2. Gonagasaid girji 15

₁Asarja, Amasja bárdni, šattai Juda gonagassan Israela gonagasa Jeroboama guoktelogičihččet ráđđenjagi. ₂Son lei guhttanuppelotjahkásaš go šattai gonagassan, ja son ráđđii Jerusalemis vihttalogiguokte jagi. Su eadni lei jerusalemlaš Jekolja. ₃Son dagai dan mii lea riekta Hearrá čalmmiin, nugo su áhčči Amasja lei dahkan. ₄Oaffarbáikkit dattetge eai jávkaduvvon, ja álbmot ain oaffarušai ja bolddii suovvasiid oaffarbáikkiin. ₅Hearrá časkkii gonagasa spihtáldávddain nu ahte son buozai gitta jápminbeaivvis rádjái ja fertii ássat sierra viesus. Su bárdni Jotam gii lei šloahta oaivámuš, stivrii eatnama.

₆Mii muđui lea muitalit Asarjas ja buot su daguin, lea čállojuvvon Juda gonagasaid muitalusaid girjái. ₇Asarja manai vuoiŋŋadit áhčiidis lusa ja hávdáduvvui áhčiidis báldii Davida gávpogii. Su maŋŋil gonagassan šattai su bárdni Jotam.

₈Juda gonagasa Asarja golbmalogigávccát ráđđenjagi Israela gonagassan šattai Sakarja, Jeroboama bárdni. Son ráđđii Samarias guhtta mánu. ₉Son dagai dan mii lea bahá Hearrá čalmmiin, nugo su áhčitge ledje dahkan. Son ii gáidan Jeroboama, Nebata bártni, suttuin maiguin son lei fillen Israela suddudit. ₁₀Šallum, Jabeša bárdni, dagai suollemas lihtu gonagasa vuostá. Son časkkii Sakarja jámas Jibleamis ja šattai gonagassan su sadjái.

₁₁Mii muđui lea muitalit Sakarjas, lea čállojuvvon Israela gonagasaid muitalusaid girjái. ₁₂Nu ollašuvai dat maid Hearrá lei sárdnon Jehui: “Du bártnit ožžot čohkkát Israela truvnnus gitta njealját bulvii.”

₁₃Šallum, Jabeša bárdni, šattai gonagassan Juda gonagasa Ussia golbmalogiovccát ráđđenjagi, ja son ráđđii Samarias mánotbaji. ₁₄Menahem, Gadi bárdni, vulggii Tirsas ja bođii Samariai. Doppe son časkkii jámas Šalluma, Jabeša bártni, ja šattai gonagassan su sadjái.

₁₅Mii muđui lea muitalit Šallumis ja suollemas lihtus maid son dagai, lea čállojuvvon Israela gonagasaid muitalusaid girjái.

₁₆Menahem duššadii Tappuaha ja buot mii doppe lei, ja maiddái dan birasguovllu gitta Tirsa rádjái, danne go gávpot ii rahpan sutnje poarttaid, ja luddii buot dan áhpehis nissoniid.

₁₇Menahem, Gadi bárdni, šattai Israela gonagassan Juda gonagasa Asarja golbmalogiovccát ráđđenjagi. Son ráđđii Samarias logi jagi. ₁₈Son dagai dan mii lea bahá Hearrá čalmmiin. Oppa eallináiggistis son ii gáidan dain suttuin maiguin Jeroboam, Nebata bárdni, lei fillen Israela suddudit. ₁₉Go Assyria gonagas Pul fallehii eatnama, de Menahem attii sutnje duhát silbataleantta, vai son doalašii su beali ja nannešii su gonagasválddi. ₂₀Menahem gáibidii silbba buot Israela jábálaš olbmáin, nu ahte juohkehaš šattai máksit Assyria gonagassii vihttalogi silbašekela. ₂₁De Assyria gonagas vulggii ruoktot iige šat báhcán eatnamii.

Mii muđui lea muitalit Menahemis, lea čállojuvvon Israela gonagasaid muitalusaid girjái. ₂₂Menahem manai vuoiŋŋadit áhčiidis lusa, ja su maŋŋil šattai gonagassan su bárdni Pekahja.

₂₃Pekahja, Menahema bárdni, šattai Israela gonagassan Juda gonagasa Asarja vihttalogát ráđđenjagi, ja son ráđđii Samarias guokte jagi. ₂₄Son dagai dan mii lea bahá Hearrá čalmmiin. Son ii gáidan dain suttuin maiguin Jeroboam, Nebata bárdni, lei fillen Israela suddudit. ₂₅Su vovdnasoahteolmmái Pekah, Remalja bárdni, dagai suollemas lihtu su vuostá ja gottii su Samarias gonagasa šloahta tordnii; sus ledje mielde vihttalogi olbmá Gileadis. Go son lei goddán Pekahja, de son šattai gonagassan su sadjái.

₂₆Mii muđui lea muitalit Pekahjas ja su daguin, lea čállojuvvon Israela gonagasaid muitalusaid girjái.

₂₇Pekah, Remalja bárdni, šattai Israela gonagassan Juda gonagasa Asarja vihttaloginuppi ráđđenjagi. Son ráđđii Samarias guoktelogi jagi. ₂₈Son dagai dan mii lea bahá Hearrá čalmmiin. Son ii gáidan dain suttuin maiguin Jeroboam, Nebata bárdni, lei fillen Israela suddudit. ₂₉Israela gonagasa Pekaha áigge fallehii eatnamii Tiglat-Pileser, Assyria gonagas, ja válddii Ijona, Abel Bet-Maaka, Janoaha, Kedeša, Hasora, Gileada ja Galilea, oppa Naftali čeardda eatnama, ja doalvvui olbmuid Assyriai. ₃₀Hosea, Ela bárdni, dagai suollemas lihtu Pekaha, Remalja bártni, vuostá. Son časkkii Pekaha jámas ja šattai su sadjái gonagassan Jotama, Ussia bártni, guoktelogát ráđđenjagi. ₃₁Mii muđui lea muitalit Pekahis ja su daguin, lea čállojuvvon Israela gonagasaid muitalusaid girjái.

₃₂Jotam, Ussia bárdni, šattai Juda gonagassan Israela gonagasa Pekaha, Remalja bártni, nuppi ráđđenjagi. ₃₃Son lei guoktelogiviđajahkásaš go šattai gonagassan, ja son ráđđii Jerusalemis guhttanuppelohkái jagi. Su eadni lei Jeruša, Sadoka nieida. ₃₄Jotam dagai dan mii lea riekta Hearrá čalmmiin, áibbas nugo su áhčči Ussia lei dahkan. ₃₅Oaffarbáikkit eai dattetge jávkaduvvon, ja álbmot ain oaffarušai ja bolddii suovvasiid oaffarbáikkiin. Jotam huksii Hearrá tempelii Bajitpoartta.

₃₆Mii muđui lea muitalit Jotamis ja buot su daguin, lea čállojuvvon Juda gonagasaid muitalusaid girjái. ₃₇Daid áiggiid Hearrá vuolggahii Juda vuostái Arama gonagasa Resina ja Pekaha, Remalja bártni. ₃₈Jotam manai vuoiŋŋadit áhčiidis lusa, ja son hávdáduvvui áhčiidis báldii Davida gávpogii. Su maŋŋil šattai gonagassan su bárdni Ahas.