Matteus 27

₁Iđedis buot bajimusbáhpat ja álbmoga vuorrasat mearridedje ahte Jesus galgá goddojuvvot. ₂Sii čatne su, dolvo su eret ja adde su eatnanhearrá Pilatusa gihtii.

₃Go Judas, gii lei beahttán Jesusa, oinnii ahte Jesus lei dubmejuvvon, de son gáđai. Son doalvvui bajimusbáhpaide ja vuorrasiidda golbmalogi silbaruđa maid lei ožžon, ₄ja dajai: “Mun suddudin go behtten vigihis vara.” Sii vástidedje: “Mii das guoská midjiide? Dat lea du iežat ášši.” ₅Dalle Judas bálkestii ruđaid tempelii, vulggii doppe ja harcii iežas.

₆Bajimusbáhpat válde ruđaid ja dadje: “Dát leat varraruđat, dáid ii leat lobálaš bidjat tempelbumbái.” ₇Ja sii mearridedje oastit daiguin láirálihttedahkki bealddu vierrásiid hávdebáikin. ₈Dan dihte dat bealdu gohčoduvvo vel otná beaivvige Varrabealdun. ₉Nu ollašuvai dat mii lea celkojuvvon profehta Jeremia bokte: Sii válde dan golbmalogi silbaruđa, hatti masa israellaččat árvvoštalle dán olbmá, ₁₀ja adde daid máksun láirálihttedahkki bealddu ovddas, nugo Hearrá lei gohččon mu.

₁₁Jesus dolvojuvvui eatnanhearrá ovdii. Eatnanhearrá jearai sus: “Leatgo don juvddálaččaid gonagas?” Jesus vástidii: “Don dajat dan ieš.” ₁₂Ja go bajimusbáhpat ja vuorrasat sivahalle su, de son ii vástidan maidege. ₁₃Dalle Pilatus jearai sus: “Itgo don gula man garrasit sii sivahallet du?” ₁₄Muhto Jesus ii vástidan sánige, ja eatnanhearrá imaštalai sakka.

₁₅Basiid áigge eatnanhearrá lávii luoitit luovus ovtta fáŋgga gean olmmošjoavku dáhtui. ₁₆Dan áigge lei giddagasas muhtun beakkálmas fáŋga gean namma lei Barabbas. ₁₇Pilatus jearai dain geat ledje čoagganan: “Goappá dáhttubehtet mu luoitit luovus? Luoittángo mun Barabbasa vai Jesusa, gii gohčoduvvo Messiasin?” ₁₈Dasgo son diđii ahte sii gáđašvuođas ledje addán Jesusa su gihtii.

₁₉Go Pilatus lei čohkkámin duopmárstuolus, de su áhkká bijai sutnje sáni: “Ale daga maidege dán vuoiggalaš olbmái. Dasgo mus lei surgadis niehku mannan ija su dihte.”

₂₀Muhto bajimusbáhpat ja vuorrasat sártnuhedje olbmuid gáibidit Barabbasa luovus ja jápminduomu Jesusii. ₂₁Eatnanhearrá jearai: “Goappá dii dáhttubehtet mu luoitit luovus?” Sii vástidedje: “Barabbasa.” ₂₂Pilatus jearai: “Maid mun dalle dagan Jesusii, gii gohčoduvvo Messiasin?” Buohkat čurvo: “Russiinávle!” ₂₃Pilatus jearai: “Maid baháid lea son dahkan?” Muhto sii čurvo ain jitnoseappot: “Russiinávle!” ₂₄Go Pilatus oinnii ahte son ii sáhte dahkat maidege, ja ahte stuibmi ain vearránii, de son válddii čázi, basai gieđaid olbmuid oaidnut ja dajai: “Mun lean vigiheapme dán olbmá varrii. Dát lea din ášši.” ₂₅Buohkat čurvo ovtta jitnii: “Bohtos su varra min ja min mánáid badjelii!”

₂₆Dalle Pilatus luittii Barabbasa luovus, muhto Jesusa son spihččehii ja attii russiinávlejuvvot.

₂₇Eatnanhearrá soalddáhat dolvo Jesusa sisa ladnái ja čohkkejedje oppa fáktaveaga su birra. ₂₈Sii nuolahedje Jesusa ja gárvvuhedje sutnje rukses oalgebiktasa, ₂₉bárgidedje bastilislánjáin kruvnnu su oaivái ja bidje soappi su olgeš gihtii. Sii čippostedje su ovdii ja dadje sutnje bilkidemiin: “Dearvva, juvddálaččaid gonagas!” ₃₀Ja sii čolge su njeaiga, válde sus soappi ja časke dainna su oaivái. ₃₁Go sii ledje bilkidan su oalle botta, de sii nulle sus oalgebiktasa, gárvvuhedje sutnje su iežas biktasiid ja vulge doalvut su russiinávlejuvvot.

₃₂Dohko manadettiin sii deive Simon-nammasaš kyrenelaš olbmá ja bággejedje su guoddit Jesusa ruossa. ₃₃Go sii bohte báikái mii gohčoduvvo Golgatan, Oaiveskálžobáikin, ₃₄de sii fálle Jesusii viinni masa lei seaguhuvvon sáhppi. Go son máisttii dan, de son ii dáhtton juhkat. ₃₅Go sii ledje russiinávlen Jesusa, de sii juogadedje su biktasiid vuorbádemiin. ₃₆De sii čohkánedje dasa fáktet su. ₃₇Su oaivvi bajábeallái sii bidje čállosa mas bođii ovdan su duomu sivva: “Dát lea Jesus, juvddálaččaid gonagas.”

₃₈Oktanaga Jesusiin russiinávlejuvvojedje guokte rievvára, nubbi su olgeš ja nubbi su gurut beallái. ₃₉Dat geat vázze meaddel, bilkidedje su. Sii bárde oaivvi ₄₀ja dadje: “Don gii veaját gaikut vuolás tempela ja hukset dan fas golmma beaivvis – beastte dál iežat, jos leat Ipmila bárdni, ja njieja vuolás ruossas!” ₄₁Seammá láhkái bajimusbáhpat oktan čáloahppavaččaiguin ja vuorrasiiguin bilkidedje su ja dadje: ₄₂“Earáid son lea beastán, muhto iežas ii máhte beastit. Son lea Israela gonagas, njidjos dál vuolás ruossas! Dalle mii oskut sutnje. ₄₃Son lea dorvvastan Ipmilii. Gádjos dál Ipmil su, jos su ráhkista. Sonhan lea dadjan ahte lea Ipmila bárdni.” ₄₄Seammá láhkái hiddjideigga su maiddái rievvára guovttos geat leigga russiinávlejuvvon oktanaga suinna.

₄₅Guđát diimmus šattai seavdnjat miehtá oppa eatnama, ja dat bisttii gitta ovccát diimmu rádjái. ₄₆Ovccát diimmus Jesus čuorvvui alla jienain: “Eli, Eli, lema sabaktani?” Dat lea: “Ipmilan, Ipmilan, manne don leat mu guođđán?” ₄₇Go muhtumat dain geat čužžo das, gulle dan, de sii dadje: “Son čuorvu Elia.” ₄₈Dalán muhtun sis doamai viežžat guobbarasa, láktadii dan suvrra viinniin ja coggalii soabbegeahčái, vai beassá addit sutnje juhkat. ₄₉Earát dadje: “Ale vuos! Gehččot, boahtágo Elia gádjut su.” ₅₀Muhto Jesus čuorvvui fas alla jienain ja attii vuoiŋŋas.

₅₁Dalle tempela ovdaloavdda gaikánii guovdat, badjeravddas gitta vuolleravdii. Eanan doarggistii, bávttit luoddanadde, ₅₂hávddit rahpasedje, ja eatnat jápmimii oađđán bassi olbmuid rupmašat čuožžiledje bajás. ₅₃Sii vulge hávddiineaset, ja Jesusa bajásčuožžileami maŋŋil sii bohte bassi gávpogii ja almmustuvve eatnagiidda.

₅₄Go čuohtásaoaivámuš ja olbmát geat suinna ledje fáktemin Jesusa, oidne eatnama doarggisteamen ja buot mii dáhpáhuvai, de sii suorganedje sakka ja dadje: “Dát olmmái fertii leat Ipmila bárdni!”

₅₅Maiddái máŋga nissona ledje dobbelaččas geahčadeamen dán. Sii ledje vádjolan Galilea rájes Jesusa mielde ja bálvalan su. ₅₆Sin searvvis ledje Maria Magdalena, Jakoba ja Josefa eadni Maria ja Sebedeusa bártniid eadni.

₅₇Go eahket lei šaddan, de dohko bođii Josef, rikkis arimatealaš, gii maiddái lei Jesusa máhttájeaddji. ₅₈Son manai Pilatusa lusa ja ánuhii oažžut Jesusa rupmaša. Pilatus gohčui addit dan sutnje. ₅₉Josef válddii rupmaša, giesai dan buhtis liidnái ₆₀ja bijai ođđa hávdái maid son lei čuolahan alccesis báktái. Son fierahii stuorra geađggi hávddi uksaráiggi ovdii ja vulggii eret. ₆₁Maria Magdalena ja nubbi Maria leigga maid das; soai čohkkáiga hávddi buohta.

₆₂Maŋit beaivvi, beaivvi maŋŋil ráhkkananbeaivvi, bajimusbáhpat ja farisealaččat manne searválagaid Pilatusa lusa. ₆₃Sii dadje: “Hearrá, mii muitit maid dát fillejeaddji dajai dalle go ain lei eallimin: ‘Golmma beaivvi geažes mun čuožžilan jábmiid luhtte’. ₆₄Gohčo dan dihte fáktet hávddi goalmmát beaivvi rádjái, vai su máhttájeaddjit eai beasa suoládit su ja dadjat álbmogii: ‘Son lea čuožžilan jábmiid luhtte.’ Dalle maŋit fillehus šattašii bahábun go ovddit.” ₆₅Pilatus vástidii: “Dás leat didjiide fávttat. Mannet ja gáhttejehket hávddi nu bures go máhttibehtet.” ₆₆Sii vulge ja gáhttejedje hávddi nu ahte seailidedje geađggi ja bidje fávttaid.