Mika 1

₂Gullet, buot álbmogat,

guldal, eanan ja buot mii dus lea!

Hearrá, mu Ipmil,

duođašta din vuostá,

Hearrá ieš bassi tempelisttis.

₃Gehččet, Hearrá vuolgá viesustis,

son njiedjá ja loaiddasta ovdan

eatnama dieváid badjel.

₄Várit suddet su vuolde

dego gáhčči dola ovddas,

leagit luoddanaddet dego čáhci

mii boršu bávtti badjel.

₅Buot dát dáhpáhuvvá

Jakoba rihkkumiid dihte,

Israela álbmoga suttuid dihte!

Mii lea Jakoba rihkkun?

Iigo dat leat Samaria?

Mii lea Juda suddu?

Iigo dat leat Jerusalem?

₆Mun dagan Samaria čievračopman,

fierahan dan geđggiid leahkái,

gaikkodan dan vuođđudusaid,

dagan dan geađgevieltin

ja viidnegárddiid steallin.

₇Buot dan ipmilgovat cuvkejuvvojit,

buot fuorráattáldagat boldojuvvojit.

Mun dagan duššin buot eahpeipmiliid.

Fuorrábálkán dat daid čohkkii,

fuorrábálkán dat fas šaddet.

₈Dan dihte mun váidalan ja vuobaidan,

váccán rabas julggiid ja álásin.

Mun holvvun dego šakála,

luoimman dego struhcca.

₉Samaria hávvi ii leat buorideames,

dat ollá Judai, mu álbmoga poarttaide,

gitta Jerusalema rádjái.

₁₀Allet muital dan Gatis,

allet čiero jitnosii.

Fieradehket muolddas, dii Bet-Leafra olbmot!

₁₁Vulget gávpogisttádet, dii Šafira ássit,

álásin ja heahppášuhttojuvvon!

Saanana olbmot eai beasa eret.

Bet-Haeselis gullo váidalančuorvvas,

dat doarjja lea váldojuvvon dis eret.

₁₂Dat geat ásset Marotis, vurdet buori,

muhto lihkuhisvuohta maid

Hearrá lea vuolggahan,

lea ollán gitta Jerusalema poarttaid rádjái.

₁₃Dii leŋgiidet heasttaid vovnnaid ovdii,

dii Lakiša ássit.

Dát lei Siona suttu álgu,

Israela rihkkumušat

bohte oidnosii din luhtte.

₁₄Addet Morešet-Gatii earroattáldaga!

Aksiba viesut leat beahttán

Israela gonagasaid.

₁₅Velá oktii, Mareša olbmot,

mun vuolggahan din vuostá

dakkára gii vuoitá din.

Israela hearvásvuohta

ferte fas báhtarit Adullamii.

₁₆Čuohpat oaivvi báljisin,

ráhke moraštemiin vuovttaidat

mánáidat dihte geat ledje du illu.

Daga iežat oaivvi báljisin

dego ráhtogoaskima oaivi,

dasgo sii leat dolvojuvvon du luhtte eret.