Sálmmaid girji 74

Ipmil, manne leat hilgon min

agibeaivái,

manne du moarri borggista

iežat ealu vuostá?

₂Muitte álbmogat maid

ostet alccesat dolin,

dan čeardda maid lonistit

iežat opmodahkan,

muitte Sionvári,

iežat ássansaji.

₃Mana surgadis

heavvobázahasaid lusa:

Vašálaš lea billistan visot

du bassibáikkis.

₄Du vašálaččat gilljo du viesus,

dohko sii ceggejedje

iežaset mearkkaid.

₅Sii čulle ákšuin

dego suhkkes vuovddis,

₆ákšuin ja veahčiriin

sii cuvkejedje muorravajahagaid.

₇Sii cahkkehedje du bassibáikki,

eahpebasuhedje ja gaikkodedje

du nama ássansaji eatnama ráje.

₈Sii jurddašedje:

Mii duššadit visot.

Sii bolde eatnamis juohke báikki

gos Ipmil lei bálvaluvvon.

₉Mii eat oainne iežamet mearkkaid,

eai leat šat profehtat,

ii oktage mis dieđe

man guhká dát bistteš.

₁₀Ipmil, man guhká du vuostálastit

ožžot hiddjidit?

Oažžugo vašálaš bilkidit du nama

agibeaivvi?

₁₁Manne don geasát gieđa ruoktot?

Manne du olgeš giehta

lea čihkosis du ozas?

₁₂Ipmil, mu gonagas

dološ áiggiid rájes,

don buvttát bestojumi eatnama ala.

₁₃Don luddejit meara fámuinat,

don cuvkejit guvddiid oivviid.

₁₄Don časket cuovkkas Leviatana oivviid

ja addet daid biebmun meahcispiriide.

₁₅Don diktet ádjaga ja joga

golggiidit,

don goikadit čáhccás eanuid.

₁₆Du lea beaivi, du lea idja,

don bidjet mánu ja beaivváža

sadjáseaset.

₁₇Don mearridit

buot eatnama rájiid,

geassi ja dálvi leat du duodji.

₁₈Hearrá, muitte dán

go vašálaš hiddjida,

go jallas álbmot

badjelgeahččá du nama.

₁₉Ale atte turtelduvvát spiriide,

ale vajáldahte

vártnuhemiidat heakka.

₂₀Muitte lihttot!

Eatnama sevdnjes báikkit

leat veahkaválddi orrunsajit.

₂₁Ale suova sordojuvvon olbmuid

beahtahaddat,

divtte gefiid ja vártnuhemiid

máidnut du nama.

₂₂Čuožžil, Ipmil,

čuoččut iežat ášši!

Muitte mo mielaheamit bilkidit du

geažos beaivvi.

₂₃Ale vajáldahte

vašálaččaidat čuorvasa,

rieja maid du vuostálastit

álo bajidit.