Sátneláskkut 10

Jierpmálaš bárdni illudahttá áhčis,

jierpmehis bárdni lea eatnis moraš.

₂Vearálaš vuoitu ii ávkkut,

vuoigatlašvuohta gádju jápmimis.

₃Hearrá ii divtte vanhurskása nealgut,

ipmilmeahttuma anistumi son hilgu.

₄Láikkes gieđat dahket geafin,

viššalis gieđat buktet rikkisvuođa.

₅Jierpmálaš olmmoš čohkke geasset,

dat gii oađđá láddjenáigge,

šaddá heahpadii.

₆Vanhurskkis buressivdniduvvo

valljugasat,

ipmilmeahttuma njálmmis

lea veahkaváldi.

₇Vanhurskása muitu buressivdniduvvo,

ipmilmeahttuma namma guohcaga.

₈Viissis olmmoš váldá vára

cuiggodusain,

dasa gii hállá jallaid, geavvá funet.

₉Láitemeahttun vádjola oadjebassan,

dasa gii manná mohkkegeainnuid,

geavvá bahás.

₁₀Dat gii časkkaša čalmmiid, loavkida,

gii cuiggoda roahkkadit, dahká ráfi.

₁₁Vuoigatlaš olbmo njálbmi

lea eallima ája,

ipmilmeahttuma njálmmis

lea veahkaváldi.

₁₂Vašši boktá bealkkuid,

ráhkisvuohta gokčá

rihkkumiid eatnatvuođa.

₁₃Jierpmálačča baksamiin

boahtá viisodat,

jierpmehis olbmo sealggi cábmos soabbi!

₁₄Viisát vurkejit dieđu,

go duihmi sárdnu, de heavvu lea lahka.

₁₅Opmodat lea riggái nana ladni,

gefodat lea váivváša heavvu.

₁₆Vanhurskása bálká addá eallima,

dat maid ipmilmeahttun skáhppo,

doalvu suddui.

₁₇Dat gii dohkkeha bagadusa,

čujuha eallima geidnui,

dat gii badjelgeahččá cuiggodusa,

čádjidahttá.

₁₈Dat gii čiehká vaši, lea behtolaš,

jalla lea dat gii gilvá bahás ságaid.

₁₉Gos leat ollu sánit,

das ii váillo suddu,

jierpmálaš olmmoš

stivre iežas njuokčama.

₂₀Vanhurskása sárdnun lea válljusilba,

ipmilmeahttuma jurdagat

eai leat mange veara.

₂₁Vanhurskása sánit

oahpistit eatnagiid,

jallaid jierpmehisvuohta

doalvu sin jápmimii.

₂₂Hearrá buressivdnádus

dahká rikkisin,

váivválaš rahčan ii lasit dasa maidege.

₂₃Jalla hávskodat lea dahkat baháid,

jierpmálačča illu lea viissisvuohta.

₂₄Ipmilmeahttuma deaivida dat

mas son ballá,

vanhurskkis oažžu dan maid sávvá.

₂₅Go riđđu lea meaddel,

de ipmilmeahttun ii šat leat,

muhto vanhurskkis olmmoš ii lihkahuvvo.

₂₆Nugo ettet bániide

ja suovva čalmmiide,

nu lea láikkes olmmoš

daidda geat vuolggahit su.

₂₇Hearrá ballu lasiha eallinbeivviid,

ipmilmeahttuma jagit oatnánit.

₂₈Vanhurskásis lea illu vuordasis,

ipmilmeahttuma doaivu duššá.

₂₉Hearrá lea láitemeahttuma ladni,

muhto vearredahkkiid heavvu.

₃₀Vanhurskkis ii lihkahuvvo goassege,

ipmilmeahttun ii beasa eallit eatnamis.

₃₁Vanhurskása njálmmis

boahtá viisodat,

behtolačča njálbmi buđđojuvvo.

₃₂Vanhurskkis máhttá válljet

heivvolaš sániid,

ipmilmeahttuma sárdnun

lea aivve behtolašvuohta.