Matteus 14

₁Daid áiggiid guovllugonagas Herodes gulai ságaid Jesusa birra. ₂Son dajai hoavvaolbmáidasas: “Dat lea Johannes gásttašeaddji. Son lea čuožžilan jábmiid luhtte, ja danne sus leat dakkár fámut.” ₃Herodes lei dohppen Johannesa, čatnan su láhkkiiguin ja bidjan giddagassii Herodiasa, vieljas Filipa áhká dihte, ₄danin go Johannes lei dadjan Herodesii: “Dus ii leat lohpi váldit su áhkkán.” ₅Herodes livččii dáhtton goddit Johannesa, muhto son balai olbmuin, geat atne Johannesa profehtan. ₆Muhto go Herodes lei ávvudeamen riegádanbeaivvis, de Herodiasa nieida dánssui gussiide. Herodes liikui dasa nu sakka ₇ahte vuordnumiin lohpidii addit sutnje maid ihkinassii son dáhtošii. ₈Eadni ávžžuhii nieiddas dadjat: “Atte munnje Johannes gásttašeaddji oaivvi gári siste.” ₉Gonagas šlunddui, muhto go son lei gussiid gullut vurdnon váli, de son gohčui addit niidii maid son siđai. ₁₀Son bijai sáni giddagassii ja gohčui steavlidit Johannesa. ₁₁Johannesa oaivi buktojuvvui gári siste ja addojuvvui niidii, ja nieida doalvvui dan eadnásis. ₁₂Johannesa máhttájeaddjit bohte dasto viežžat rupmaša ja hávdádedje dan. De sii manne muitalit Jesusii, mii lei dáhpáhuvvan.

₁₃Go Jesus dan gulai, de son vulggii fatnasiin ávdin báikái, vai beassá leat okto. Muhto olbmot gulle dan, ja gávpogiin vulge olusat vácci su maŋŋái. ₁₄Go Jesus bođii gáddái ja oinnii buot daid olbmuid, de son árkkášii sin njuorrasit ja buoridii sin buhcciid.

₁₅Eahkedis máhttájeaddjit manne su lusa ja dadje: “Dát lea ávdin báiki, ja lea juo maŋŋit. Luoitte olbmuid vuolgit, vai sii besset mannat giliide oastit alcceseaset borramuša.” ₁₆Muhto Jesus celkkii: “Eai sii dárbbaš vuolgit gosage. Addet dii sidjiide borrat.” ₁₇Sii dadje: “Mis eai leat dás eambbo go vihtta láibbi ja guokte guoli.” ₁₈Jesus celkkii: “Vižžet daid munnje.” ₁₉De son gohčui olbmuid čohkánit rássegieddái, válddii dan vihtta láibbi ja guokte guoli, geahčai bajás albmái ja rohkadalai giittusrohkosa. Son doadjalii láibbiid ja attii máhttájeddjiide, ja máhttájeaddjit adde daid olbmuide. ₂₀Buohkat borre ja gallánedje. Maŋŋil sii čohkkejedje bihtáid mat ledje báhcán, guoktenuppelohkái veaddelihti dievva. ₂₁Dat geat borre, ledje árvvu mielde vihttaduhát olbmá, ja vel nissonat ja mánát.

₂₂De Jesus gohčui máhttájeddjiid lávket fatnasii ja vuolgit ovdalis jávrri nuppe beallái, dan botta go son ieš luoittášii olbmuid vuolgit. ₂₃Go son lei geargan luoitimis sin, de son manai várrái, vai beassá rohkadallat oktonassii.

Go šattai eahket, de son lei doppe okto. ₂₄Fanas lei juo guhkkin eret gáttis, ja dat ražai garrasit báruid vuostá, danin go lei vuostebiegga. ₂₅Njealját idjagohcinvuorus Jesus bođii vácci jávrri alde sin lusa. ₂₆Go máhttájeaddjit oidne su vázzimin jávrri alde, de sii suorganedje ja dadje: “Diet lea gobmi!” Ja sii huike balus. ₂₇Muhto dan seammás Jesus sártnui sidjiide: “Lehket roahkkadat, mun dat lean. Allet bala.”

₂₈Dalle Peter dajai sutnje: “Hearrá, jos dat leat don, de gohčo mu boahtit lusat čáhcegierraga mielde.” ₂₉Jesus celkkii: “Boađe!” Peter lávkii fatnasis ja vádjolišgođii čáhcegierraga mielde Jesusa lusa. ₃₀Muhto go son oinnii dan garra dálkki, de son ballái ja vuodjugođii. Son čurvii: “Hearrá, gájo mu!” ₃₁Dan seammás Jesus geigii gieđa, dollii su ja celkkii: “Don uhccán oskkolaš. Manne don eahpidit?” ₃₂Go soai leigga lávken fatnasii, de biegga ložžii. ₃₃Ja buohkat geat ledje fatnasis, luoitádedje su ovdii ja dadje: “Don leat duođaid Ipmila bárdni!”

₃₄Go sii ledje ollen rastá, de sii bohte gáddái Gennesaretis. ₃₅Go dan guovllu olbmot oidne gii lei boahtán, de sii vuolggahedje sáni miehtá dan guovllu, ja nu buot buohccit buktojuvvojedje Jesusa lusa. ₃₆Sii bivde beassat guoskkahit su bivttasdiehpi, ja buohkat geat dan guoskkahedje, buorránedje.