1. Samuelgirji 8

₁Go Samuel boarásmuvai, de son bijai bártnisguoktá Israela duopmárin. ₂Vuosttašriegádeaddji namma lei Joel ja nuorabu Abia; soai dubmiiga Beer Šebas. ₃Samuela bártnit eaba goit vádjolan áhčiska luottaid, muhto verrošeigga, válddiiga duolgguid ja bonjaiga vuoigatvuođa. ₄Dalle Israela vuorrasat čoagganedje ja bohte Samuela lusa Ramai. ₅Sii dadje sutnje: “Don leat boaris, eabage du bártnit vádjol du luottaid. Atte midjiide gonagasa dubmet min, buot eará álbmogiinhan lea gonagas.” ₆Samuel anii bahán dan ahte sii dáhtto gonagasa. Ja son rohkadalai Hearrá. ₇Muhto Hearrá vástidii sutnje: “Daga nugo álbmot dáhttu. Eai sii du leat hilgon, muhto mu. Sii eai dáhto mu iežaset gonagassan. ₈Dan beaivvi rájes go mun bukten sin Egyptas, de sii leat duojážassii jorgalan mus ja bálvalan eará ipmiliid. Dan sii dahket dál dutnjenai. ₉Daga nugo sii dáhttot, muhto várre sin ja muital sidjiide makkár vuoigatvuođaid sin gonagasas oažžu.”

₁₀Samuel muitalii Hearrá sániid daidda geat dáhtto gonagasa. ₁₁Son dajai: “Gonagas gii ráđđe din, oažžu dáid vuoigatvuođaid: Son váldá din bártniid ja bidjá sin soahtevovnnaidis gurrii ja heasttaidis báldii, ja sii šaddet viehkat su soahtevovnnaid ovddas. ₁₂Soapmásiid son bidjá duháhaoaivámužžan dahje vihttalohkásaoaivámužžan. Muhtumat gártet jorgut su bealdduid ja rádjat su šattuid, earát šaddet duddjot sutnje vearjjuid ja soahtevovnnaid. ₁₃Din nieiddaid son bidjá ráhkadit vuoidasiid, málestit ja láibut. ₁₄Son váldá din buoremus bealdduid, viidnegárddiid ja oliivagárddiid ja addá daid iežas virgeolbmáide. ₁₅Son gáibida logádasaid din šattuin ja din viinnis ja addá daid iežas hoavvaolbmáide ja virgeolbmáide. ₁₆Son váldá din bálvaleddjiid ja din bálvaleaddjinissoniid, ja din buoremus vuovssáid ja áseniid son atná iežas bargguide. ₁₇Son váldá logádasaid din smávvaomiin, ja ieža dii šaddabehtet su šlávvan. ₁₈Go dát dáhpáhuvvá, de dii bárgubehtet dan gonagasa dihte gean lehpet válljen alcceseattet, muhto dalle Hearrá ii vástit didjiide.” ₁₉Muhto álbmot biehttalii gullamis Samuela. Sii dadje: “Ii, mii dáhttut gonagasa ₂₀vai mii leat dego buot eará álbmogat, gonagasa gii dubme min, gii manná min njunnošis ja soahtá min sođiid.” ₂₁Go Samuel gulai álbmoga sániid, de son muitalii dan Hearrái. ₂₂Hearrá celkkii Samuelii: “Daga nugo sii dáhttot ja atte sidjiide gonagasa.” Dalle Samuel gohčui israellaččaid máhccat ruoktot, iešguđege gávpogasas.