Sálmmaid girji 37

Ale moaráhuva baháide,

ale gáđaš vearredahkkiid.

₂Sii goldnet fáhkka dego rássi,

goiket nugo ruonas šattut.

₃Dorvvas Hearrái ja daga buori,

de beasat eallit eatnamis

oadjebassan.

₄Illut Hearrás, de son addá dutnje

maid du váibmu hálida.

₅Bija iežat geainnu Hearrá háldui,

dorvvas sutnje,

son atná dus fuola.

₆Son diktá du vanhurskkisvuođa

badjánit dego iđitguovssu,

du vuoigatvuođa čuovgat

nugo čuvges beaivi.

₇Leage jaskat Hearrá ovddas,

vuordde su veahki!

Ale moaráhuva dasa

geas lea lihkku geainnuinis,

dasa gii atná bahás juonaid.

₈Heaitte moari, divtte suhtu jávkat.

Ale divtte moarát cahkiidit,

dat buktá aivve bahá.

₉Dat geat dahket bahá,

duššaduvvojit,

muhto dat geat vurdet Hearrá,

árbejit eatnama.

₁₀Oanehis bottoža geažes

ipmilmeahttun lea jávkan,

go don geahčat su báikki,

de son ii leat das.

₁₁Muhto vuollegaččat árbejit eatnama,

sii ožžot lihku ja ráfi.

₁₂Ipmilmeahttun hutká baháid

vanhurskása vuostá

ja gižaha sutnje bániid.

₁₃Muhto Hearrá boagusta su,

son oaidná ahte su beaivi boahtá.

₁₄Ipmilmeahttumat rohttejit miehki

ja geldet dávggi

vai besset njeaidit váivváša ja geafi,

vai besset goddit vuoigatlaš olbmuid.

₁₅Muhto miehkki deaivá

sin iežaset váibmui,

ja sin dávggit doddjojit.

₁₆Buoret dat unnánaš

mii vanhurskásis lea

go ipmilmeahttumiid

stuorra riggodat.

₁₇Ipmilmeahttumiid

fápmu cuvkejuvvo,

muhto Hearrá doarju vanhurskásiid.

₁₈Hearrá dovdá

láitemeahttumiid beivviid,

sin árbi bistá agálaš áigái.

₁₉Eai sii šatta heahpanit bahás áiggiid,

nealggi áigge sii gallehuvvojit.

₂₀Muhto ipmilmeahttumat duššet

dego gietti hearvarásit,

Hearrá vašálaččat jávket dego suovva.

₂₁Ipmilmeahttun váldá loanas

iige mávsse,

vanhurskkis lea láđis ja árvvas.

₂₂Dat geaid Hearrá buressivdnida,

árbejit eatnama,

muhto geaid son garuha,

áddjojuvvojit eret.

₂₃Hearrá nanne olbmá lávkkiid,

go son vádjola vuoigadis geainnu.

₂₄Jos son guossala,

de son ii jorral,

dasgo Hearrá doallá su gieđas.

₂₅Lean leamaš nuorra

ja lean šaddan boarisin,

muhto in goassege leat oaidnán

vanhurskása hilgojuvvon

inge su mánáid gearjideamen láibbi.

₂₆Álo son lea váibmoláđis

ja luoiká árvasit,

ja su mánát buressivdniduvvojit.

₂₇Gáidda bahás ja daga buori,

de don beasat álo ássat

iežat eatnamis.

₂₈Hearrá ráhkista vuoigatvuođa,

ii son hilggo oskkáldas olbmuidis.

Sii várjaluvvojit agálaš áigái,

muhto ipmilmeahttumiid sohka

duššá.

₂₉Vanhurskásat árbejit eatnama,

sii besset ássat das agálaččat.

₃₀Vanhurskása njálbmi sárdnu

viissisvuođa,

su njuovčča muitala mii lea riekta.

₃₁Sus lea váimmus Ipmila láhka,

eaige su lávkkit suoibbo.

₃₂Ipmilmeahttun olmmoš vuođgŋá

vanhurskása

ja bivdá su heakka.

₃₃Hearrá ii atte su

ipmilmeahttuma gihtii

iige suova su dubmejuvvot

sivalažžan.

₃₄Vuordde Hearrás veahki,

vádjol su geainnu!

Son alida du,

don árbet eatnama

ja beasat oaidnit

go ipmilmeahttumat duššet.

₃₅Mun oidnen

ipmilmeahttun ja veahkaválddálaš

olbmá faŋkámin

dego Libanona sedermuorra.

₃₆Go mun de mannen

dakko meattá, de son lei jávkan;

mun ohcen su,

muhto in gávdnan.

₃₇Geahčat láitemeahttuma,

dárko vuoigatlačča –

ráfi olbmos lea boahtteáigi!

₃₈Muhto buot suttolaččat duššet,

ipmilmeahttumiid boahtteáigi

botkejuvvo.

₃₉Vanhurskásiid bestojupmi

boahtá Hearrás,

son lea sin nana suodji

áŧestusa áigge.

₄₀Hearrá veahkeha ja gádju sin,

son čoavdá sin

ipmilmeahttumiid gieđas

ja beastá sin,

go sii dorvvastit sutnje.