Duopmáriid girji 18

₁Dan áigge go Israelis ii lean vel gonagas, de Dana čearda ozai alccesis eatnama gosa ássat. Sis ii lean vuos opmodat Israela čearddaid gaskkas. ₂Danlaččat vuolggahedje iežaset sogain vihtta olbmá, roahkkadis soahteolbmáid Soras ja Eštaolis, iskkadit ja dihtoštit eatnama. Sii dadje olbmáide: “Mannet dihtoštit eatnama!” Olbmát bohte Efraima várreeatnamii Mika vissui ja idjadedje das. ₃Go sii ledje Mika viesus, de sii dovdájedje nuorra levilačča suopmana. Sii manne su lusa ja jerre: “Mo don deike leat boahtán? Manne don leat dáppe, ja maid don barggat?” ₄Son muitalii sidjiide mii lei dáhpáhuvvan ja mo Mika lei bálkáhan su iežas báhppan. ₅De sii bivde: “Jeara min beales Ipmilis, lihkostuvvágo dát min reaisu.” ₆Báhppa vástidii: “Dii oažžubehtet mannat ráfis. Hearrá atná fuola din vádjolusas.”

₇Dasto dat viđas vulge das ja bohte Lajišii. Sii oidne ahte olbmot elle doppe oadjebassan dego sidonlaččatge, muosis ja ráfis. Sii ásse guhkkin sidonlaččain iige sis lean dahkamuš eará olbmuiguin. ₈Go olbmát bohte ruoktot Sorai ja Eštaolii, de sin vieljat jerre sis ságaid dohko, ₉ja sii dadje: “Fallehehkot dálán! Mii oinniimet ahte dat eanan lea buorre. Maid dii vel vuordibehtet? Allet ájahala, muhto mannet váldit dan eatnama oapmineattet. ₁₀Go dii ollebehtet dohko, de doppe lea oadjebas álbmot, ja eanan lea viiddis juohke guvlui. Ipmil lea addán dan eatnama din gihtii, iige doppe váillo mihkkege maid olmmoš sáhttá sávvat.”

₁₁Guhttačuođi Dana čeardda vearjoolbmá lihkkasedje mátkái Soras ja Eštaolis. ₁₂Mátkkis sii luoitaledje Kirjat-Jearimii Judas; dan dihte dan báikki gohčodit vel otná beaivvige Dana soahtesiidan. Dat lea Kirjat-Jearima oarjjabealde. ₁₃Doppe sii manne Efraima várreeatnamii ja bohte Mika vissui. ₁₄Dat viđas geat ledje fitnan iskkadeamen Lajiša guovlluid, dadje vieljaidasaset: “Diehtibehtetgo ahte dán viesus lea efod, muoras čuhppojuvvon ja silbbain skoađastuvvon ipmilgovva ja viessoipmilat? Almma dii áddebehtet maid galgabehtet dahkat.” ₁₅Sii manne Mika vissui dan nuorra levilačča lusa ja dearvvahedje su. ₁₆Guhttačuođi danlaš soahteolbmá čuoččastedje uksanjálbmái ₁₇dan botta go dat viđas geat ledje fitnan iskkadeamen eatnama, manne vissui ja válde efoda, muoras čuhppojuvvon ja silbbain skoađastuvvon ipmilgova ja viessoipmiliid. Báhppa čuoččui soahteolbmáid gaskkas uvssas, ₁₈ja go dat viđas manne Mika vissui ja válde efoda, muoras čuhppojuvvon ja silbbain skoađastuvvon ipmilgova ja viessoipmiliid, de son jearai: “Maid dii dahkabehtet?” ₁₉Sii vástidedje: “Oro jaska, ale jietnat maidege! Vuolgge min fárrui ja álgge min áhččin ja báhppan. Almma dutnje lea buoret leat olles Israela čeardda ja soga báhppan go ovtta olbmá báhppan?” ₂₀Dalle báhppa šattai buori millii. Son válddii efoda, muoras čuhppojuvvon ipmilgova ja viessoipmiliid ja vulggii olbmáid mielde. ₂₁De danlaččat vulge das ja bidje nissoniid ja mánáid, omiid ja mávssolaš gálvvuid ovddimussii.

₂₂Sii ledje joavdan juo guhkás Mika viesus go Mika siidaguoimmit geat ledje rávkojuvvon čoahkkái, jokse sin. ₂₃Doarrideaddjit čurvejedje danlaččaide, ja sii jorggihedje ja jerre Mikas: “Mii dus lea heahtin, go don boađát diekkár joavkkuin?” ₂₄Son vástidii: “Dii válddiidet mus ipmiliid maid mun ledje duddjohan, ja doalvvuidet vel mu báhpage. Mus ii leat šat mihkkege, ja dii jearrabehtet, mii mus lea heahtin!” ₂₅Muhto danlaččat dadje: “Jaskkot! Muđui min giivvislunddot olbmát fallehit din, ja dalle don massát heakka oktan olbmáidatguin.” ₂₆Dasto danlaččat manne geidnoseaset. Go Mika oinnii ahte dot ledje gievrrabut go son, de son jorggihii ja máhcai ruoktot. ₂₇Go danlaččat ledje váldán Mikas daid diŋggaid maid son lei duddjohan, ja maiddái su báhpa, de sii fallehedje Lajiša oadjebas álbmoga, godde sin ja bolde gávpoga. ₂₈Ii oktage boahtán veahkehit Lajiša olbmuid, danin go sin gávpot lei Bet-Rehoba duolbadasas guhkkin Sidonis, iige sis lean mihkkege dahkamuššan eará olbmuiguin. Danlaččat huksejedje dan sadjái ođđa gávpoga ja ásse dasa. ₂₉Sii gohčodedje gávpoga Danin áhčiset Dana, Jakoba bártni, mielde, muhto gávpoga namma lei ovdal Lajiš. ₃₀Danlaččat ceggejedje ipmilgova dohko. Jonatan gii lei Mosesa bártni Geršoma nális, ja Jonatana náli olbmát ledje doppe báhppan dassážii go álbmot dolvojuvvui eret eatnamis. ₃₁Danlaččat dolle dan ipmilgova maid Mika lei duddjohan, oppa dan áiggi go Ipmila viessu lei Šilos.