Sálmmaid girji 48

₂Stuoris lea Hearrá,

sakka rámiduvvon

iežas gávpogis, bassi váristis.

₃Dat badjána čáppisin,

oppa máilmmi ávvun,

Sionvárri, Ipmila várri,

stuorra gonagasa gávpot.

₄Ipmil ássá gávpoga ladniin,

son lea dan nana suodji.

₅Gonagasat čoagganedje,

sii fallehedje oktan veahkan.

₆Sii geahčastedje ja suorganedje,

sii hirpmástuvve ja báhtaredje.

₇Sii dohppehalle ballui

nugo riegádahtti nisson

dohppehallá ávttaide,

₈sii ledje dego Taršiš-skiippat

go nuortariđđu cuvke daid.

₉Maid mii leimmet gullan,

dan mii leat oaidnán

Hearrá, Almmiveagaid Ipmila,

gávpogis:

Ipmil diktá dan bissut agálaččat. Sela

₁₀Ipmil, mii guorahallat

du árbmugas daguid

du bassi tempelis.

₁₁Ipmil, du namma máidnojuvvo,

dat rámiduvvo

gitta eatnama ravddaid rádjái.

Du olgeš gieđa dievva lea

vuoigatlašvuohta.

₁₂Sionvárri ávvuda,

Juda gávpogat illudit

du duomuid dihte.

₁₃Vulget, mannet Siona birra,

lohket dan toartnaid,

₁₄gehččet dan muvrraid,

mannet dan ladniid čađa.

Muitalehket boahtti buolvvaide:

₁₅Dákkár lea Ipmil,

min Ipmil agálaš áigái.

Son láide min álo.