Egypta geahččalusat
1Sátni Egypta hárrái.
Gehččet, Hearrá riide geahppa balvvaid alde!
Son boahtá Egyptii,
ja Egypta eahpeipmilat
doarggistit balus su muođuid ovddas
ja egyptalaččat hearddohuvvet.
2“Mun háhtten Egypta Egypta vuostá,
nu ahte sii buohkat sohtet viellja vieljain,
olmmái olbmáin,
gávpot gávpogiin, riika riikkain.
3Egypta olbmáid roahkkatvuohta doddjo,
Mun moiven sin áigumušaid.
Sii šaddet jearrat ráđi
eahpeipmiliin ja jámežiin,
jábmiid vuoiŋŋain
ja einnostusvuoiŋŋain.
4Mun attán egyptalaččaid
garra hearrá gihtii,
goaves gonagas ráđđe sin.”
Ná cealká Hearrá, Almmiveagaid Ipmil.
5Nileanu čázit nohket,
eatnu šaddá guorusin ja goikkisin.
6Eanu suorggit havssiidit,
Nileanu njálmmádat uhccu ja goiká,
hoaššat ja bohccit ástet,
7buot Nileanu njálmmi rávrrat.
Buot eatnogátti šattolaš eanan
goiká, manná biekka mielde ja jávká.
8Buot guollebivdit moraštit ja váidalit,
buohkat geat bidjet vuokka Niletnui
ja buohkat geat suhppot firpmiid čáhcái,
hearddohuvvet.
9Beallemasšaddadeaddjit dorvvuhuvvet,
kárejeaddjit ja gođđit šovkkodit,
10fárjodahkkit vuollánit,
buot beaivebálkkolaččat nuonddahallet.
11Soana oaivámuččat leat aivve jallat,
viisát addet faraoi jierpmehis neavvagiid.
Mo dii sáhttibehtet dadjat faraoi:
“Mii leat viisáid bártnit,
mii buolvaduvvat dološ áiggi gonagasain?”
12Gos dál leat du viisát?
Vare sii muitalivčče ja dieđihivčče dutnje
maid Hearrá, Almmiveagaid Ipmil,
lea mearridan Egypta hárrái.
13Soana oaivámuččat leat doavkkit,
Memfisa oaivámuččat fillehallet,
čeardaoaivámuččat čádjidahttet Egypta.
14Hearrá lea deavdán sin
seahkidanvuoiŋŋain,
ja sii leat fillen egyptalaččaid
buot das maid sii dahket,
nu ahte sii rávjot
dego gárrenolmmoš vuovssanasastis.
15Dan dihte Egypta ii máhte
dahkat maidege,
ii oaivi iige seaibi,
ii pálbmagiera iige skážirnađđa.
16Dan beaivvi egyptalaččat leat dego nissonat. Sii doarggistit ja darret go Hearrá, Almmiveagaid Ipmil, lokte gieđa sin vuostá. 17Juda eanan šaddá egyptalaččaide balddonassan: Go Juda namuhuvvo, de sii doarggistit ja muitájit maid Hearrá, Almmiveagaid Ipmil, lea mearridan sin hárrái.
Hearrá buressivdnida álbmogiid
18Dan beaivvi Egyptas leat vihtta gávpoga main sárdnot Kanaana giela ja dahket váli Hearrái, Almmiveagaid Ipmilii. Okta dain lea Ir-Haheres.
19Dan beaivvi Hearrás lea áltár gasku Egypta ja bázzi eatnama rájis. 20Dat leat Egypta olbmuide mearka ja duođaštus Hearrás, Almmiveagaid Ipmilis. Go sii čurvot Hearrái sordiideaset dihte, de son vuolggaha sidjiide beasti gii soahtá sin beali ja gádju sin. 21Hearrá dovddaha iežas egyptalaččaide, ja egyptalaččat dovdet su dan beaivvi. Sii oaffaruššet njuovvanoaffariid ja borramušoaffariid, sii dahket lohpádusaid Hearrái ja ollašuhttet daid. 22Hearrá časká egyptalaččaid, časká muhto maid buorida. Go sii jorgalit Hearrá beallái, de son gullá sin rohkosiid ja buorida sin.
23Dan beaivvi rahpasa geaidnu Egyptas Assyriai. Assyrialaččat fitnet Egyptas ja egyptalaččat Assyrias, ja egyptalaččat bálvalit Hearrá ovttas assyrialaččaiguin.
24Dan beaivvi Israel lea goalmmádin Egypta ja Assyria bálddas ja šaddá buressivdnádussan gasku eatnama. 25Hearrá, Almmiveagaid Ipmil, buressivdnida daid ja cealká:
Buressivdniduvvon lehkos
Egypta, mu álbmot,
Assyria, mu gieđaid dahku,
Israel, mu opmodat!
