Nehemja 11

₁Álbmoga oaivámuččat ásse Jerusalemii. Earát fas vuorbádedje, gosa sii galge ássat. Logádas galggai ássat Jerusalemii, bassi gávpogii, ja ovcci logádasa eará gávpogiidda. ₂Álbmot rámidii olbmáid geat ledje miehtásat ássat Jerusalemii.

₃Dás logahallojuvvojit dat Juda provinssa bearašoaivámuččat geat ásse Jerusalemis. Maiddái eará Juda gávpogiin ásse israellaččat ja sin gaskkas báhpat, levilaččat, tempelbálvaleaddjit ja Salomo bálvaleddjiid mánát, guhtege iežas eatnamis ja iežas gávpogis. ₄Jerusalemis ásse dát Juda ja Benjamina čearddaid olbmát: Juda čearddas: Ataja, Ussia bárdni, Peresa sogas; su áddjá lei Sakarja, gean áhčči lei Amarja, su Šefatja ja su Mahalalel. ₅Su lassin Maaseja, Baruka bárdni, Šela sogas; su áddjá lei Kol-Hose, gean áhčči lei Hasaja, su Adaja, su Jojarib ja su Sakarja. ₆Peresa sogas Jerusalemis ásse oktiibuot njeallječuođiguhttalogigávcci vearjoolbmá.

₇Benjamina čearddas: Sallu, Mešullama bárdni; su áddjá lei Joed, gean áhčči lei Pedaja, su Kolaja, su Maaseja, su Itiel ja su Jesaja. ₈Su lassin su fuolkkit, jálus soahteolbmát, oktiibuot ovccičuođiguoktelogigávcci olbmá. ₉Daid benjaminlaččaid oaivámuš geat ásse Jerusalemis, lei Joel, Sikri bárdni, ja gávpoga vuolit oaivámuš lei Juda, Hassenua bárdni.

₁₀Báhpat: Jedaja, Jojariba bárdni, Jakin ₁₁ja Seraja, Hilkia bárdni, Ipmila tempela njunušolmmái; Seraja áddjá lei Mešullam, gean áhčči lei Sadok, su Merajot ja su Ahitub. ₁₂Sin fuolkkit, geat bálvaledje tempelis, ledje oktiibuot gávccičuođiguoktelogiguokte. Báhpaide gulai vel Adaja, Jerohama bárdni; su áddjá lei Pelalja, gean áhčči lei Amsi, su Sakarja, su Pašhur ja su Malkia. ₁₃Su fuolkkit, bearašoaivámuččat, ledje oktiibuot guoktečuođinjealljelogiguokte. Báhpaide gulai vel Amasai, Asarela bárdni; su áddjá lei Ahsai, gean áhčči lei Mešillemot, gean áhčči lei Immer. ₁₄Su sogas ledje oktiibuot čuođiguoktelogigávcci olbmá, buohkat jálus soahteolbmát. Sin oaivámuš lei Sabdiel, Haggadola bárdni.

₁₅Levilaččat: Šemaja, Haššuba bárdni; su áddjá lei Asrikam, gean áhčči lei Hašabja, gean áhčči lei Bunni. ₁₆Šabbetai ja Josabad gulaiga levilaččaid oaivámuččaide, ja soai jođiheigga Ipmila viesu olgobargguid. ₁₇De lei Mattanja, Mika bárdni; su áddjá lei Sabdi, gean áhčči lei Asaf. Son jođihii máidnunlávluma ja lávllui giittussálmma rohkadusa oktavuođas. De lei vel su fuolki Bakbukja, su sadjásaš, ja Abda, Šammua bárdni; Abda áddjá lei Galal, gean áhčči lei Jedutun. ₁₈Bassi gávpogis ledje oktiibuot guoktečuođigávcciloginjeallje levilačča.

₁₉Uksafávttat: Akkub, Talmon ja sudno virgeguoimmit geat fáktejedje poarttaid, oktiibuot čuođičiežalogiguokte. ₂₀Eará israellaččat, báhpat ja levilaččat ásse buot eará Juda gávpogiin, guhtege iežas árbeeatnamis. ₂₁Tempelbálvaleaddjit ásse Ofelis, ja Siha ja Gišpa leigga sin njunnošat. ₂₂Levilaččaid hoavda Jerusalemis lei Ussi, Bani bárdni; su áddjá lei Hašabja, gean áhčči lei Mattanja, gean áhčči lei Mika. Son gulai Asafa bártniide geat lávlo tempela ipmilbálvalusain. ₂₃Sin várás gonagas lei addán gohččuma mii mearridii lávluid beaivválaš bargguid. ₂₄Gonagasa veahkkin buot áššiin mat guske álbmogii, lei Petahja, Mešesabela bárdni, gii gulai Seraha, Juda bártni, nállái.

₂₅Muhtumat Juda čeardda olbmuin ásse giliin maid birra ledje bealddut: Kirjat Arbas ja dan birasgiliin, Dibonis ja dan birasgiliin, Jekabseelis ja dan birasbáikkiin, ₂₆Ješuas, Moladas ja Bet-Peletis, ₂₇Hasar Šualis, Beer Šebas ja dan birasgiliin, ₂₈Siklagis, Mekonas ja dan birasgiliin, ₂₉En-Rimmonis, Soras ja Jarmutis, ₃₀Sanoahis, Adullamis ja dan lagaš giliin, Lakišis ja dan lagaš bealdduin ja Asekas ja dan birasgiliin. Sin ássanguovlu olii Beer Šeba rájes Hinnomleagi rádjái.

₃₁Benjamina čeardda olbmot ásse Gebas, Mikmasis, Ajas ja Betelis ja dan birasgiliin, ₃₂Anatotis, Nobis ja Ananjas, ₃₃Hasoris, Ramas ja Gittajimis, ₃₄Hadidis, Seboimis ja Neballatis, ₃₅Lodis, Onos ja Ge-Haharašimis. ₃₆Muhtun levilaččaid juhkosat sirdojuvvojedje Judas Benjaminii.