Matteus 12

₁Daid áiggiid Jesus sabbahin váccii gordnebealddu čađa. Su máhttájeaddjit borastuvvagohte ja ripme doahput gordneoivviid ja borrat. ₂Farisealaččat oidne dan ja dadje Jesusii: “Geahča dál, du máhttájeaddjit dahket dan maid sabbahin ii leat lobálaš dahkat.” ₃Jesus vástidii: “Ehpetgo leat lohkan maid David dagai, go son ja su olbmát ledje nealgumin? ₄Son manai Ipmila vissui ja borai oaffarláibbiid maid duššefal báhpain lei lohpi borrat, ii sus iige su olbmáin. ₅Dahje ehpetgo leat lohkan lágas ahte báhpat tempelis rihkkot sabbaha ja leat almmatge sivaheamit? ₆Mun cealkkán didjiide: Dá dis lea eambbo go tempel. ₇Jos dii áddešeiddet maid dát sátni mearkkaša: Váibmoláđisvuođa mun dáhtun, inge oaffara, de dii ehpet dubmeše sivahis olbmuid. ₈Dasgo Olbmobárdni lea sabbaha hearrá.”

₉Jesus vulggii das ja manai sin synagogai. ₁₀Doppe lei olmmái geas giehta lei ástan. Farisealaččat jerre Jesusis vai besset su váidit: “Leago sabbahin lobálaš buoridit?” ₁₁Jesus vástidii sidjiide: “Jos muhtumis dis lea sávza ja dat gahččá roggái sabbahin, de almma son dohppe dan ja lokte dan doppe bajás? ₁₂Ja olmmošhan lea ollu mávssoleabbo go sávza. Gal sabbahin lea lobálaš dahkat buriid.” ₁₃De son celkkii olbmái: “Geige gieđa.” Olmmái geigii gieđa, ja dat šattai seammá dearvvašin go nubbi giehtage. ₁₄Dalle farisealaččat manne olggos ja ráđđádallagohte, mo sii sáhttet goddit Jesusa.

₁₅Go Jesus dan gulai, de son vulggii doppe. Eatnagat vádjoledje su maŋis, ja son buoridii buot buhcciid. ₁₆Son gilddii sin garrasit muitaleames gii son lea, ₁₇vai ollašuvvá dat mii lea celkojuvvon profehta Jesaja bokte: ₁₈Dát lea mu bálvaleaddji gean mun lean válljen; su mun ráhkistan, ja son illudahttá mu sielu. Mun bijan Vuoigŋan su badjelii, ja son gulaha álbmogiidda vuoigatvuođa. ₁₉Ii son bealkke iige čuorvvo, iige oktage gula su jiena gáhtas. ₂₀Doddjon skáhčira son ii cuvke, suovasteaddji veaikka son ii jáddat, muhto ovddida vuoigatvuođa vuitui. ₂₁Su nammii álbmogat bidjet doaivvu.

₂₂Dasto Jesusa lusa buktojuvvui čalmmehis ja gielahis olmmái geas lei bahás vuoigŋa. Jesus buoridii su, nu ahte olmmái sártnui ja oinnii. ₂₃Buohkat ovddošedje ja dadje: “Iigoson dát leat Davida Bárdni?” ₂₄Go farisealaččat dan gulle, de sii dadje: “Bahás vuoiŋŋaid oaivámučča Beelsebula vehkiin son ádjá olggos bahás vuoiŋŋaid.” ₂₅Jesus diđii sin jurdagiid ja celkkii sidjiide: “Juohke riika mii juohkása ja soahtá iežainis, duššá, iige oktage gávpot dahje bearaš biso, jos dat lea juohkásan. ₂₆Jos Sáhtán ádjá olggos Sáhtána, de dalle son lea čuožžilan iežas vuostá. Mo sáhttá su riika dalle bissut? ₂₇Jos mun áján bahás vuoiŋŋaid olggos Beelsebula vehkiin, de gean vehkiin din iežadet olbmot ádjet daid olggos? Dan dihte sii šaddet din duopmárin. ₂₈Muhto jos mun áján bahás vuoiŋŋaid olggos Ipmila Vuoiŋŋa fámuin, de dallehan Ipmila riika lea boahtán din lusa. ₂₉Mo oktage sáhttá bahkket gievrras olbmá vissui ja stajidit su biergasiid, jos son ii vuos čana su? Dalle easkka son sáhttá stajidit su viesu. ₃₀Gii ii leat muinna, dat lea mu vuostá; gii ii muinna čohkke, dat biđge.

₃₁Danne mun cealkkán didjiide: Juohke suddu ja bilkádus addojuvvo olbmuide ándagassii, muhto Vuoiŋŋa bilkádus ii ándagassii addojuvvo. ₃₂Gii sárdnu juoidá Olbmobártni vuostá, de dasa addojuvvo ándagassii, muhto gii sárdnu Bassi Vuoiŋŋa vuostá, de dasa ii ándagassii addojuvvo, ii dálá iige boahtti máilmmis.

₃₃Jos muorra lea buorre, de dan šattusge lea buorre, muhto jos muorra lea heittot, de dan šattusge leat heittot. Šaddosisttis muorra dovdojuvvo. ₃₄Dii gearbmaščivggat, mo dii geat lehpet bahát, sáhttibehtet sárdnut buriid, go dii ieža lehpet bahát? Mii váimmu deavdá, dan njálbmi sárdnu. ₃₅Buorre olmmoš buktá buorrevuođa rájustis ovdan buriid, bahás olmmoš bahávuođa rájustis baháid. ₃₆Mun cealkkán didjiide: Juohke duššálaš sánis maid olbmot dadjet, sii šaddet vástidit duopmobeaivvi. ₃₇Sániidat mielde don celkojuvvot sivaheapmin, ja sániidat mielde don dubmejuvvot sivalažžan.”

₃₈Dalle muhtun čáloahppavaččat ja farisealaččat dadje Jesusii: “Oahpaheaddji, atte dás min oaidnut mearkka.” ₃₉Muhto Jesus vástidii sidjiide: “Dát bahás ja oskkáldasmeahttun buolva gáibida mearkka, muhto áidna mearka mii dasa addojuvvo, lea profehta Jona mearka. ₄₀Nugo Jona lei stuorra guoli čoavjjis golbma beaivvi ja golbma ija, nu Olbmobárdni lea eatnama ozas golbma beaivvi ja golbma ija. ₄₁Ninive olbmot bajásčuožžilit dupmui oktan dán buolvvain ja dubmejit dan. Sii jorgaledje go Jona sárdnidii, ja dás dis lea eambbo go Jona. ₄₂Lullieatnama dronnet čuožžila dupmui oktan dán buolvvain ja dubme dan. Son bođii eatnama gežiin gullat Salomo viissisvuođa, ja dás dis lea eambbo go Salomo.

₄₃Go buhtismeahttun vuoigŋa vuolgá olbmos, de dat vádjola ávdin báikkiid ja ohcá vuoiŋŋadansaji, muhto ii gávnna. ₄₄De dat dadjá: Mun máhcan vissosan mas vulgen. Go dat boahtá ja gávdná viesus guorusin, suohpalastojuvvon ja čiŋahuvvon, ₄₅de dat viežžá čieža vel vearrát vuoiŋŋa, ja dat bohtet sisa ja ásset dohko. Nu dan olbmo dilli šaddá vearrábun go su ovddit dilli. Nu geavvá maiddái dán bahás bulvii.”

₄₆Go Jesus ain lei sárdnumin olbmuide, de su eadni ja vieljat bohte. Sii čužžo olgun ja bivde beassat su ságaide. ₄₇Muhtun bođii dadjat Jesusii: “Du eadni ja vieljat leat olgun ja bivdet beassat du ságaide.” ₄₈Muhto Jesus vástidii dasa gii lei buktán sáni: “Gii lea mu eadni, geat leat mu vieljat?” ₄₉Ja son čujuhii gieđain máhttájeddjiidasas ja celkkii: “Gehččet, dát leat mu eadni ja vieljat. ₅₀Juohkehaš gii dahká mu almmálaš Áhči dáhtu, lea mu viellja ja oabbá ja eadni.”