Jesaja 2

₂Boahtá áigi goas Hearrá

tempelvárri čuožžu nanusin,

váriin alimussan, alážiin bajimussan,

ja álbmogat márret dohko,

₃Eatnat olbmuid čearddat johttájit

ja dadjet:

“Bohtet, vulgot Hearrá várrái,

Jakoba Ipmila vissui.

Son oahpista midjiide geainnuidis,

mii dáhttut vádjolit su bálgáid,

danin go Hearrá láhka vuolgá Sionis,

Hearrá sátni Jerusalemis.”

₄Son dubme álbmogiid,

cealká duomu eatnat olbmuid čearddaide.

Sii dáhkot mihkiideaset plogaávjun

ja sáittiideaset viidnegárdeniibin.

Álbmot ii šat lokte miehki

álbmoga vuostá,

dat eai šat oahpahala soahtat.

₅Jakoba mánát,

bohtet, vádjolehkot Hearrá čuovggas!

₆Hearrá, don leat hilgon iežat álbmoga,

leat hilgon Jakoba mánáid.

Sin eatnama dievva

leat nuortti einnosteaddjit,

mearkačilgejeaddjit dego Filisteas –

juohke sajis vierroolbmot!

₇Eatnama dievva lea silba ja golli,

dan dávviriin ii leat mihkkege meriid.

Eatnama dievva leat heasttat,

dan soahtevovnnain ii leat mihkkege meriid.

₈Eatnama dievva leat eahpeipmilat,

olbmot luoitádit gieđaideaset duoji ovdii,

dan ovdii maid leat ráhkadan

iežaset gieđaiguin.

₉Dan dihte olmmoš vuoliduvvo,

dan dihte son šaddá čippostit.

– Hearrá, ale atte sidjiide ándagassii!

₁₀Mana bávtti sisa, čiehkát muldii,

báhtar Hearrá hirpmus fámus,

su alla hearvásvuođas!

₁₁Čeavlás olbmot šaddet

vuolidit čalmmiid,

olbmo čeavláivuohta sojahuvvo,

dan beaivvi aivvefal Hearrá lea allat.

₁₂Hearrá, Almmiveagaid Ipmila, beaivi

časká buot dasa mii lea čeavlái ja allat,

buot dasa mii allánaddá

ja goarggasmuvvá,

₁₃buot Libanona sederiidda,

allagiidda ja stuorráide,

ja buot Bašana áikkaide,

₁₄buot alla váriide

ja buot ceaggájeaddji dieváide,

₁₅dat časká buot alla toartnaide

ja buot ceakkomuvrraide,

₁₆buot Taršiša-skiippaide

ja buot hearvás fatnasiidda.

₁₇Dalle olbmo goargatvuohta sojahuvvo

ja su čeavláivuohta soardašuvvá.

Dan beaivvi aivvefal Hearrá lea allat,

₁₈ja eahpeipmilat duššaduvvojit oalát.

₁₉Báhtarehket bákteráiggiide

ja eananbiejuide

Hearrá hirpmus fámus

ja su alla hearvásvuođas,

go son čuožžila suorggahit eatnama.

₂₀Dan beaivvi olbmot bálkestit

golleipmiliiddiset ja silbaipmiliiddiset

maid sii ieža leat ráhkadan

ja dasto luoitádan daid ovdii.

Sii bálkestit daid buovnnjahiidda

ja girdisáhpániidda

₂₁ja báhtarit skoaruide ja báktelomiide

Hearrá hirpmus fámus

ja su alla hearvásvuođas,

go son čuožžila suorggahit eatnama.

₂₂Allet luohte olbmui,

son lea dušše vuoiŋŋanas.

Man veara son lea?