Jesaja 54

₁Ávvut, sahkuheapme,

don gii it leat goassege riegádahttán!

Bajit ávvučuorvasa,

don geas eai goassege leat leamaš ávttat!

Danin go du, hilgojuvvon nissona,

mánát leat eanebut go dan mánát

geas lea boadnjá,

cealká Hearrá.

₂Daga goahtesaját stuorisin,

leappo loavdagiid seasttekeahttá!

Fanat báttiid,

dearppa čuolddaid nanusin!

₃Don viidánat lulás ja lávddat davás,

du nálli ádjá eret vierroálbmogiid

ja ássá gávpogiidda

mat leat šaddan ávdimin.

₄Ale bala, it don dárbbaš heahpanit,

ale ujostala, it don heahppášuhttojuvvo.

Don beasat vajáldahttit

nuorravuođa vuolideami,

it šat muitte leaskavuođa heahpada.

₅Du boadnjihan lea son

gii sivdnidii du,

– Hearrá, Almmiveagaid Ipmil,

lea su namma –

du lonisteaddji lea Israela Bassi –

son gohčoduvvo oppa eatnama Ipmilin.

₆Hearrá rávká du,

hilgojuvvon ja morašteaddji nissona.

Iihan oktage hilggo iežas

nuorravuođa áhká,

cealká du Ipmil.

₇Oanehis boddui mun guđđen du,

muhto stuorra váibmoláđisvuođastan

mun válddán du fas ruoktot.

₈Go mu moarri govddai,

de mun čihken dus muođuidan

oanehis boddui.

Muhto dál mun árpmihan du

agálaš oskkáldasvuođain,

cealká Hearrá, du lonisteaddji.

₉Mun vuortnun dego Noa beivviid.

Dalle mun vurdnon ahte Noa áiggi čázit

eai šat goassege dulvva eatnama badjelii,

ja dál mun vuortnun

ahte mun in šat moaráhuva dutnje

inge ráŋggo du.

₁₀Vaikko várit gáiddašedje

ja dievát doarggistivčče,

de mu oskkáldasvuohta

ii goassege guođe du

iige mu ráfilihttu duinna lihkahuvvo,

cealká Hearrá, du árpmiheaddji.

₁₁Don vártnuheapme,

don gii leat stajiduvvon

ja gean ii oktage jeđđe!

Du geđggiid mun vuođđudan

hearvageđggiid ala,

mun huksen du vuođđudusa safirain.

₁₂Du muvrra hárjjiid

mun dagan rubiinnain,

du poarttaid kristállain

ja oppa du birasmuvrra

mávssolaš geđggiin.

₁₃Hearrá ieš oahpaha buot du bártniid,

stuorisin šaddá du mánáid ráfi.

₁₄Vuoigatvuohta lea du vuođđudus.

Don leat guhkkin áŧestusain

– dus ii leat ballamuš,

guhkkin heavus

– dat ii ole du rádjái.

₁₅Jos muhtin falleha du,

de dat ii leat mu dahku.

Dat gii falleha du, gahččá du ovdii.

₁₆Mun lean sivdnidan rávdi

bossut čađđadola

ja duddjot vearjjuid adniid gihtii,

lean maiddái sivdnidan duššadeaddji

duššadit.

₁₇Muhto juohke vearju

mii dáhkkojuvvo du vuostá,

lea beaktilmeahttun.

Juohke njuokčama mii áššáskuhttá du,

don duođaštat gielisin.

Dát lea Hearrá bálvaleddjiid oassi.

Mun attán sidjiide dasa vuoigatvuođa,

cealká Hearrá.