Lukas 20

₁Go Jesus muhtun beaivvi fas lei oahpaheamen olbmuid tempelis ja sárdnideamen evangeliuma, de bohte bajimusbáhpat ja čáloahppavaččat oktan vuorrasiiguin su lusa ₂ja jerre: “Muital midjiide mainna válddiin don dagat dáid daguid. Gii lea addán dutnje dása válddi?” ₃Jesus vástidii sidjiide: “Mus maiddái lea gažaldat didjiide. Muitalehket munnje, ₄bođiigo Johannesa gásta almmis vai olbmuin.” ₅Sii árvaladde gaskaneaset ja dadje: “Jos mii vástidit: ‘Almmis’, de son jearrá: ‘Manne dalle ehpet oskon sutnje?’ ₆Muhto jos mii dadjat: ‘Olbmuin’, de álbmot geađgáda min, danne go sii leat čavga dan oaivilis ahte Johannes lei profehta.” ₇Ja sii vástidedje ahte eai diehtán dan. ₈Dalle Jesus celkkii sidjiide: “Dalle in munge cealkke didjiide mainna válddiin mun dagan buot dáid daguid.”

₉Jesus muitalii álbmogii dán veardádusa:

“Muhtin olmmái gilvvii viidnegárddi, láigohii dan láigoheddjiide ja fárrii olgoeatnamii guhkes áigái. ₁₀Go áigi bođii, de son vuolggahii bálvaleaddji viidnegárddi láigoheddjiid lusa, vai sii addet sutnje oasi viidnegárddi šattus. Muhto láigoheaddjit cábme bálvaleaddji ja bidje su mannat guoros gieđaid. ₁₁Dalle eaiggát vuolggahii nuppi bálvaleaddji, muhto láigoheaddjit cábme sunai, hiddjidedje su ja bidje su mannat guoros gieđaid. ₁₂Olmmái vuolggahii vel goalmmát bálvaleaddji, muhto su sii hávváduhtte ja norddastedje olggos. ₁₃Dalle viidnegárddi eaiggát jurddašii: ‘Maid mun dál dagan? Mun vuolggahan dohko iežan ráhkis bártni. Almma sii su goit gudnejahttet.’ ₁₄Muhto go láigoheaddjit oidne bártni, de sii árvaledje guhtet guimmiineaset: ‘Diet lea árbbolaš! Goddot su, de mii oažžut su árbbi.’ ₁₅Ja sii bálkestedje su viidnegárddis olggos ja godde.

Maid dalle viidnegárddi eaiggát dahká sidjiide? ₁₆Son boahtá ja goddá láigoheddjiid ja addá viidnegárddi earáide.” Go olbmot dan gulle, de sii dadje: “Dat ii oaččo goassege šaddat!” ₁₇Jesus geahčai olbmuide ja celkkii: “Maid dalle mearkkaša dat mii lea čállojuvvon: Geađgi maid huksejeaddjit hilgo, lea šaddan čiehkageađgin. ₁₈Juohkehaš gii jorrala dán geađgái, njuvdása, ja gean ala dat gahččá, dan dat cuvke.”

₁₉Čáloahppavaččat ja bajimusbáhpat livčče dáhtton dohppet su dallánaga, muhto sii balle olbmuin. Sii áddejedje ahte son muitalii dán veardádusa sin birra.

₂₀Láhkadovdit ja bajimusbáhpat váruhedje Jesusa ja vuolggahedje su lusa sovččadeddjiid geat dahkaludde vanhurskkisin. Sii geahččaledje giellat su su iežas sániide, vai besset addit su eiseválddiid gihtii ja eatnanhearrá váldái. ₂₁Olbmát dadje sutnje: “Oahpaheaddji, mii diehtit ahte don sártnut ja oahpahat riekta. Don it geahča olbmo hápmái, muhto oahpahat Ipmila geainnu duohtavuođas. ₂₂Leago midjiide lobálaš máksit vearuid keaisárii vai ii?” ₂₃Muhto Jesus fuopmášii sin gávvilvuođa ja dajai: ₂₄“Čájehehket munnje denára. Gean govva ja namma das lea?” Sii vástidedje: “Keaisára.” ₂₅Dalle Jesus celkkii sidjiide: “Addet dalle keaisárii mii lea keaisára ja Ipmilii mii lea Ipmila.” ₂₆Sii eai máhttán olbmuid gullut giellat Jesusa su iežas sániide; sii ovddošedje Jesusa vástádusa ja jávohuvve.

₂₇Jesusa lusa bohte muhtun saddukealaččat, dat geat biehttalit bajásčuožžileami. Sii jerre sus: ₂₈“Oahpaheaddji, Moses lea mearridan ná: Jos olbmás lea náitalan viellja gii jápmá mánáheapmin, de olmmái galgá váldit vieljas áhká ja čuoččáldahttit náli vielljasis. ₂₉De ledje čieža vieljaža. Boarráseamos sis válddii áhká ja jámii mánáheapmin. ₃₀Dalle nubbi válddii su, ₃₁de goalmmát, ja nu buot čiežas. Sii buohkat jápme mánáheapmin. ₃₂Maŋimustá jámii nisson. ₃₃Gean áhkká son lea bajásčuožžileamis? Sonhan lea leamaš buot čiehčasa áhkkán.”

₃₄Jesus vástidii: “Dán máilmmi olbmot náitalit ja náitojuvvojit, ₃₅muhto dat geat adnojuvvojit dohkálažžan oažžut oasi don máilmmis ja čuožžilit jábmiid luhtte, eai náital eaige náitojuvvo. ₃₆Sii eai sáhte šat jápmit, sii leat eŋgeliid láhkásaččat. Sii leat Ipmila mánát, dainna go sii leat čuožžilan jábmiid luhtte. ₃₇Ja dan ahte jábmit čuožžilit bajás, lea maiddái Moses čájehan bastilislátnjámuitalusas. Sonhan dadjá ahte Hearrá lea Abrahama Ipmil, Isaka Ipmil ja Jakoba Ipmil. ₃₈Ii son leat jábmiid, muhto ealli olbmuid Ipmil, dasgo sutnje buohkat ellet.” ₃₉Muhtun čáloahppavaččat dadje: “Oahpaheaddji, don vástidit bures.” ₄₀Dalle ii oktage šat duostan jearrat sus maidege.

₄₁Jesus jearai sis: “Mo olbmot sáhttet dadjat ahte Messias lea Davida bárdni? ₄₂David ieš cealká Sálmmaid girjjis: Hearrá celkkii mu hearrái: Čohkán mu olgeš beallái, ₄₃de mun bijan du vašálaččaid du julggiid vuolušin. ₄₄David nappo gohčoda Messiasa hearrán. Mo Messias dalle sáhttá leat su bárdni?”

₄₅Buot olbmuid gullut Jesus celkkii máhttájeddjiidasas: ₄₆“Váruhehket čáloahppavaččain! Sii liikojit váccašit guhkes biktasat gárvun ja leat buori mielas go olbmot dearvvahit sin márkanšiljus, sii váldet synagogas ovddemus sajiid ja čohkkájit boaššumusas go leat guossis, ₄₇muhto loktet leaskkaid viesuid ja dušše hámi dihte lohket guhkes rohkosiid. Dađe garraseabbo lea sin duopmu.”