Sálmmaid girji 144

Máidnojuvvon lehkos Hearrá, mu bákti!

Son oahpaha mu gieđaid soahtat,

mu suorpmaid dáistalit.

₂Hearrá lea mu árpmiheaddji ja ladni,

son lea mu toardna ja beasti,

son lea mu galba ja dorvu.

Son bidjá álbmogiid mu váldái.

₃Hearrá, mii lea olmmoš,

go don anát sus fuola,

olbmománná, go don beroštat sus?

₄Olmmoš lea dego hieibma,

su beaivvit jávket nugo suoivvan.

₅Hearrá, sojat almmát ja njieja vuolás,

guoskkat váriid, vai dat borggistit!

₆Divtte álddagasaid šleađgut,

biđge vašálaččaidat,

báže njuolaidat ja moivašuhte sin!

₇Geige gieđa allagasas ja gájo mu,

beastte mu čiekŋalis čáziin!

Gájo mu vierrásiid gieđas.

₈Sin njálbmi sárdnu giellásiid,

sii bajidit olgeš gieđa ja vurdnot vearreváli.

₉Ipmil, mun lávllun dutnje ođđa lávlaga,

mun čuojahan dutnje logisuonat hárppain.

₁₀Don gii attát vuoittu gonagasaide,

don beasttát bálvaleaddját Davida

bahás miehkis.

₁₁Gájo mu vierrásiid gieđas.

Sin njálbmi sárdnu giellásiid,

sii bajidit olgeš gieđa ja vurdnot vearreváli.

₁₂Min bártnit leat juo nuorran

dego allagin šaddan šattut,

min nieiddat dego báccit,

šloahta hearvan duddjojuvvon.

₁₃Min vuorkkát leat dievva,

dain lea valjis borramuš.

Min sávzzat lassánit duhátgeardásaččat,

velá logiduhátgeardásaččat min gittiin,

₁₄ja min gusat leat buoiddit.

Ii oktage fallet min, ii oktage áje min eret,

eai gullo váidalančuorvasat min gáhtain.

₁₅Lihkolaš dat álbmot masa geavvá ná,

lihkolaš dat álbmot man Ipmil lea Hearrá!