3. Mosesgirji 11

₁Hearrá sártnui Mosesii ja Aronii:

₂Cealki israellaččaide: Buot eananelliin dii oažžubehtet borrat njealjejuolggagiid ₃main leat guovttesuorat guohpirat ja mat smirezastet. ₄Muhto dii ehpet oaččo borrat dáid elliid, vaikko dat smirezastet dahje vaikko dain leat guohpirat: kamela mii gal smirezastá muhto mas eai leat guohpirat, dat lea buhtismeahttun; ₅báktemievri mii gal smirezastá, muhto mas eai leat guohpirat, dat lea buhtismeahttun; ₆njoammil mii gal smirezastá, muhto mas eai leat guohpirat, dat lea buhtismeahttun; ₇spiidni mas gal leat guovttesuorat guohpirat, muhto mii ii smires, dat lea buhtismeahttun. ₈Daid bierggu ehpet oaččo borrat ja daid rábbái ehpet oaččo guoskat. Dat leat buhtismeahttumat.

₉Dii oažžubehtet borrat čáhceelliid main leat veavssit ja čuopmasat. ₁₀Muhto dii galgabehtet fasttášit buot elliid mat ellet mearas ja jogain ja main eai leat veavssit eaige čuopmasat, ležžet dal smávvaeallit dahje eará čáhceeallit. ₁₁Daid dii galgabehtet atnit fastin; daid ehpet oaččo borrat, ja daid jápma gorudiid galgabehtet fasttášit. ₁₂Buot čázi heakkalaččaid main eai leat veavssit eaige čuopmasat, dii galgabehtet atnit fastin.

₁₃Dáid lottiid dii galgabehtet fasttášit ehpetge oaččo daid borrat: goaskin, čuonjáráhtogoaskin, skávžáráhtogoaskin, ₁₄suorrehávka ja eará hávkkat, ₁₅buot garjálottit, ₁₆struhcca, skuolfi, skávli ja buot fállit, ₁₇cihceskuolfi, skárfa ja lidnu, ₁₈bealljeloađgu, pelikána ja čiekčá, ₁₉gáhttoháigir ja eará háigirat, vuoktaloddi ja náhkkesoadjá.

₂₀Buot njealjejuolggat smávva soajálaččaid dii galgabehtet fasttášit. ₂₁Buot njealjejuolggat smávva soajálaččain dii oažžubehtet borrat daid main eará julggiid lassin leat njuikunjuolggit. ₂₂Dáin dii oažžubehtet borrat buot johtti rásselohkuid, buot solamrásselohkuid, buot hargolrásselohkuid ja buot hagabrásselohkuid. ₂₃Buot eará njealjejuolggat smávva soajálaččaid dii galgabehtet fasttášit.

₂₄Dát mearrádusat gusket elliide mat dahket din buhtismeahttumin. Juohkehaš gii guoská daid rábbái, lea buhtismeahttun eahkeda rádjái, ₂₅ja dat gii lea guoddán dakkár ráppi, galgá bassat biktasiiddis, ja son lea buhtismeahttun eahkeda rádjái. ₂₆Dákkárat leat eallit main leat guohpirat, maid guohpirat eai leat ollásit guovttesuoragat ja mat eai smirezastte, dat leat buhtismeahttumat. Dat gii guoská daidda, šaddá buhtismeahttumin. ₂₇Buot njealjejuolggat eallit main leat rápmážat, leat buhtismeahttumat. Juohkehaš gii guoská daid rábbái, lea buhtismeahttun eahkeda rádjái. ₂₈Dat gii lea guoddán dakkár ráppi, galgá bassat biktasiiddis, ja son lea buhtismeahttun eahkeda rádjái. Dáid dii galgabehtet atnit buhtismeahttumin.

₂₉Dát smávvaeallit mat lihkadit eatnamis, leat buhtismeahttumat: buoidda, sáhpán ja buot lakkisšlájat, ₃₀gekko, koahlakkis, letaalakkis, salamander ja kameleona. ₃₁Buot dát smávvaeallit leat buhtismeahttumat. Juohkehaš gii guoská daidda go dat leat jápmán, lea buhtismeahttun eahkeda rádjái. ₃₂Buot maid ala dakkár jápma ealli gahččá, šaddá buhtismeahttumin, leaččai dat dal muorradiŋga, bivttas, náhkki, horsta dahje eará atnudiŋga. Dan galgá doidit čázis, ja dat lea buhtismeahttun eahkeda rádjái; de dat lea fas buhtis. ₃₃Jos dakkár ealli gahččá láirelihttái, de buot mii das lea, šaddá buhtismeahttumin, ja lihti galgá cuvket. ₃₄Buot borramuš maid muđui sáhttá borrat, muhto mii lea guoskkahan dan čázi, šaddá buhtismeahttumin, ja buot juhkamuš maid muđui sáhttá juhkat, šaddá buhtismeahttumin dakkár lihtis. ₃₅Láibunuvnna dahje ommana man ala dakkár jápma ealli gahččá, ferte gaikut, danin go dat lea šaddan buhtismeahttumin. ₃₆Muhto ája dahje arvegáivo bissu buhtisin. Dušše dat gii guoská jápma eallái, šaddá buhtismeahttumin. ₃₇Jos jápma ealli gahččá gilvvagortniid ala mat leat gilvimassii, de dat bissot almmatge buhtisin, ₃₈muhto jos gilvvagortnit leat šaddan lávttasin ja jápma ealli gahččá daid ala, de dii galgabehtet atnit daid buhtismeahttumin.

₃₉Jos dakkár eananealli maid dii muđui oččošeiddet borrat, jápmá, de dat gii guoská dan rábbái, lea buhtismeahttun eahkeda rádjái. ₄₀Dat gii borrá dan ráppi bierggu, galgá bassat biktasiiddis, ja son lea buhtismeahttun eahkeda rádjái. Dat gii guoddá dakkár ráppi, galgá bassat biktasiiddis, ja son lea buhtismeahttun eahkeda rádjái.

₄₁Buot smávvaeallit mat njommot eatnamis, leat fasttit, daid ii oaččo borrat. ₄₂Eatnamis lihkadeaddji njoammut dahje smávvaeallit main leat njeallje juolggi dahje eambbo, leat fasttit; daid ehpet oaččo borrat. ₄₃Allet daga iežadet buhtismeahttumin nu ahte guoskkahehpet dakkár eallái, ja váruhehket muđuige šaddamis dain buhtismeahttumin. ₄₄Mun lean Hearrá, din Ipmil, lean bassi, ja danin dii galgabehtet doallat iežadet buhtisin ja bassin. Allet daga iežadet buhtismeahttumin nu ahte guoskkahehpet mange smávva ealli mii lihkada eatnamis. ₄₅Mun lean Hearrá guhte bukten din Egyptas vai mun livččen din Ipmil. Lehket dan dihte basit, danin go mun lean bassi.

₄₆Dát lea láhka mii guoská eananelliide ja lottiide ja buot heakkalaččaide mat lihkadit čázis, ja buot heakkalaččaide mat lihkadit eatnamis. ₄₇Ná dii máhttibehtet earuhit buhttása buhtismeahttumis ja daid elliid maid oažžu borrat, dain elliin maid ii oaččo borrat.