Esekiel 48

₁Dát leat čearddaid namat: Davimussan, Hetlona, Lebo-Hamata ja Hasar-Enona guvlui, Damaskusa eatnamis ja Hamatis lulás – Hamat lea Damaskusa guoras – lea Dana oassi nuortin oarjjás. ₂Ašera oassi lea Dana eatnamis lulás nuortin oarjjás. ₃Naftali oassi lea Ašera eatnamis lulás nuortin oarjjás. ₄Manasse oassi lea Naftali eatnamis lulás nuortin oarjjás. ₅Efraima oassi lea Manasse eatnamis lulás nuortin oarjjás. ₆Rubena oassi lea Efraima eatnamis lulás nuortin oarjjás. ₇Juda oassi lea Rubena eatnamis lulás nuortan oarjjás.

₈Juda eatnamis lulás nuortan oarjjás lea bassi eanan, maid dii galgabehtet earuhit Hearrái. Dat lea davvin lulás guoktelogivihttaduhát állana govddu ja nuortin oarjjás seammá guhkki go guđege čeardda oassi, ja bassibáiki lea dan guovdu.

₉Bassi eanan maid dii galgabehtet earuhit Hearrái, lea guoktelogivihttaduhát állana guhku ja guoktelogiduhát állana govddu. ₁₀Bassi eatnama galgá juohkit ná: Báhpat ožžot eatnama mii lea guoktelogivihttaduhát állana guhku davvin, logiduhát állana govddu oarjin, logiduhát állana govddu nuortin ja guoktelogivihttaduhát állana guhku lullin. Hearrá tempel lea dan guovdu. ₁₁Eanan gullá vihahuvvon báhpaide geat leat Sadoka nális. Sii bálvaledje mu oskkáldasat eaige čádjidan, nugo levilaččat dahke dalle go Israela álbmot čádjidii. ₁₂Sii galget oažžut dan sierra oassin bassi eatnamis. Dat lea allabassi ja lea levilaččaid oasi guoras. ₁₃Levilaččat ožžot báhpaid eatnama guoras eatnama mii lea guoktelogivihttaduhát állana guhku ja logiduhát állana govddu. Oktiibuot bassi eatnama guhkkodat lea guoktelogivihttaduhát állana ja govdodat guoktelogiduhát állana. ₁₄Das ii oaččo vuovdit iige lonuhit maidege iige sirdit eatnama buoremus oasi earrásiidda, danne go dat lea basuhuvvon Hearrái.

₁₅Dat viđaduhát állana govdosaš guovlu mii báhcá guoktelogivihttaduhát állana guhkkosaš guovllus, lea dábálaš eanan. Dat gullá gávpogii ja lea viesuid huksema ja guohtuneatnama várás, ja gávpot galgá leat dan guovdu. ₁₆Dát leat gávpoga mihtut: davábealli lea njealljeduhát vihttačuođi állana, lulábealli njealljeduhát vihttačuođi állana, nuorttabealli njealljeduhát vihttačuođi állana ja oarjjabealli njealljeduhát vihttačuođi állana. ₁₇Gávpoga guohtuneanan lea davvin guoktečuođi vihttalogi állana, lullin guoktečuođi vihttalogi állana, nuortin guoktečuođi vihttalogi állana ja oarjin guoktečuođi vihttalogi állana. ₁₈Eanan mii vel báhcá bassi eatnama gurrii, lea logiduhát állana guhku nuortin ja logiduhát állana oarjin. Dan šattu galgá atnit gávpoga bargiid biebmun. ₁₉Gávpoga bargit geat bohtet buot Israela čearddain, ožžot bargat dan eatnama. ₂₀Oppa dat guovlu lea juohke bealde guoktelogivihttaduhát geardde guoktelogivihttaduhát állana. Dii galgabehtet earuhit bassi eatnama dainna lágiin ahte oktan gávpoga eatnamiin dat lea njealjehasa hámis.

₂₁Oaivámuš oažžu dan mii báhcá bassi eatnama ja gávpoga eatnama goappáge beallái, namalassii eatnamiid dan guoktelogivihttaduhát állana guoras nuortin gitta nuortaráji rádjái ja dan guoktelogivihttaduhát állana guoras oarjin gitta oarjeráji rádjái. Dat eatnamat čeardaosiid guoras gullet oaivámužžii. Bassi eanan ja Hearrá tempel dan guovdu ₂₂leat oktan levilaččaid ja gávpoga eatnamiiguin daid eatnamiid gaskkas mat gullet oaivámužžii. Oaivámuš eaiggáduššá dan eatnama mii báhcá Juda ja Benjamina osiid gaskii.

₂₃Eará čearddaid guovllut ollet maid eatnama rastá nuortin oarjjás. Ovddemus lea Benjamina čeardda oassi. ₂₄Simeon oažžu oasi Benjamina eatnamis lulás nuortin oarjjás. ₂₅Isaskar oažžu oasi Simeona eatnamis lulás nuortin oarjjás. ₂₆Sebulon oažžu oasi Isaskara eatnamis lulás nuortan oarjjás. ₂₇Gad oažžu oasi Sebulona eatnamis lulás nuortan oarjjás. ₂₈Gada eatnama lulábealde manná lullerádji Tamaris gitta Meribat Kadeša ádjagiidda ja de rádjejoga mielde Stuorramerrii. ₂₉Dát lea dat eanan maid dii galgabehtet juogadit opmodahkan Israela čearddaide, ja dát leat daid oasit. Ná cealká Hearrá Ipmil.

₃₀Dát leat gávpoga poarttat: Davábeale ravddas mii lea njealljeduhát vihttačuođi állana guhku, ₃₁leat golbma poartta davás guvlui: Rubena poarta, Juda poarta ja Levi poarta. Gávpotpoarttat leat navdojuvvon Israela čearddaid mielde. ₃₂Nuorttabeale ravddas mii lea njealljeduhát vihttačuođi állana guhku, leat golbma poartta: Josefa poarta, Benjamina poarta ja Dana poarta. ₃₃Lulábeale ravddas mii lea njealljeduhát vihttačuođi állana guhku, leat golbma poartta: Simeona poarta, Isaskara poarta ja Sebulona poarta. ₃₄Oarjjabeale ravddas mii lea njealljeduhát vihttačuođi állana guhku, leat golbma poartta: Gada poarta, Ašera poarta ja Naftali poarta. ₃₅Gávpoga birramihttu lea gávccinuppelohkáiduhát állana. Dán beaivvi rájes gávpoga namma lea “Hearrá lea dáppe”.