Job 17

₁Mu eallinfápmu lea doddjon,

mu beaivvit leat čáskan,

mu ovddas lea hávdi.

₂Bilkárat birastahttet mu,

mun oainnán dušše sin vašálašvuođa.

₃Bija datte pántta, dáhkit mu!

Eará sihkkarvuohta mus ii leat.

₄Don leat dahppan sin váimmu

nu ahte sii eai ipmir,

danin don it suova sin vuoitit.

₅Jos muhtun beahttá ustibis ruđa dihte,

de su mánát šaddet gillát das

maid son lea dahkan.

₆Ipmil lea dahkan mu

buohkaid sátnevájasin,

olbmot čolget mu muođuid njeaiga.

₇Moraš lea sevnnjodahttán

mu čalmmiid,

mu rumaš lea dušše suoivvan.

₈Visot dát surgeha vuoigatlaš olbmuid,

sivaheapme suhttá ipmilmeahttuma dihte.

₉Ja dattetge vanhurskkis

vádjola stáđđásit,

dat geas leat buhtis gieđat,

oažžu ain eambbo fámu.

₁₀Muhto sárdnot fal, dii buohkat!

Mun in dattetge gávnna

din gaskkas ovttage viisá.

₁₁Mu áigi lea nohkan,

mu áigumušat cuvkejuvvon,

buot mu váimmu sávaldagat.

₁₂Sii lohket ija beaivin,

sii celket ahte čuovga

lea lagabus go seavdnjadas.

₁₃Leago mus doaivu?

Jábmiidáibmu lea mu visti,

seavdnjadassii

mun lážán alccesan oađđinsaji.

₁₄Mun gohčodan hávddi áhččin

ja máđuid eadnin ja oabbán.

₁₅Gos dalle livččii mu doaivu?

Gos mu vuorddášii lihkku?

₁₆Mannágo doaivuge jábmiidáibmui

oktanaga muinna?

Loaiddastago dat muinna muldii?