Jesaja 24

₁Hearrá heavaha eatnama,

son duššada dan,

nuppástuhttá dan hámi

ja biđge dan ássiid.

₂Seammá ládje geavvá

báhppii nugo álbmogii,

isidii nugo šlávvii,

eamidii nugo šlávvanissonii,

oastái nugo vuovdái,

lonejeaddjái nugo loatnaváldái,

velgoheaddjái nugo velggolažžii.

₃Ávdimin gurrejuvvo eanan,

dat stajiduvvo ja speddjojuvvo.

Nu Hearrá lea sárdnon.

₄Eanan goarrána ja goldná,

máilbmi goldná ja nohká,

eatnama alážat goiket.

₅Dat geat ásset eatnamis,

leat dahkan dan eahpebassin:

Sii leat badjelgeahččan rievtti

ja rihkkon agálaš lihtu.

₆Dan dihte garuhus loaktá eatnama,

ja dan ássit šaddet gillát ráŋggáštusa.

Dan dihte olbmot uhccánit eatnamis,

dušše soapmásat báhcet.

₇Viidni morašta,

viidnemuorra goldná,

dat geat ledje ilus, šuhkket.

₈Nohkan lea rumbbuid arvvohis čuodjan,

nohkan šlápma ja ávvučuorvasat,

lyra ilolaš šuoŋat leat jaskkodan.

₉Eai lávllo šat olbmot jugalmasain,

viidni lea šaddan rihčan juhkkiidasas.

₁₀Gávpot lea hearjiduvvon ja ávdin,

buot viesut leat dahppojuvvon.

₁₁Gáhtain gullo váidalus, ii leat šat viidni.

Illu lea čáskan,

ávvu lea báhtaran eatnamis.

₁₂Gávpogii báhcá dušše heavahus,

poarta lea skálbmejuvvon.

₁₃Ná geavvá máilmmi álbmogiidda:

Dat báhcet dan veardde go

oliivamurrii oliivvat

go dat lea cábmojuvvon,

dan veardde go sáhttá gávdnat murjjiid

maŋŋelájuid maŋŋá.

₁₄Dat geat leat báhcán, čurvot ilus,

sii ávvudit Hearrá stuorisvuođa.

Čurvot jitnosit oarjin,

₁₅gudnejahttet Ipmila nuortan!

Máidnot sulluin ja rittuin

Hearrá, Israela Ipmila, nama!

₁₆Eatnama ravddas mii gullat

rámáduslávlagiid čuodjamin

Vanhurskása gudnin.

mun in veaje, mun duššan!

Beahttit behttet!

Behttosa maŋŋilge vel beahtus!

₁₇Várra ja roggi ja giella vuordá

du, eatnama ássi.

₁₈Dat gii báhtara váras,

gahččá roggái,

gii beassá bajás rokkis,

darvána gillii.

Allagasa dahpaldagat rahppojuvvojit,

eatnama vuođđudusat doarggistit.

₁₉Eanan luoddana ja gaikána,

eanan suoibu ja ruohčá,

eanan lihkada ja doarggista.

₂₀Eanan ruossá dego gárrenolmmái,

sugada nugo visteluoggu.

Suddu deaddá dan lossadit,

dat gahččá iige šat ceaggan.