Sálmmaid girji 102

₂Hearrá, gula mu rohkosa,

divtte mu čuorvasa olahit du lusa!

₃Ale čiega mus muođuidat

go mun lean heađis.

Guldal mu,

doama vástidit go mun čuorvvun.

₄Mu beaivvit jávket dego suovva,

mu dávttit bullet nugo ráttit.

₅Mu siskkildas lea dego goikan

ja goldnan rássi,

mun in muitte šat oppa borratge.

₆Mun šuohkán ja luoimman,

mun lean dego sohppojuvvon dákti.

₇Mun lean dego skuolfi meahcis,

nugo idjaloddi mii orru heavvobázahasain.

₈Mun gozán ijaid,

mun lean dego loddi

mii huhttá dáhki alde.

₉Mu vašálaččat hiddjidit mu

geažos beaivvi,

sii bilkidit mu ja atnet mu nama

garrusátnin.

₁₀Mun boran gunaid láibin,

seaguhan iežan juhkamuša gatnjaliiguin.

₁₁Moaris ja suhtus don dohppejit mu

ja suhppejit mu eatnamii.

₁₂Mu beaivvit leat dego eahketsuoivvan,

mun golnnan rási láhkái.

₁₃Muhto don, Hearrá,

čohkkát truvnnustat agálaš áigái,

du namma bissu buolvvas bulvii.

₁₄Don čuožžilat árpmihit Siona.

Dan boddu lea boahtán,

lea áigi árpmihit dan.

₁₅Du bálvaleaddjit ráhkistit

Siona geđggiid,

árkkášit go oidnet dan gunaid.

₁₆Álbmogat ballet Hearrá namas,

buot eatnama gonagasat

Hearrá hearvásvuođas,

₁₇go son hukse Siona

ja almmustuvvá hearvásvuođastis.

₁₈Son geahččá vártnuhemiid beallái,

iige badjelgeahča sin rohkosiid.

₁₉Dát čállojuvvo boahtti áiggiid várás,

ođđa buolvvat máidnot Hearrá.

₂₀Hearrá geahččá vuolás

bassi allagasastis,

almmis son geahččá eatnamii.

₂₁Son gullá fáŋggaid šuohkkima,

son čoavdá daid

geat leat dubmejuvvon jápmit.

₂₂Hearrá namma gulahuvvo Sionis,

su máidnun gullo Jerusalemis,

₂₃go álbmogat čoagganit,

go riikkat bohtet bálvalit Hearrá.

₂₄Son lea vuoimmehuhttán mu

gaskan mátkki,

mu beivviid son lea oanidan.

₂₅Mun rohkadalan: Mu Ipmil,

ale váldde mu eret gaskan beivviidan,

don gean jagit bistet buolvvas bulvii.

₂₆Don vuođđudit eatnama juo dolin,

albmi lea du gieđaid dahku.

₂₇Dat duššet, muhto don bisut.

Dat nohket dego bivttas,

don molssut daid dego gárvvuid,

eaige dat šat leat.

₂₈Muhto don leat álo seammá,

du jagit eai noga.

₂₉Du bálvaleddjiid mánát

besset ássat ráfis,

sin sohka bissu nanusin

du muođuid ovddas.