Markus 13

₁Go Jesus lei vuolgimin tempelis, de muhtun su máhttájeddjiin dajai: “Oahpaheaddji, geahča makkár geađggit ja makkár ráhkkanusat!” ₂Jesus vástidii: “Geahča dal dáid stuorra ráhkkanusaid. Dat visot gaikojuvvojit eatnamii, dain ii báze geađgi geađggi ala.”

₃Go Jesus de lei čohkkámin Oljováris tempela buohta ja Peter, Jakob, Johannes ja Andreas ledje das suinna, de sii jerre: ₄“Goas buot dat dáhpáhuvvá? Muital midjiide, mii lea mearkan das ahte buot dat ollašuvvagoahtá?”

₅Jesus sárdnugođii sidjiide: “Váruhehket, vai ii oktage čádjidahte din. ₆Máŋgasat bohtet mu namas ja dadjet: ‘Mun dat lean’, ja sii čádjidahttet eatnagiid. ₇Go gullabehtet soahtešláma ja soahteságaid, de allet dalle suorgan. Nu ferte dáhpáhuvvat, muhto dat ii leat velá loahppa. ₈Álbmot čuožžila álbmoga vuostá ja riika riikka vuostá, ollu báikkiin leat eanandoarggástusat ja šaddá nealgi. Dát lea ávttaid álgu.

₉Váruhehket! Dii dolvojuvvobehtet duopmostuoluid ovdii ja spihččejuvvobehtet synagogain. Dii šaddabehtet eatnanhearráid ja gonagasaid gihtii mu nama dihte, duođaštussan sidjiide. ₁₀Muhto evangelium ferte vuos sárdniduvvot buot álbmogiidda. ₁₁Go sii dolvot din ja addet din eiseválddiide, de allet ovddalgihtii moraš maid galggašeiddet sárdnut. Sárdnot dan mii didjiide addojuvvo aiddo dan bottus, danne go dalle ehpet leat sárdnumin dii, muhto Bassi Vuoigŋa. ₁₂Viellja addá vieljas jápmimii ja áhčči mánás, ja mánát čuožžilit vánhemiid vuostá ja dagahit sidjiide jápmima. ₁₃Buohkat vašuhit din mu nama dihte, muhto gii bissu nanusin gitta loahpa rádjái, dat bestojuvvo.

₁₄Go dii oaidnibehtet bilideaddji fastivuođa čuožžumin báikkis gos dat ii galgga leat – áddejehkos lohkki dán riekta – de dalle dat geat leat Judeas, galget báhtarit váriide. ₁₅Dat gii lea dáhki alde, ii oaččo mannat viežžat maidege viesustis, ₁₆dat gii lea bealddus, ii oaččo máhccat viežžat iežas oalgebiktasa. ₁₇Vuoi áhpehemiid ja njamaheddjiid daid beivviid! ₁₈Rohkadallet ahte dat ii dáhpáhuva amaset dárbbašit báhtarit dálvet. ₁₉Dasgo daid beivviid šaddá dakkár áŧestus mii ii leat leamaš dan rájes go Ipmil sivdnidii máilmmi, iige šatta šat goassege. ₂₀Jos Hearrá ii oanidivčče daid beivviid, de ii oktage olmmoš bestojuvvoše. Muhto daid dihte geaid son lea válljen, son lea oanidan dan áiggi.

₂₁Jos dalle muhtin dadjá didjiide: ‘Dáppe lea Messias’, dahje: ‘Messias lea duoppe’, de allet jáhke. ₂₂Dasgo vearremessiasat ja vearreprofehtat čuožžilit ja dahket mearkkaid ja oavdduid vai besset čádjidahttit sin geat leat válljejuvvon. ₂₃Váruhehket! Mun lean cealkán didjiide buot juo ovdal.

₂₄Muhto daid beivviid, dan áŧestusa maŋŋil, beaivváš sevnnjoda iige mánnuge báitte, ₂₅násttit gahččet vuolás almmis ja almmifámut lihkahuvvojit. ₂₆Dalle olbmot oidnet Olbmobártni boahtimin balvvaid siste stuorra fámuin ja hearvásvuođain, ₂₇ja dalle son vuolggaha eŋgeliiddis ja čohkke daid geaid lea válljen, máilmmi njealji čiegas eatnama ravddaid rájes gitta almmi ravddaid rádjái.

₂₈Ohppet fiikonmuoras: Go dan oavssit máihlot ja lasttat ihtigohtet, de dii diehtibehtet ahte geassi lea lahka. ₂₉Seammá ládje diige, go oaidnibehtet dán dáhpáhuvvamin, diehtibehtet ahte son lea lahka, uvssas čuožžumin. ₃₀Duođaid, mun cealkkán didjiide: Dát buolva ii jávkka ovdal go buot dat dáhpáhuvvá. ₃₁Albmi ja eanan duššet, muhto mu sánit eai dušša. ₃₂Muhto dan beaivvi ja bottu ii dieđe oktage, eai almmi eŋgelat iige Bárdni, muhto duššefal Áhčči.

₃₃Váruhehket ja gohcet, danne go dii ehpet dieđe goas dat áigi boahtá. ₃₄Go olmmái lei vuolgimin olgoeatnamii ja vulggii ruovttus, de son attii dállodoalu bálvaleddjiidis háldui ja iešguhtiige sierra fitnu, ja uksafávtta son gohčču gohcit. ₃₅Gohcet dalle, dasgo dii ehpet dieđe goas dáluisit boahtá: Boahtágo son eahkedis vai gaskaija, vuoncávarrása biškunáigge vai iđedis. ₃₆Son boahtá fáhkkestaga – váruhehket, vai ehpet leat oađđimin go son boahtá. ₃₇Maid mun cealkkán didjiide, dan mun cealkkán buohkaide: Gohcet!”