Sálmmaid girji 34

₂Mun máinnun álo Hearrá,

mu njálbmi rámida su čađat.

₃Mu siellu addá gudni Hearrái,

vuollegis olbmot gullet dan

ja illudit.

₄Máidnot muinna Hearrá,

rámidehkot ovttas su nama!

₅Mun ohcen Hearrá,

ja son vástidii munnje,

son besttii mu buot balus.

₆Dat geat gehččet sutnje,

báitet ilus,

sin muođut eai goassege

ruvssot heahpanemiin.

₇Dás lea vártnuheapme gii čuorvvui.

Hearrá gulai mu ja besttii mu

buot mu áŧestusain.

₈Hearrá eŋgel várjala

su oskkáldas olbmuid

ja beastá sin.

₉Muosáhehket ja oidnet

ahte Hearrá lea buorre!

Ávdugas dat gii dorvvasta sutnje.

₁₀Ballet Hearrás, su bassi olbmot!

Ii mihkkege váillo dain,

geat ballet sus.

₁₁Ledjonat gillájit heađi ja nelgot,

muhto dain geat ohcet Hearrá,

ii váillo mihkkege buriid.

₁₂Mánážiiddán, bohtet

guldalit mu,

mun oahpahan din ballat Hearrás.

₁₃Leago dus miella buori eallimii,

hálidatgo vásihit lihkolaš beivviid?

₁₄Várut dalle iežat njuokčama bahás,

baksamiiddát behtolaš sárdnumis.

₁₅Hilggo bahá ja daga buori,

bivdde ráfi ja váinnut dan!

₁₆Hearrá čalmmit gehččet

vanhurskásiidda,

su bealjit gullet sin čuorvasiid.

₁₇Hearrá jorgala muođuidis

daid vuostá geat dahket bahá,

son duššada eatnamis

sin muittuge.

₁₈Vanhurskásat čurvot,

ja Hearrá gullá

ja gádju sin buot áŧestusain.

₁₉Hearrá lea daid luhtte

geain lea doddjojuvvon váibmu,

son beastá daid

geaid vuoigŋa lea cuvkejuvvon.

₂₀Vanhurskkis olbmos

leat ollu váivvit,

muhto Hearrá gádju su buot dain.

₂₁Son várjala buot su dávttiid,

ii oktage dain cuovkan.

₂₂Lihkuhisvuohta goddá

ipmilmeahttuma,

dat geat vašuhit vanhurskása,

leat sivalaččat.

₂₃Muhto Hearrá lonista

bálvaleddjiidis heakka,

ii oktage gii dorvvasta sutnje,

šatta sivalažžan.