Matteus 10

₁Jesus rávkkai lusas guoktenuppelohkái máhttájeaddjis ja attii sidjiide válddi ádjit olggos buhtismeahttun vuoiŋŋaid ja buoridit buotlágán buozalvasaid ja skibaid. ₂Dát leat dan guoktenuppelohkái apostala namat:

Vuosttaš lea Simon gii gohčoduvvui Peterin, ja su viellja Andreas, Jakob Sebedeusa bárdni ja su viellja Johannes, ₃Filip ja Bartolomeus, Tomas ja tuollár Matteus, Jakob, Alfeusa bárdni ja Taddeus, ₄Simon Kananeus ja Judas Iskariot, gii behtii su.

₅Dán guoktenuppelohkása Jesus vuolggahii, ja son rávvii sin ná:

“Allet mana báhkiniid guovlluide alletge samarialaččaid gávpogiidda. ₆Mannet baicca Israela álbmoga láhppon sávzzaid lusa ₇ja sárdnidehket: ‘Almmi riika lea boahtán lahka.’ ₈Buoridehket buhcciid, boktet jábmiid, buhtistehket spihtálaččaid ja ádjet olggos bahás vuoiŋŋaid. Nuvttá dii lehpet ožžon, nuvttá addet. ₉Allet váldde boahkánii golli, silbba alletge veaikki, ₁₀allet váldde lávkka, liigebáiddi dahje gápmagiid alletge soappi. Bargi lea ánssášan biepmus. ₁₁Go boahtibehtet muhtin gávpogii dahje gillái, de gávnnahehket gii doppe lea dohkálaš váldit din vuostá, ja orrot das dassážii go vuolgibehtet. ₁₂Go boahtibehtet vissui, de dearvvahehket dáluolbmuid ráfisávaldagain. ₁₃Jos viessu lea dohkálaš, de bohtos dasa ráfi maid lehpet sávvan, muhto jos viessu ii leat dohkálaš, de máhccos din ráfi didjiide. ₁₄Jos muhtun viesus dahje gávpogis olbmot eai dáhto váldit din vuostá eaige gullat din sániid, de vulget doppe ja savdnjilehket vel gavjjage julggiin. ₁₅Duođaid, mun cealkkán didjiide: Sodoma ja Gomorra eatnamii geavvá duopmobeaivvi geahppadeappot go dan gávpogii.

₁₆Mun vuolggahan din dego sávzzaid gumppiid gaskii. Šaddet dan dihte jierpmálažžan dego gearbmašat ja vigiheapmin dego duvvát. ₁₇Váruhehket, danin go olbmot dolvot din rievtti ovdii ja huškot din synagogaineaset. ₁₈Dii dolvojuvvobehtet eatnanhearráid ja gonagasaid ovdii mu dihte, duođaštussan sidjiide ja álbmogiidda. ₁₉Muhto go sii addet din eiseválddiid gihtii, de allet bala mo sárdnubehtet dahje maid dadjabehtet. Dasgo dat mii lea dárbbašlaš dadjat, addojuvvo didjiide aiddo dan bottus. ₂₀Ehpet dii ieža sártno, muhto Áhčádet Vuoigŋa sárdnu din bokte. ₂₁Viellja beahttá vieljas jápmimii, áhčči mánás, ja mánát čuožžilit vánhemiiddiset vuostá ja dagahit sidjiide jápmima. ₂₂Buohkat vašuhit din mu nama dihte, muhto gii bissu nanusin loahpa rádjái, dat bestojuvvo. ₂₃Go dii doarrádallojuvvobehtet ovtta gávpogis, de báhtarehket nubbái. Duođaid, mun cealkkán didjiide: Dii ehpet geargga buot Israela gávpogiin ovdal go Olbmobárdni boahtá.

₂₄Ii máhttájeaddji leat alit go su oahpaheaddji iige bálvaleaddji alit go su hearrá. ₂₅Máhttájeaddjái lea doarvái go sutnje geavvá nugo su oahpaheaddjái, ja bálvaleaddjái go sutnje geavvá nugo su hearrái. Jos dáluisida leat gohčodan Beelsebulin, de sáhttetgo dáluolbmot vuordit buorebu?

₂₆Allet bala sis. Ii leat čiehká mii ii gávdnoše, iige čiegusvuohta mii ii boađáše albmosii. ₂₇Dan maid mun sártnun didjiide seavdnjadin, dan sárdnot čuovgadin, ja mii din bealljái savkaluvvo, dan čurvot viessodáhkiin.

₂₈Allet bala dain geat goddet rupmaša, muhto eai sáhte goddit sielu. Ballet baicca sus gii sáhttá heavahit sielu ja rupmaša helvehii. ₂₉Almma guokte cizáža vuvdojuvvojit šlántii? Muhto ii oktage dain gahča eatnamii din Áhči sállekeahttá. ₃₀Ja velá din oaivvi vuoktačalmmitge leat lohkkojuvvon. ₃₁Allet nappo bala: Diihan lehpet mávssoleappot go eatnat cizážat.

₃₂Gii dovddasta mu olbmuid ovddas, dan munge dovddastan Áhččán ovddas almmis. ₃₃Muhto gii biehttala mu olbmuid ovddas, dan munge biehttalan Áhččán ovddas guhte lea almmis.

₃₄Allet gátte ahte mun lean boahtán buktit ráfi eatnama ala. In mun leat boahtán buktit ráfi, muhto miehki.

₃₅Mun lean boahtán čuoččáldahttit bártni áhčis, nieidda eatnis ja manji vuotnámis vuostá, ₃₆ja olbmo vašálažžan šaddet su iežas dáluolbmot.

₃₇Gii ráhkista áhčis dahje eatnis eambbo go mu, dat ii dohkke munnje, iige dat gii ráhkista bártnis dahje nieiddas eambbo go mu, dohkke munnje. ₃₈Gii ii váldde iežas ruossa ja čuovo mu, dat ii dohkke munnje. ₃₉Gii várjala iežas eallima, dat massá dan, muhto gii massá iežas eallima mu dihte, dat gávdná dan.

₄₀Gii váldá vuostá din, dat váldá vuostá mu, ja gii váldá vuostá mu, dat váldá vuostá su gii mu lea vuolggahan. ₄₁Gii váldá vuostá profehta danne go son lea profehta, dat oažžu profehta bálkká, ja gii váldá vuostá vuoiggalaš olbmo danne go son lea vuoiggalaš, dat oažžu vuoiggalaš olbmo bálkká. ₄₂Ja gii addá oktiige dáin smávváin guvssi dievva galbma čázi juhkat dušše danne go son lea máhttájeaddji – duođaid, mun cealkkán didjiide: Son oažžu jur vissásit bálkkás.”