Sálmmaid girji 59

₂Beastte mu, Ipmil,

vašálaččaidan gieđas,

várjal mu dain geat fallehit mu.

₃Beastte mu olbmuin

geat dahket veriid,

gájo mu sorbmejeddjiid gieđas.

₄Sii vuđgŋet mu heakka,

gievrras olbmát ráhkkanit

soahtat muinna,

vaikko mun in leat suddudan

inge dahkan veriid, Hearrá.

₅Vaikko mun in leat sivalaš,

de sii ráhkkanit fallehit.

Gohccá, boađe mu lusa ja geahča!

₆Hearrá, Almmiveagaid Ipmil,

don leat Israela Ipmil.

Gohccá ja ráŋggáš buot álbmogiid,

ale árpmit

oskkáldasmeahttun behttiid! Sela

₇Sii máhccet juohke eahkeda,

holvot dego beatnagat

ja vihket miehtá gávpoga.

₈Sánit golget sin njálmmis,

sin baksamat leat miehkit.

Sii gáddet ahte ii oktage gula.

₉Muhto don, Hearrá,

boagustat sin,

don bilkidat buot álbmogiid.

₁₀Mu givrodat, mun vuorddán

du, Ipmil,

don leat mu nana ladni.

₁₁Mu Ipmil boahtá mu ovddal

árbmugasvuođainis,

son diktá mu oaidnit

go mu vašálaččat gahččet.

₁₂Ale gotte sin,

amas mu álbmot vajáldahttit dan.

Daga sin ruovttuheapmin

fámuinat,

nordat sin vuolás, Hearrá,

min galba.

₁₃Juohke sátni maid

sii dadjet, lea suddu.

Divtte sin sorrot iežaset

čeavláivuhtii

daid garrudusaid ja giellásiid dihte

maid sii sárdnot.

₁₄Duššat sin moaristat,

duššat sin vai sii eai šat leat.

Dalle álbmogat gitta eatnama

ravddaid rádjái áddejit,

ahte Ipmil ráđđe Jakobis.

Sela

₁₅Sii máhccet juohke eahkeda,

sii holvot dego beatnagat

ja vihket miehtá gávpoga.

₁₆Sii vádjolit ohcamin borramuša

ja harret go eai gallán.

₁₇Muhto mun máinnun du fámu

ja illudan juohke iđida

du oskkáldasvuođa dihte.

Dasgo don leat mu ladni,

mu báhtaransadji heahtebeaivvi.

₁₈Ipmil, mu givrodat,

mun lávllun dutnje.

Don leat mu nana ladni,

mu oskkáldas Ipmil.