2. Peter 1

₁Simon Peter, Jesus Kristusa bálvaleaddji ja apostal, dearvvaha din geaidda min Ipmil ja Beasti Jesus Kristus vanhurskkisvuođastis lea addán seammá mávssolaš oskku go midjiide.

₂Šaddos din oassin ain valljugasabun árbmu ja ráfi maid Ipmila ja Hearrámet Jesusa dovdamuš addá!

₃Su ipmilvuođa fápmu lea addán midjiide buot mii doalvu eallimii ja ipmilballui. Miihan leat šaddan dovdat su gii lea rávkan min hearvásvuođainis ja fámuinis. ₄Son lea addán midjiide stuorra ja mávssolaš lohpádusaid, vai dii daid vehkiin beassabehtet báhtarit heavahusas maid anistumit duddjojit máilmmis, ja beassabehtet oasálažžan ipmilvuođa luonddus.

₅Vigget dan dihte áŋgirit čájehit oskkus gievravuođa, gievravuođas dieđu, ₆dieđus mearálašvuođa, mearálašvuođas gierdavašvuođa, gierdavašvuođas ipmilbalu, ₇ipmilbalus vieljalaš ráhkisvuođa, vieljalaš ráhkisvuođas gaskavuođa ráhkisvuođa. ₈Jos dis leat buot dát ja dat ain eatnánit, de dat eai divtte din leat joavdelassan ja šattoheapmin Hearrámet Jesus Kristusa dovdamušas. ₉Muhto dat geas buot dát váilot, lea lahkaoaidnil, beanta čuovggaheapme. Son lea vajáldahttán ahte lea ovtta gearddi buhtistuvvon ovddeš suttuinis.

₁₀Dan dihte, vieljažiiddán, barget ain áŋgireappot nannet iežadet rávkojumi ja válljejumi. Jos dii dan dahkabehtet, de ehpet goassege jorral, ₁₁ja dii beassabehtet friddja mannat rabastuvvon uvssas Hearrámet ja Beastámet Jesus Kristusa agálaš riikii.

₁₂Dan dihte mun dáhtun álohii muittuhit didjiide buot dáid áššiid, vaikko dii daid gal dovdabehtet ja bissubehtet suoibbokeahttá dan duohtavuođas mii didjiide lea addojuvvon. ₁₃Mu anán vuoigadin iežan muittuhusaiguin boktalit din nu guhká go ásan dán eatnanlaš goađis. ₁₄Mun oainnat dieđán ahte mu goađi gaikun lea fargga joavdamin, dan min Hearrá Jesus Kristus lea munnje almmuhan. ₁₅Danin mun dáhtun atnit fuola das ahte dii maiddái mu vuolgima maŋŋil álo muitibehtet dáid áššiid.

₁₆Eat mii, dalle go attiimet didjiide diehttevassii Hearrámet Jesus Kristusa fámu ja boahtima, lean čuovvulan gávvilis cukcasiid, muhto leimmet iežamet čalmmiiguin beassan oaidnit su ipmilvuođa fámu. ₁₇Son oaččui Ipmilis, Áhčistis, gudni ja hearvásvuođa, dalle go sutnje alimus hearvásvuođas bođii dát jietna: “Dát lea mu ráhkis Bárdni, su mun lean válljen.” ₁₈Dan jiena mii gulaimet boahtimin almmis, go leimmet suinna bassi váris. ₁₉Dan dihte mii sáhttit ain nannoseappot luohttit profehtalaš sátnái. Ja dii dahkabehtet bures, jos geahččabehtet dasa dego lámpái mii čuovgá sevdnjes báikkis, dassážii go beaivi čuvggoda ja guovssonásti suonjardišgoahtá din váibmui. ₂₀Ja ovddimustá dii fertebehtet ipmirdit ahte olmmoš ii máhte iešalddes čilget profehtalaš einnostusaid mat čužžot bassi čállagis. ₂₁Ii oktage profehtalaš sátni leat buktojuvvon ovdan olbmuid iežaset dáhtus, muhto Bassi Vuoigŋa lea vikkahan sin sárdnut dan maid Ipmil lea sidjiide addán.