Markus 9

₁Son celkkii vel: “Duođaid, mun cealkkán didjiide: Muhtumat dain geat leat čuožžumin dás, eai muosát jápmima ovdal go oidnet ahte Ipmila riika lea boahtán fámuin.”

₂Guđa beaivvi geažes Jesus válddii mielddis Petera, Jakoba ja Johannesa ja doalvvui sin alla várrái gos sii ledje oktonassii. Doppe su hápmi nuppástuvai sin oaidnut, ₃ja su biktasat šadde nu čeaskadin ahte ii oktage báidni eatnama alde máhte vilggodahttit daid nu čeaskadin. ₄Sidjiide almmustuvai Elia ja suinna Moses, ja soai sártnodeigga Jesusiin. ₅De Peter celkkii Jesusii: “Rabbi, lea buorre ahte mii leat dáppe. Mii dahkat dása golbma goađi: dutnje, Mosesii ja Eliai.” ₆Son ii diehtán maid dajašii, danne go sii ledje sakka suorganan. ₇De bođii balva mii suoivvanasttii sin, ja balvvas gullui jietna: “Dát lea mu ráhkis Bárdni. Guldalehket su!” ₈Ja fáhkkestaga, go sii geahčastedje birra, de sii eai oaidnán das šat ovttage earret Jesusa okto.

₉Go sii ledje njiedjamin váris, de Jesus gilddii sin muitaleames geasage maid sii ledje oaidnán, ovdal go Olbmobárdni lea čuožžilan jábmiid luhtte. ₁₀Sii vurkejedje Jesusa sániid ja árvaladde gaskaneaset maid bajásčuožžileapmi jábmiid luhtte mearkkaša. ₁₁Sii jerre Jesusis: “Manne čáloahppavaččat dadjet ahte Elia ferte vuos boahtit?” ₁₂Son vástidii: “Elia boahtáge vuos ja ráhkada buot gárvvisin. Muhto manne de lea čállojuvvon Olbmobártni birra ahte son badjelgehččojuvvo ja šaddá gillát ollu? ₁₃Mun cealkkán didjiide ahte Elia lea juo boahtán, ja sii dahke sutnje maid áigo, nugo lea čállojuvvon su birra.”

₁₄Go Jesus ja dát golmmas máhcce eará máhttájeddjiid lusa, de sii oidne ollu olbmuid máhttájeddjiid birra ja muhtun čáloahppavaččaid nákkáhallamin singuin. ₁₅Go olbmot áice Jesusa, de sii dohppehalle ballui. Sii viehkaledje su lusa ja dearvvahedje su. ₁₆Jesus jearai sis: “Mas dii nákkáhallabehtet?” ₁₇Muhtun olmmái álbmogis vástidii: “Oahpaheaddji, mun bukten du lusa bárdnán geas lea gielahis vuoigŋa. ₁₈Dat dohppe su gos ihkinassii. Dat bálkesta su veallut, ja son soalssida, gáská bániid ja stirdu. Mun sihten du máhttájeddjiid ádjit dan olggos, muhto sii eai nagodan dan dahkat.” ₁₉Dalle Jesus vástidii: “Vuoi dán eahpeoskkolaš buolvva! Man guhká mun vel ferten leat din gaskkas? Man guhká šattan gierdat din? Buktet bártni mu lusa.” ₂₀Sii bukte bártni Jesusa lusa. Go vuoigŋa oinnii Jesusa, de dallánaga dat gaikugođii bártni nu ahte son gahčai, fieradii eatnamis ja soalssidii. ₂₁Jesus jearai bártni áhčis: “Man guhká son lea leamaš diekkár?” Áhčči vástidii: “Dan rájes go lei uhcci. ₂₂Vuoigŋa lea máŋgii bálkestan su sihke dollii ja čáhcái vai beassá goddit su. Árpmit min ja veahket, jos veaját maidege!” ₂₃Jesus celkkii sutnje: “Jos veaján? Buot lea vejolaš dasa gii osku.” ₂₄Dallánaga bártni áhčči čurvii: “Mun oskkun! Veahket mu mu eahpeoskkus!” ₂₅Go Jesus oinnii ain eambbo olbmuid čoahkkaneamen dasa, de son šikkui buhtismeahttun vuoiŋŋa ja celkkii: “Gielahis ja bealjehis vuoigŋa, mun gohčun du: Vuolgge olggos bártnis alege goassege šat mana sutnje!” ₂₆Dalle vuoigŋa huikkii, gaikkui bártni sakka ja vulggii sus olggos. Bárdni šattai dego jábmin, ja eatnagat dadje: Dál son jámii. ₂₇Muhto Jesus válddii su gihtii ja veahkehii su čuoččahit, ja son čuožžilii.

₂₈Go Jesus lei boahtán vissui ja dušše su máhttájeaddjit ledje das, de sii jerre sus: “Manne mii eat veadján ádjit vuoiŋŋa olggos bártnis?” ₂₉Son vástidii: “Dán šlája ii sáhte ádjit olggos muđui go rohkadusain.”

₃₀Sii vulge doppe ja vádjoledje Galilea čađa. Jesus ii dáhtton earáid diehtit dan, ₃₁danne go son lei oahpaheamen máhttájeddjiidis. Son celkkii sidjiide: “Olbmobárdni addojuvvo olbmuid gihtii, ja sii goddet su, muhto golmma beaivvi geažes son čuožžila jábmiid luhtte.” ₃₂Máhttájeaddjit eai ádden maid son oaivvildii sániidisguin, muhto eai arvan jearrat sus.

₃₃Sii jovde Kapernaumii. Go Jesus lei boahtán ruoktot, de son jearai máhttájeddjiin: “Maid dii sártnodeiddet gaskaneattet mátkkis?” ₃₄Muhto sii orro jávohaga, dasgo sii ledje nákkáhallan das guhtemuš sis lea stuorimus. ₃₅Jesus čohkánii, rávkkai lusas dan guoktenuppelohkása ja celkkii sidjiide: “Jos guhtege dáhttu leat vuosttamuš, de son ferte leat maŋimuš ja buohkaid bálvaleaddji.” ₃₆De son divui sin gaskii máná, fátmmastii dan ja celkkii sidjiide: ₃₇“Gii mu nammii váldá lusas dákkár máná, dat váldá lusas mu. Ja gii váldá lusas mu, dat ii váldde lusas mu muhto su gii mu lea vuolggahan.”

₃₈Johannes dajai sutnje: “Oahpaheaddji, mii oinniimet muhtuma ádjimin olggos bahás vuoiŋŋaid du nammii. Mii gilddiimet su dan dihte go son ii čuovo min.” ₃₉Muhto Jesus vástidii: “Allet gieldde su. Ii oktage gii dahká oavddu mu nammii, sáhte dalán sárdnut baháid mu birra. ₄₀Gii ii leat min vuostá, dat lea min beali.

₄₁Duođaid, mun cealkkán didjiide: Gii addá didjiide guvssi dievva čázi juhkat dan dihte go dii gullabehtet Kristusii, dat oažžu jur vissásit bálkkás. ₄₂Muhto jos guhtege vearránahttá ovtta dáin uhcahaččain geat oskot munnje, de sutnje livččii buoret ahte son bálkestuvvošii merrii millogeađgi čeabehis.

₄₃Jos du giehta vearránahttá du, de čuohpa dan gaskat. Buoret lea beassat eallimii rámbin go atnit goappašiid gieđaid ja mannat helvehii, čáskatmeahttun dollii, ₄₄gos máhtu ii jáme iige dolla čáskka. ₄₅Jos du juolgi vearránahttá du, de čuohpa dan gaskat. Buoret lea beassat eallimii skierbmán go atnit goappašiid julggiid ja mannat helvehii ₄₆gos máhtu ii jáme iige dolla čáskka. ₄₇Jos du čalbmi vearránahttá du, de bálkes dan luhtát. Buoret lea beassat čalbmebeallin Ipmila riikii go atnit goappašiid čalmmiid ja bálkestuvvot helvehii ₄₈gos máhtu ii jáme iige dolla čáskka. ₄₉Dasgo juohkehaš sáltejuvvo dolain, ja juohke oaffar sáltejuvvo sálttiin. ₅₀Sálti lea ávkkálaš. Muhto jos sálti veagahuvvá, de mo dii oažžubehtet dan fas sálttisin? Atnet sáltti alddiineattet, ja ellet ráfis guhtet guimmiideattetguin.”