Matteus 1

₁Dát lea Jesus Kristusa, Davida bártni ja Abrahama bártni, sohkalogahallan: ₂Abrahamii riegádii Isak, Isakii riegádii Jakob, Jakobii riegádedje Juda ja su vieljat, ₃Judai riegádeigga Peres ja Sera, geaid eadni lei Tamar, Peresii riegádii Hesron, Hesronii riegádii Aram, ₄Aramii riegádii Amminadab, Amminadabii riegádii Nahšon, Nahšonii riegádii Salma, ₅Salmai riegádii Boas, gean eadni lei Rahab, Boasii riegádii Obed, gean eadni lei Rut, Obedii riegádii Isai, ₆ja Isajii riegádii David, gonagas.

Davidii riegádii Salomo, gean eadni lei Uria áhkká, ₇Salomoi riegádii Rehabeam, Rehabeamii riegádii Abia, Abiai riegádii Asaf, ₈Asafii riegádii Jošafat, Jošafatii riegádii Joram, Joramii riegádii Ussia, ₉Ussiai riegádii Jotam, Jotamii riegádii Ahas, Ahasii riegádii Hiskia, ₁₀Hiskiai riegádii Manasse, Manassei riegádii Amos, Amosii riegádii Jošia, ₁₁Jošiai riegádedje Jojakin ja su vieljat dan áigge go álbmot dolvojuvvui Babylonii.

₁₂Maŋŋil go álbmot dolvojuvvui Babylonii, de Jojakinii riegádii Šealtiel, Šealtielii riegádii Serubbabel, ₁₃Serubbabelii riegádii Abihud, Abihudii riegádii Eljakim, Eljakimii riegádii Asur, ₁₄Asurii riegádii Sadok, Sadokii riegádii Akim, Akimii riegádii Elihud, ₁₅Elihudii riegádii Eleasar, Eleasarii riegádii Mattan, Mattanii riegádii Jakob, ₁₆ja Jakobii riegádii Josef, Maria boadnjá. Maria riegádahtii Jesusa, gii gohčoduvvo Kristusin.

₁₇Nu leat nappo oktiibuot njealljenuppelohkái buolvva Abrahama rájes Davida rádjái, njealljenuppelohkái buolvva Davida rájes Babylonia fáŋgavuođa rádjái, ja njealljenuppelohkái buolvva Babylonia fáŋgavuođa rájes Kristusa rádjái.

₁₈Jesus Kristusa riegádeapmi dáhpáhuvai ná: Maria, Jesusa eadni, lei lohpádallan Josefiin. Ovdal go soai leigga ealligoahtán ovttas, de bođii albmosii ahte Maria lei máná vuostá Bassi Vuoiŋŋa bokte. ₁₉Josef, su boadnjá, lei vuoiggalaš olmmái iige dáhtton heahppášuhttit su, ja son áiggui earránit sus suollemasat. ₂₀Muhto go Josef lei mearridan dahkat nu, de Hearrá eŋgel almmustuvai sutnje niegus ja celkkii: “Josef, Davida bárdni, ale bala váldimis Maria áhkkán, dasgo mánná mii lea su siste, lea sahkanan Bassi Vuoiŋŋas. ₂₁Son riegádahttá bártni, ja don galggat bidjat bárdnái namman Jesus, dasgo son beastá iežas álbmoga sin suttuin.” ₂₂Buot dát dáhpáhuvai vai ollašuvvá dat maid Hearrá lei cealkán profehta bokte: ₂₃Geahča, nieida šaddá máná vuostá ja riegádahttá bártni, ja sutnje biddjojuvvo namman Immanuel – dat mearkkaša: Ipmil lea minguin. ₂₄Go Josef gohccái nahkáriin, de son dagai nugo Hearrá eŋgel lei gohččon, ja válddii Maria áhkkán. ₂₅Son ii eallán suinna ovdal go Maria lei riegádahttán bártni. Josef bijai bárdnái namman Jesus.