geađgádit su, danin go sii ledje moaráhuvvan bártniideaset ja nieiddaideaset dihte. Muhto David ozai fámu Hearrás, Ipmilisttis. ₇Son dajai báhppa Abjatarii, Ahimeleka bárdnái: “Buvtte efoda!” Abjatar buvttii efoda Davidii, ₈ja David jearai Hearrás: “Galggango mun doarridit dan rievvárjoavkku? Juvssango mun sin?” Hearrá vástidii: “Vuolgge doarridit sin! Don juvssat sin ja gájut fáŋggaid.”

₉Dalle David ja su guhttačuođi olbmá vulge ja bohte Besorjoga gáddái, ja muhtimat báhce dasa. ₁₀David doarridii vašálačča njeljiinčuđiin olbmáin, muhto guoktečuođi ledje menddo vuoimmeheamit rasttildit joga, ja sii fertejedje orustit.

₁₁Meahcis olbmát deive egyptalaš olbmá. Sii bukte su Davida lusa ja adde sutnje láibbi borrat ja čázi juhkat. ₁₂Go son lei vel borran fiikongáhkkobihtá ja guokte rusingáhku, de son vuoimmáiduvai; son oainnat ii lean muosáhan borramuša iige juhkan golmma beaivái iige golmma idjii. ₁₃David jearai sus: “Geasa don gulat, ja gos don boađát?” Olmmái vástidii: “Mun lean egyptalaš ja muhtun amaleklačča šlávva. Mu hearrá guđii mu go mun buohccájin golbma beaivvi dás ovdal. ₁₄Mii speajaimet keretlaččaid Negeva, Juda Negeva ja kaleblaččaid Negeva ja bolddiimet Siklaga.” ₁₅David jearai: “Ofelasttátgo mu dan rievvárjoavkku lusa?” Olmmái vástidii: “Vuortno munnje Ipmila nammii ahte it gotte mu itge atte mu mu hearrá gihtii, de mun ofelasttán du dan rievvárjoavkku lusa.” ₁₆Go son lei ofelastán Davida dohko, de doppe sii oidne amaleklaččaid velohallamin juohke sajis. Sii ledje borramin ja juhkamin ja ávvudeamen dan stuorra sállaša maid ledje váldán filistalaččaid eatnamis ja Judas. ₁₇David fallehii sin iđedisveaiggi ja gottii sin gitta eahkeda rádjái. Ii oktage beassan báhtui, earret njeallječuođi nuorra olbmá geat njuikejedje kamelaid čielgái ja báhtaredje.

₁₈David gájui buot maid amaleklaččat ledje váldán, ja son gájui maiddái áhkásguovtto. ₁₉Ii oktage váilon, ii smávis iige stuoris, eai bártnit eaige nieiddat, ii mihkkege sállašis iige das mii lei rieviduvvon; David buvttii ruoktot buot. ₂₀Son válddii maid buot smávvaomiid ja stuorraomiid. Dat geat vuojehedje omiid, čurvo: “Dát lea Davida sálaš!”

₂₁Go David máhcai dan guoktečuohtása lusa geat ledje leamaš menddo vuoimmeheamit čuovvut su ja geaid son lei guođđán Besorjoga gáddái, de sii bohte su ja su olbmáid ovddal. David manai olbmáidisguin sin lusa ja dearvvahii sin ustitlaččat, ₂₂muhto muhtin bahás ja suohpáhis olbmát geat ledje Davida fárus, čurvo: “Go juo sii eai vuolgán minguin, de mii eat atte sidjiide oasi dan sállašis maid mii gájuimet. Váldoset áhkáset ja mánáideaset ja mannoset geidnoseaset!” ₂₃David dajai sidjiide: “Ii nu, vieljaidan! Dii ehpet oaččo nu dahkat dainna maid Hearrá lea addán midjiide. Son lea várjalan min ja addán min gihtii rievváriid geat ledje fallehan min. ₂₄Gii berošta das maid dii dadjabehtet? Dat gii orru gálvvuid luhtte galgá oažžut seammá oasi go dat gii manná soahtat. Buohkat galget oažžut oasiset.” ₂₅Dan beaivvi David dagai dan njuolggadussan ja oaivadussan Israelis, ja nu dat lea velá odnege.

₂₆Go David lei ollen Siklagii, de son vuolggahii osiid sállašis Juda vuorrasiidda, iežas čeardda olbmuide, ja cealkkihii: “Dá lea didjiide attáldat, oassi dan sállašis maid mun válden Hearrá vašálaččain.” ₂₇Son vuolggahii attáldagaid daidda geat ásse Betelis, Ramotis Negevis, Jattiris, ₂₈Aroeris, Sifmotis, Eštemoas ₂₉ja Rakalis, daidda geat ásse jerahmeellaččaid ja kenlaččaid gávpogiin, ₃₀Hormas, Bor-Ašanis, Atakis ₃₁ja Hebronis ja buot báikkiin gos son lei vádjolan olbmáidisguin.