Jeremia 11

₁Dát Hearrá sátni bođii Jeremiai: ₂Almmut Juda olbmáide ja Jerusalema ássiide mu lihtu sániid. ₃Sártno sidjiide: Ná cealká Hearrá, Israela Ipmil: Garuhuvvon lehkos juohkehaš gii ii doahttal mu lihtu sániid! ₄Mun adden daid din áhčiide ja gohččon sin doallat daid, dalle go mun bukten sin Egypta šolgenuvnnas. Mun celken sidjiide: Gullet mu jiena ja dahket buot maid mun gohčun din dahkat, de dii lehpet mu álbmot, ja mun lean din Ipmil, ₅ja mun doalan váli maid vurdnon din áhčiide. Mun lohpidin addit sidjiide eatnama mas golgá mielki ja honnet, ja dan eatnamis dii dál ássabehtet.

Mun vástidin: “Amen, Hearrá.”

₆Hearrá celkkii munnje: Gulat buot dáid sániid Juda gávpogiin ja Jerusalema gáhtain: Gullet dán lihtu sániid ja dollet daid! ₇Dan rájes go mun bukten din áhčiid Egyptas gitta otná beaivvi rádjái, mun lean ávžžuhan doallat dán lihtu. Mun ávžžuhin ovtto din áhčiid: “Gullet mu!” ₈Muhto eai sii gullan mu, eai bivdán bealjige, muhto juohkehaš vádjolii bahás ja buššon váimmus mielde. Dalle mun ollašuhtten dan maid ledjen áigon dahkat, danin go sii eai doallan lihtu sániid maid mun ledjen gohččon sin doallat.

₉Hearrá celkkii munnje: Juda olbmát ja Jerusalema ássit leat dahkan suollemas lihtu. ₁₀Sii dahket dál seammá vearredaguid go sin áhčit geat biehttaledje gullamis mu sániid. Sii vádjolit eará ipmiliid maŋis ja bálvalit daid. Israel ja Juda leat rihkkon lihtu maid mun dahken sin áhčiiguin.

₁₁Dan dihte Hearrá cealká: Mun divttán sin deaivvahallat oasehisvuhtii mas sii eai sáhte vealtat. Go sii čurvot munnje, de mun in guldal sin. ₁₂Go dasto Juda gávpogiid olbmot ja Jerusalema ássit mannet čuorvut daid ipmiliid maidda sii boldet oaffariid, de dat eai gájo sin go oasehisvuohta boahtá. ₁₃Dus, Juda, leat nu eatnat ipmilat go dus leat gávpogat! Ja nu eatnat go Jerusalemis leat gáhtat, nu eatnat dan olbmot leat ceggen áltáriid Heahpadii, vai besset boaldit oaffariid Baalii. ₁₄Ale rohkadala dán álbmoga ovddas. Ale loaiddas mu ovdii átnut ja rohkadallat dáid olbmuid ovddas, dasgo mun in guldal sin go sii čurvot munnje oasehisvuođa beaivvi.

₁₇Hearrá, Almmiveagaid Ipmil, guhte lea gilván du, lea mearridan dutnje oasehisvuođa Israela ja Juda viesuid bahádaguid dihte, maid sii leat dahkan ja maiguin sii leat moaráhuhttán Hearrá, go sii bolde oaffariid Baalii.

₁₈Hearrá almmuhii munnje, ja mun ožžon diehtit, ja don čájehit munnje sin daguid. ₁₉Mun ledjen dego lojes láppis mii dolvojuvvo njuovvamii, inge mun diehtán ahte sii hutke baháid mu vuostá ja dadje: “Billistehkot muora oktan šattuidisguin! Heavahehkot su ealli olbmuid eatnamis, vai su namma ii šat muitojuvvo!”

₂₁Ná cealká Hearrá: Anatota olbmát bivdet du heakka ja dadjet: Ale profehtastala Hearrá nammii, muđui mii goddit du. ₂₂Muhto Hearrá, Almmiveagaid Ipmil, cealká: Mun mávssahan sidjiide! Sin nuorra olbmáid goddá miehkki, sin bártnit ja nieiddat jápmet nealgái. ₂₃Sis ii báze ii oktage, danin go mun divttán Anatota olbmáid deaivvahallat oasehisvuhtii dan jagi go sii ráŋggáštuvvojit.