1. Tessalonika 3

₁Dan dihte, go mii eat sáhttán gierdat dan guhkit, de mii mearrideimmet ieža báhcit Atenii ₂ja vuolggaheimmet din lusa vielljamet Timoteusa, Ipmila bargoguoimmi Kristusa evangeliuma bálvalusas. Son galggai arvvosmahttit din ja nannet din oskku, ₃amas oktage jorralit vaikko dii áŧestuvvobehtet. Diihan ieža diehtibehtet ahte dát leat biddjojuvvon min ala. ₄Juo dalle go mii leimmet din luhtte, mii dajaimet ahte šaddat gillát áŧestusaid. Ja nu leage geavvan, nugo diehtibehtet. ₅Danin in munge gierdan vuordit šat guhkit, muhto vuolggahin Timoteusa din lusa gávnnahit mo din oskkudilli lea. Mun ballen ahte geahččaleaddji lea beassan fillet din ja min bargu manná duššás.

₆Muhto dál Timoteus lea aiddo máhccan din luhtte ja buktán buriid ságaid din oskkus ja ráhkisvuođas. Son muitalii ahte dii álelassii atnibehtet min ustitlaš muittus ja háliduvvabehtet oaidnit min, nugo miigis din. ₇Ná dii, vieljažiiddán, lehpet iežadet oskkuin arvvosmahttán min buot min áŧestusain ja heđiin. ₈Dál mii sáhttit fas eallit, jos dii bissubehtet nanusin Hearrás. ₉Mo mii máhttit doarvái giitit Ipmila dis ja buot dan ilus maid mii dovdat Ipmila muođuid ovddas din dihte? ₁₀Ija beaivvi mii oppa váimmus átnut beassat oaidnalit dinguin ja addit didjiide dan mii velá váilu din oskkus. ₁₁Vare ieš Ipmil, min Áhčči, ja Hearrámet Jesus doalašii midjiide geainnu rabasin din lusa! ₁₂Ja vare Hearrá lasihivččii ja riggudahtášii din ráhkisvuođa guhtet guimmiidasadet ja buohkaide, nugo miige ráhkistit din, ₁₃ja nannešii din váimmu, vai livččiidet basit ja láitemeahttumat min Ipmila ja Áhči ovddas, go min Hearrá Jesus boahtá buot basiiguin. Amen.