5. Mosesgirji 21

₁Jos muhtin gávdná goddojuvvon olbmo njaŋgámin olgun dan eatnamis maid Hearrá, din Ipmil, addá didjiide oapmin, iige oktage dieđe gii lea časkán su jámas, ₂de vuorrasat ja duopmárat galget mannat mihtidit guhkkodaga daidda gávpogiidda mat leat goddojuvvon olbmo birra. ₃Lagamus gávpoga vuorrasat galget váldit guiggu mii ii leat barggahuvvon ja man niskkis ii leat leamaš geasis. ₄Sii galget doalvut guiggu dakkár johkaroggái gos johka ii goikka goassege ja gos eanan ii bargojuvvo iige gilvojuvvo, ja doppe sii galget doadjit guiggus niskki. ₅De levilaš báhpat galget loaiddastit ovdan, danne go Hearrá, din Ipmil, lea válljen sin bálvalit iežas ja buressivdnidit álbmoga Hearrá nammii, ja sii galget dahkat mearrádusa buot riidoáššiin ja ráŋggáštusáššiin. ₆Buot dan gávpoga vuorrasat mii lea lagamussan dan goddojuvvon olbmo, galget bassat gieđaid dan guiggu alde man niski doddjojuvvui johkarokkis, ₇ja cealkit: “Min gieđat eai leat golggahan dán vara eaige min čalmmit leat oaidnán dan dagu. ₈Hearrá, atte ándagassii dán rihkkosa álbmogasat Israelii maid leat lonistan, alege divtte vigihis vara vealggi deaddit dan.” Dalle israellaččaid varravealgi soabahuvvo. ₉Nu dii jávkadehpet vigihis vara vealggi, go dahkabehtet dan mii lea riekta Hearrá čalmmiin.

₁₀Go dii vuolgibehtet soahtat vašálaččaideattetguin, ja Hearrá, din Ipmil, addá sin din gihtii ja dii váldibehtet fáŋggaid, ₁₁de muhtin dis sáhttá oaidnit fáŋggaid gaskkas čáppa nissona, liikostit sutnje ja dáhttut váldit su áhkkán. ₁₂Dalle son galgá doalvut nissona vissosis, gohččut su ráhket vuovttaidis ja čuohppat gaccaidis. ₁₃Dasto nisson oažžu molsut eará biktasiid go dat maid son anii dalle go váldojuvvui fáŋgan, ja son oažžu ássat olbmá vissui ja moraštit áhčis ja eatnis ovtta mánotbaji. De olmmái oažžu veallát suinna ja oamastit su; ná nisson šaddá su áhkkán. ₁₄Muhto jos olmmái ii šat liiko nissonii, de su galgá diktit mannat gosa dáhttu. Olmmái ii oaččo vuovdit su šlávvan iige atnit su gávpegálvun, danin go son lea veallán suinna.

₁₅Jos olbmás leat guokte áhká, nubbi gean son ráhkista ja nubbi gean ii ráhkis, ja guktot riegádahttiba sutnje bártni, sihke dat gean son ráhkista ja dat gean son ii ráhkis, ja vuosttašriegádan bárdni lea dan áhká gean son ii ráhkis, ₁₆de árbejuohkimis olmmái ii oaččo addit vuosttašriegádeami vuoigatvuođa ráhkis áhkás bárdnái dan áhká bártni vahágin gean son ii ráhkis. ₁₇Olmmái galgá dohkkehit vuosttamužžan riegádan bártni iežas vuosttašriegádeaddjin ja addit sutnje guovttegeardásaš oasi buot das mii sus lea, danin go dat bárdni lea su olmmáivuođa álgošaddu, ja vuosttašriegádeami vuoigatvuohta gullá sutnje.

₁₈Jos muhtun bárdni lea vuostehágolaš ja gážžár iige jeagat áhčis ja eatnis, ii dallege go soai leaba bagadan su, ₁₉de soai galgaba doalvut su gávpoga vuorrasiid lusa gávpotportii. ₂₀Soai galgaba dadjat gávpoga vuorrasiidda: “Dát munno bárdni lea vuostehágolaš ja gážžár. Son ii jeagat munno, muhto dušše feste ja juhká.” ₂₁Dalle buot gávpoga olbmát galget geađgádit su jámas. Duššat bahá álbmoga gaskkas. Oppa Israel gullá dan ja ballá.

₂₂Jos muhtun dubmejuvvo jápmit rihkkosa dihte ja son heakkahuhttojuvvo ja heaŋggastuvvo murrii, ₂₃de su jápma gorut ii oaččo báhcit heaŋgát murrii idjii, muhto galgá hávdáduvvot dan seammá beaivvi, danne go Ipmil lea garuhan dan gii lea heŋgejuvvon murrii. Allet daga buhtismeahttumin eatnama maid Hearrá, din Ipmil, addá didjiide oapmin.