Esekiel 19

₂Ledjon lei du eadni!

Njiŋŋelas ledjon ledjoniid gaskkas.

Dat goarjadii nuorra ledjoniid gaskkas

ovttas čivggaidisguin.

₃Čivggainis muhtuma dat divššodii,

ja dat šattai gievrras ledjonin.

Dat oahpai rievidit stajádusa,

dat borai olbmuidnai.

₄Muhto álbmogat gohččojuvvojedje

dan vuostá,

ja dat darvvihuvvui sin bivdoroggái

ja dolvojuvvui njunnerieggás láidemiin

Egypta eatnamii.

₅Go ledjoneadni oinnii

ahte son lei vuordán duššás

ja buot su doaivu lei jávkan,

de dat válddii čivggainis nuppi

ja šaddadii dan.

₆Čivga jođašii ledjonvalvviin,

ja dat šattai gievrras ledjonin.

Dat oahpai rievidit stajádusa,

dat borai olbmuidnai.

₇Dat duššadii sin šloahtaid

ja heavahii sin gávpogiid.

Buot eatnama ássit doarggistedje,

go dat čearggui.

₈Muhto álbmogat gohččo čoahkkái

veagaideaset,

ja dan ovdii lebbejuvvui fierbmi,

dat darvvihuvvui sin bivdoroggái.

₉Dat oaččui čeabehii láhkkiid

ja njunnái rieggá,

ja dat dolvojuvvui Babylona gonagasa lusa

ja biddjojuvvui ladnái,

vai dan čeargun ii šat gulloše

Israela váriin.

₁₀Du eadni lei

dego gárddi viidnemuorra,

čáhcegáddái ceggejuvvon.

Dat lei suorgái ja šattolaš,

dashan lei valjis čáhci.

₁₁Dasa šadde váfes oavssit

ráđđensoabbin anolaččat,

dat čuzii balvvaid gaskii,

dat lei allat ja oidnui guhkás,

dan oavssit ledje lastát.

₁₂Muhto vašis dat rohttejuvvui luovus

ja bálkestuvvui eatnamii,

ja nuortabiegga goikadii dan murjjiid.

Dan váfes oavssit doddjojuvvojedje,

dat áste, ja dolla lovttii daid.

₁₃Dál viidnemuorra

lea ceggejuvvon meahccái,

jakŋá ja goiki eatnamii.

₁₄Dan ovssiin vulggii dolla

mii lovttii dan surggiid ja murjjiid.

Ii leat das šat váfes oaksi,

ii ráđđensoabbin anolaš muorra.