2. Peter 3

₁Ráhkkásiiddán, dát lea nubbi girji maid mun didjiide čálán. Goappašagain mun lean dáhtton boktalit din vuoigatlaš miela ₂ja ávžon din atnit muittus sániid maid bassi profehtat ovdal leat sárdnon, ja Hearrámet ja Beastámet báhkkoma maid lehpet ožžon iežadet apostaliin.

₃Ovddimustá fertebehtet diehtit ahte maŋimuš áiggiid bohtet bilkideaddjit geat diktet anistumiideaset dolvvodit iežaset. ₄Sii dadjet bilkidemiin: “Leago son mahkáš boahtán, nugo lohpidii? Min áhčit leat jápmán, ja buot lea nugo lea leamaš máilmmi sivdnideami rájes.” ₅Sii eai dáhto diehtit ahte áiggiid álggus ledje almmit ja eanan maid Ipmila sátni sivdnidii čázis ja čáziin. ₆Čáziin ja sániin dološ máilbmi maid heavahuvvui dulvái. ₇Muhto dáláš almmiid ja eatnama lea seammá sátni vurken dola várás: Dat leat áimmuin gitta duopmobeaivái, go ipmilmeahttumat duššet.

₈Muhto allet dii, ráhkkásiiddán, vajáldahte ahte Hearrái okta beaivi lea dego duhát jagi ja duhát jagi dego okta beaivi. ₉Ii Hearrá leat maŋideamen iežas lohpádusa, vaikko muhtumat atnet dan maŋideapmin. Son baicca lea dinguin gierdavaš, danne go son ii dáhto ahte guhtege láhppo, muhto ahte buohkat jorgalivčče.

₁₀Hearrá beaivi boahtá dego suola. Dan beaivvi albmi duššá stuorra šlámain, almmigáhppálagat bullet ja hádjosit. Dalle báljaga eanan ja buot maid olmmoš lea dahkan eatnama alde.

₁₁Go buot dát ná bieđganit, de dii fertebehtet eallit bassin ja ipmilbalolažžan juohke dáfus ₁₂go vuordibehtet Ipmila beaivvi ja hoahpuhehpet dan boahtima, dan beaivvi mii buolláha ja háddje almmi ja suddada almmigáhppálagaid. ₁₃Muhto mis lea su lohpádus, ja dasa mii luohttit go vuordit ođđa almmi ja ođđa eatnama gos vanhurskkisvuohta ássá.

₁₄Ráhkkásiiddán, go dii vuordibehtet dán, de vigget eallit nu ahte Hearrá gávnnašii din buhtisin ja láitemeahttumin ja dis livččii ráfi. ₁₅Atnet iežadet bestojupmin dan ahte Hearrá lea gierdavaš. Nuhan maid min ráhkis viellja Paulus lea čállán dan viisodaga mielde mii sutnje lea addojuvvon. ₁₆Nu son dadjá buot girjjiinis main guorahallá dáid áššiid. Dain lea gal feara mii maid lea váttis ipmirdit, ja diehtemeahttun ja stáđismeahttun olbmot botnjet daid nugo maiddái eará bassi čállagiid, heavvun alcceseaset.

₁₇Go dii, ráhkkásiiddán, lehpet beassan diehtit dán, de galgabehtet váruhit amadet gessojuvvot ipmilmeahttun olbmuid čádjádusaide ja massit coavcci. ₁₈Ovdánehket Hearrámet ja Beastámet Jesus Kristusa árpmus ja dovdamis. Sutnje lehkos hearvásvuohta dál ja gitta agálašvuođa beaivvi rádjái. Amen.