Sárdnideaddji 4
1De mun geahčadin buot soardima mii dáhpáhuvvá beaivváža vuolde.
Sordojuvvon olbmot čirrot,
muhto ii sis leat jeđđejeaddji.
Soardi giehta dahká veahkaválddi,
muhto ii leat jeđđejeaddji.
2Dalle mun rámidin jábmiid geat leat juo jápmán, lihkoleabbon go daid geat ain leat eallimin; 3sudno goappašagaid lihkoleabbon mun rámidin dan gii ii leat oppa riegádange iige leat gártan oaidnit dan bahá mii dáhpáhuvvá beaivváža vuolde.
4Mun oidnen ahte buot rahčan ja buot ovdáneapmi boahtá das ahte olbmot gáđaštit guhtet guoimmiset. Datge lea duššálašvuohta ja biekka váinnuheapmi.
5Jalla čohkká askálas gieđaid
ja loaktá iežas oačči.
6Buoret čorpma dievva muosis
go čorpmaid dievva rahčamiin
ja biekka váinnuhemiin.
7Mun oidnen vel eambbo duššálašvuođa beaivváža vuolde: 8Muhtin olmmoš lea áibbas okto, sus ii leat bárdni iige viellja. Dattetge ii leat mearri buot su rahčamis, eaige su čalmmit gallán riggodagain. “Gean várás mun datte ražan ja biehttalan buot buriin?” Datnai lea duššálašvuohta ja váivves bargu.
9Guovttá lea buoret go okto, danin go soai guktot oažžuba buori bálkká váivvisteaskka. – 10Jos soai jorraleaba, de nubbi sáhttá veahkehit guoimmis čuoččat. Muhto vuoi oktoolbmo gii jorrala – ii oktage leat veahkeheamen su. 11Nu maiddái go guovttis oađđiba ovttas, de soai liegganeaba; muhto mo oktoolmmoš sáhtášii liegganit?
12Oktoolmmoš vuoittáhallá, muhto guovttis bihtiba bealiska, iige golmmageardásaš árpu boatkan fargga.
13Buoret geafes ja viissis nuorra olmmái
go boares jallas gonagas
gii ii šat dádjat váldit vuostá várrehusaid.
14Nuorra olmmáihan vulggii giddagasas ja šattai gonagassan vaikko lei riegádan geafin, go duot nubbi lei ráđđemin. 15Mun oidnen mo buot olbmot geat vádjoledje beaivváža vuolde, serve nuorra olbmáin gii bođii dan nuppi sadjái. 16Ii lean mihkkege loahpaid buot álbmogis man njunnošis son lei. Almmatge son ii leat maninge illun maŋit buolvvaide. Datge lea duššálašvuohta ja biekka váinnuheapmi.
Ipmila bálvaleapmi
17Lávke várrogasat Ipmila vissui. Buoret lea mannat dohko guldalit go oaffaruššat jallaid láhkái; diehtemeahttunvuođasteaset sii dahket baháid.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
