Esekiel 12

₁Munnje bođii dát Hearrá sátni: ₂“Olmmoš, don ásat gážžáris álbmoga gaskkas. Vaikko sis leat čalmmit, de sii eai oainne, vaikko sis leat bealjit, de sii eai gula, siihan leat gážžáris álbmot. ₃Olmmoš, don galggat guovdelaš beaivvi ja sin oaidnut ráhkadit dakkár gurppi mii eret dolvojuvvon olbmuin lea, ja sin oaidnut vuolgit eret báikkis gos don ásat nuppi báikái. Sii vedjet ipmirdit dan – siihan leat gážžáris álbmot. ₄Guovdelaš beaivvi ja sin oaidnut don galggat guoddit olggos iežat gurppi, dego livččet bággehallan vuolgit. Vuolgge eahkedis ja sin oaidnut nugo eret dolvojuvvon olmmoš vuolgá. ₅Gaikko sin oaidnut seaidnái ráiggi ja mana dakko olggos, gurpi vel mielde. ₆Bajit dan oalgái sin oaidnut ja doalvvo dan olggos seavdnjadin. Govčča muođuidat, nu ahte it oainne eatnama maid leat guođđimin. Mun bijan du mearkan israellaččaide.”

₇Mun dahken nugo ledjen gohčohallan. Guovdelaš beaivvi mun dolvon olggos iežan gurppi nugo eret dolvojuvvon olmmoš doalvu gurppis olggos. Eahkedis mun gaikon seaidnái ráiggi gieđaiguin, ja sin oaidnut mun dolvon seavdnjadin olggos gurppi ja bajidin dan oalgái.

₈Iđedis munnje bođii dát Hearrá sátni: ₉“Olmmoš, almma israellaččat, duot gážžáris álbmot, leat jearran dus: ‘Maid don dagat?’ ₁₀Vástit sidjiide: ‘Ná cealká Hearrá Ipmil: Dát profetia guoská oaivámužžii gii ráđđe Jerusalemis, ja buot gávpoga israellaččaide.’ ₁₁Daja: ‘Mun lean didjiide mearka. Nugo mun lean dahkan, nu dahkkojuvvo Jerusalema ássiide. Sii váldojuvvojit fáŋgan ja dolvojuvvojit eret. ₁₂Sin oaivámuš lea sin gaskkas. Go sevnnjoda, de songe šaddá bajidit gurppi oalgái ja vuolgit. Sii gaikot ráiggi seaidnái, vai besset dakko doalvut gurppiideaset olggos, ja oaivámuš gokčá muođuidis nu ahte ii oainne dán eatnama.’” ₁₃“Mun lebben fierbmán su badjelii, ja son darvána mu bivdosii. Dasto mun doalvvun su Babylonii, kaldealaččaid eatnamii, ja dohko son jápmá, muhto dán eatnama son ii oainne. ₁₄Oppa su fáru, su veahkeheddjiid ja su soahteveaga, mun biđgen buot biekkaide, ja mun oaguhan sin geaiggomihkiin. ₁₅Go mun biđgen sin álbmogiid gaskii ja botkkuhan sin vieris eatnamiidda, de sii ipmirdit ahte mun lean Hearrá. ₁₆Muhto muhtumiid sis mun seasttán miehkis, nealggis ja rohttudávddas, vai sii besset muitalit fasttes daguideaset daidda álbmogiidda maid gaskii sii bohtet. Dalle sii ipmirdit ahte mun lean Hearrá.”

₁₇Munnje bođii dát Hearrá sátni: ₁₈“Olmmoš, bora láibbi doarggistemiin ja juga čázi balus ja leabuheapmin. ₁₉Muital iežat eatnama olbmuide dán Hearrá Ipmila sáni: ‘Ná geavvá Jerusalema ássiide ja Israela eatnamii. Sii šaddet borrat láibbi doarggistemiin ja juhkat čázi hirpmain. Sin eanan šaddá ávdimin ja olbmohuvvá buot ássiidis veahkaválddálaš daguid dihte. ₂₀Gávpogat main olbmot leat ássan, šaddet čievračopman, ja eanan šaddá ávdimin. Dalle dii ipmirdehpet ahte mun lean Hearrá.’”

₂₁Munnje bođii dát Hearrá sátni: ₂₂“Olmmoš, mii dajahusaid lea dát maid dii atnibehtet Israela eatnamis: ‘Áigi guhkkána, juohke oainnáhus duššá.’ ₂₃Daja sidjiide: Ná cealká Hearrá Ipmil: Mun dagan duššin dán dajahusa. Dan ii oaččo šat atnit Israelis. Daja baicce sidjiide: ‘Áigi lea boahtán, ja juohke oainnáhus šaddá duohtan.’ ₂₄Israelis eai leat šat behtolaš oainnáhusat eaige fillejeaddji einnostusat. ₂₅Dat sátni maid mun, Hearrá, ain sártnun, ollašuvvá, ii dat ádján. Din áigge, dii gážžáris olbmot, mun sártnun iežan sáni ja ollašuhtán dan, cealká Hearrá Ipmil.”

₂₆Munnje bođii dát Hearrá sátni: ₂₇“Olmmoš, gula maid israellaččat dadjet: ‘Su oainnáhus guoská eará áigái, son profehtastallá gáiddus áiggi birra.’ ₂₈Cealkke sidjiide: ‘Ná cealká Hearrá Ipmil: Mu sátni maid mun sártnun, ii ádján ollašuvvamis, cealká Hearrá Ipmil.’”