Josua 2

₁Josua, Nuna bárdni, vuolggahii Šittimis guokte iskkadeaddji ja gohčui sudno geahčadit eatnama ja Jeriko gávpoga. Soai vulggiiga Jerikoi ja manaiga Rahab-nammasaš fuorá vissui, vai beassaba idjadit das. ₂Muhto Jeriko gonagas gulai ahte muhtun israellaš olbmát ledje boahtán dan ija Jerikoi iskkadit eatnama, ₃ja son bijai Rahabii sáni: “Vuolggat deike daid olbmáid geat bođiiga du vissui. Soai leaba boahtán iskkadit eatnama.” ₄Muhto Rahab čiegai dan guoktá ja dajai: “Olbmát gal finaiga mu luhtte, muhto mun in dieđe gos soai bođiiga. ₅Soai vulggiiga dalle go sevnnjodii, aiddo dalle go gávpotpoarta galggai dahppojuvvot, inge mun dieđe gosa soai manaiga. Doamihehket doarridit dan guoktá, de juksabehtet sudno.” ₆Rahab lei dolvon olbmáid gáhtu ala ja gokčan sudno beallemasoalggaiguin maid lei lebbon dohko. ₇Gonagasa olbmát vulge doarridit iskkadeddjiid Jordana guvlui gitta gállamiid rádjái, ja go doarrideaddjit ledje mannan, de gávpotpoarta dahppojuvvui.

₈Ovdal go iskkadeaddjit leigga veallánan, de Rahab goarkŋui sudno lusa gáhtu ala. ₉Son dajai: “Mun dieđán ahte Hearrá lea addán didjiide dán eatnama. Mii leat dohppehallan ballui, ja buot eatnama ássit roahppánit din dihte. ₁₀Mii leat gullan mo Hearrá goikadii Ruksesmeara čáziid din ovddas go dii vulggiidet Egyptas. Mii diehtit ahte don bealde Jordana dii vihaheiddet duššadeapmái amorlaččaid gonagasaguoktá Sihona ja Oga ja gottiidet sudno. ₁₁Go mii gulaimet dan, de mii hearddohuvaimet, iige mis leat šat roahkkatvuohta vuostálastit din, danin go Hearrá, din Ipmil, lea almmi ja eatnama Ipmil. ₁₂Mun in beahttán dudno, muhto gádjon dudno heakka. Vuordnu dál munnje Hearrá nammii ahte doaige gádjubeahtti mu áhči soga. Addi munnje mearkka iežade oskkáldasvuođas. ₁₃Dikti áhččán, eadnán, vieljaidan, oappáidan ja oppa sin veaga eallit, ja gáddju min heakka jápmimis.” ₁₄Olbmáguovttos dajaiga sutnje: “Moai letne geatnegasat jápmit din sadjái, jus ean daga maid don ánut. Muhto ale dieđit geasage munno ášši. Go Hearrá addá midjiide dán eatnama, de mii gádjut din heakka. Dasa dii oažžubehtet luohttit.”

₁₅De Rahab luittii sudno láseráigge báttiin vuolás muvrra olggobeallái. Su viessu lei gitta gávpotmuvrras, ja son ásai muvrra siste. ₁₆Son neavvui sudno: “Manni váriide, vai din doarrideaddjit eai fáhte dudno, ja čiehkádeahkki dohko golmma beaivái. Go doarrideaddjit leat máhccan, de dalle sáhttibeahtti mannat geidnoseatte.” ₁₇Olbmát dajaiga sutnje: “Moai letne friddja dan vális maid vuortnuime dutnje, jus it daga nugo moai gohččo. ₁₈Go mii boahtit dán eatnamii, de galggat čatnat dán rukses bátti dan láseráigái gokko luitet munno vuolás, ja čohkket áhčát, eatnát, vieljaidat ja oppa áhčát veaga iežat lusa vissui. ₁₉Juohkehaš gii manná viesus olggos, lea sivalaš iežas jápmimii, ja moai letne vigiheamit. Muhto jos mii goddit ovttage gii lea du luhtte viesus, de moai letne sivalaččat su jápmimii. ₂₀Ja jos don beahtát munno, de moai letne čovdojuvvon dan vális maid bidjet munno vuordnut.” ₂₁Rahab dajai: “Lehkos nu go dadjabeahtti.” De son luittii olbmáguoktá mannat. Ja son čanai dan rukses bátti láseráigái.

₂₂Olbmáguovttos vulggiiga váriide ja oruiga doppe golbma beaivvi, dassážii go doarrideaddjit ledje máhccan. Sii ohce sudno miehtá oppa geainnu, muhto eai gávdnan. ₂₃Dasto olbmáguovttos njiejaiga váriin, rasttildeigga Jordana ja bođiiga Josua, Nuna bártni, lusa. Soai muitaleigga sutnje buot mii sudnuide lei dáhpáhuvvan ₂₄ja dajaiga: “Hearrá lea addán oppa eatnama min gihtii, ja buot eatnama ássit leat hearddohuvvan.”