2. Timoteus 4

₁Nu duohta go Jesus boahtá ja ásaha iežas riikka, mun vuortnuhan du Ipmila ja Kristus Jesusa bokte guhte dubme elliid ja jábmiid: ₂Sárdnit sáni, loaiddas ovdan heivvolaš ja heivemeahttun áiggi, cuiggot, ráŋggo ja ávžžo gierdavašvuođain ja oahpahusain. ₃Dasgo áigi boahtá go olbmot eai gierdda gullat dearvvaš oahpa, muhto hálidusaideaset mielde háhket alcceseaset oahpaheddjiid, dađi mielde go sin bealjit viššet gullat. ₄Sii jorgalit bealji eret duohtavuođas ja jorgalit cukcasiidda. ₅Muhto leage don gozeš juohke dáfus, gillá baháid, sárdnit evangeliuma ja ollašuhte iežat bálvalanbarggu.

₆Mun ieš juo fargga oaffaruššojuvvon, mu jápmináigi lea juo lahkaneamen. ₇Mun lean gilvvohallan buori gilvvu, lean ollen mearrái ja várjalan oskku. ₈Munnje lea vurkejuvvon vanhurskkisvuođa vuoitogierdu maid Hearrá, vuoigatlaš duopmár, addá munnje dan beaivvi go boahtá, iige duššefal munnje, muhto buohkaide geat njuorrasit vurdet su almmustuvvama.

₉Bargga viššalit boahtit fargga mu lusa. ₁₀Demas lea atnigoahtán dán máilmmi ráhkisin ja lea vuolgán Tessalonikai. Kreskens lea mannan Galatiai ja Titus Dalmatiai. ₁₁Dušše Lukas lea dáppe mu luhtte. Váldde mielddát Markusa, danne go son livččii munnje stuorra veahkkin. ₁₂Tykikosa mun lean vuolggahan Efesosii. ₁₃Buvtte maiddái mu mátkegávtti maid guđđen Troasii Karposa lusa, ja girjjiid, earenoamážit pergamentagearuid.

₁₄Veaikerávdi Aleksandros lea dahkan munnje ollu baháid, muhto Hearrá máksá sutnje su daguid mielde. ₁₅Várut donnai sus, danne go son lea vuostálastán sakka min oahpahusa.

₁₆Go mun vuosttaš geardde bealuštin iežan dikkis, de ii oktage boahtán mu veahkkin, muhto buohkat guđđe mu okto. Vare dat ii logahallojuvvoše sidjiide! ₁₇Muhto Hearrá veahkehii mu ja attii munnje návccaid ollašuhttit sáni sárdnideami ja buktit evangeliuma báhkiniid gullosii, ja nu mun gáddjojuvvojin ledjona njálmmis. ₁₈Hearrá gádju mu ain buot bahás ja doalvu mu almmálaš riikasis. Su lehkos gudni álo ja agálašvuhtii. Amen.

₁₉Cealkke dearvvuođaid Priskai ja Akvilai ja maid Onesiforosa bearrašii. ₂₀Erastos bázii Korintai, ja Trofimosa gii lei buozus, mun guđđen Miletosii. ₂₁Bargga viššalit boahtit ovdal dálvvi! Dutnje celket dearvvuođaid Eubulos, Pudens, Linos, Klaudia ja buot vieljat.

₂₂Hearrá lehkos du vuoiŋŋain! Árbmu didjiide buohkaide!