Sálmmaid girji 149

₁Halleluja!

Lávlot Hearrái ođđa lávlaga,

čoagganehket rámidit su,

dii geat sus ballabehtet!

₂Illudehkos Israel sivdnideaddjistis,

ávvudehkoset Siona mánát iežaset gonagasas,

₃máidnoset su nama dánsumiin,

rámidehkoset su rumbbuin ja lyrain!

₄Hearrá ráhkista iežas álbmoga,

son čiŋaha vártnuhemiid bestojumiin.

₅Illudehkoset oskkáldasat ávvudemiin,

čurvoset ilus vel oađđinsajisteasetge!

₆Sin njálmmis čuodjá máidnunlávlla Ipmilii,

gieđas sis lea guovtteávjjot miehkki.

₇Sii mávssahit álbmogiidda

ja ráŋggáštit čearddaid,

₈sii čatnet láhkkiiguin daid gonagasaid

ja bidjet ruvddiide daid oaivámuččaid.

₉Sii ollašuhttet duomu

maid Hearrá lea mearridan.

Dat lea su oskkáldasaid gudni.

Halleluja!