Sálmmaid girji 39

₂Mun jurddašin:

Mun gáhtten iežan vádjolusa,

aman suddudit njuokčamiin.

Mun lohkkadan njálmmi

ja orun jávohaga

nu guhká go ipmilmeahttumat

leat gullanmuttus.

₃Nu mun jávohuvven ja jaskkodin,

mun orron jávohaga,

muhto duššás.

Mu bávččas vearránii,

₄mus váibmu báhkkanii,

mun šuhkken, mu váibmu

bulii dego dolla.

Dalle mun sárdnugohten:

₅Hearrá, oahpat mu muitit

iežan loahpa,

ahte mu beivviid lohku lea unni,

vai mun áddešin man nohkavaš

mun lean.

₆Dušše čorpma dievva

beivviid don addet munnje,

mu eallináigi lea du čalmmiin

dego dušši.

Olmmoš lea dego jiella, Sela

₇son jávká nugo suoivvan.

Dušše jiella leat dávvirat

maid son čobme,

ii son dieđe gii daid oččoš.

₈Hearrá, maid mun vel vuorddán?

Aivve dutnje mun bijan iežan doaivvu.

₉Čoavdde mu buot mu rihkkumiin,

ale suova jallaid bilkidit mu.

₁₀Mun jávohuvan inge rabas njálmmi,

don diktet nu šaddat.

₁₁Váldde eret dan givssi

maid leat bidjan mu guoddit,

mun duššan go don časkkát mu.

₁₂Go don bagadat ja ráŋggáštat

olbmo su suttu dihte,

dalle don loavttát dego muohcu

buot maid son ráhkista.

Olmmoš lea dušše jiella. Sela

₁₃Gula mu rohkosa, Hearrá,

guldal mu čuorvasa.

Ale oro jávohaga go mun čierun.

Dasgo mun lean vieris du luhtte,

guossi nugo buot mu áhčitge.

₁₄Jorgal mus eret iežat geahčastaga,

vai beasan illudit

ovdal go vuolggán eret

inge leat šat.